Min Aung Hlaing Ralhrang Phu A Ton Hmasa Bik Tu Committee An Si Men Lai!

Kachin Ramdaihnak Sertu Bu Le Ralhrangbu Remdaihnak Committee An I Tong
==========
Nov 1 ah khan ralhrangbu Bochohci Ya Pyih hruaimi National Solidarity and Peace Negotiation Committee (NSPNC) le Kachin Remdaihnak Sertu Bu (Peace Talk Creation Group) le Kachin Baptist Convention (KBC) hruaitu hna cu Naypyidaw ah tonnak an ngei tiah theih a si.

PCG in U Laman Gunja (ဦးလမိုင်ဂွန်ဂျာ) le U Khun Aung an kai. Tutan hi thlanglei hriamtlaibu hna he ramdaihnak kong biaruahnak a um khawh nak dingah ralhrangbu nih karlak riantuantu bu hna tonnak an ngeih a voikhatnak a si. Tonnak ah aa telmi hna pehtlaih khawh an si rih lo cash zei kong dah an i ceih ti theih a si rih lo.

Tulio boruak ah KIO he tonnak tuah hlan ah Kachin mipi nih an i tihzahmi KBC le PCG hruaitu hna he tonnak an tuah hmasa hi a si. Ralhrang nih nawlngeihnak na lak hnu March thla ah Wah, Mai La (မိုင်းလားအဖွဲ့) le SSPP hna he tonnak ngeih aa zuam nain a hlawhtling lo. Thlanglei hriamtlaibu dang hna he zong ralhrangbu nih remdiahnak kong ceih dingin an sawm hna lengmang nain atu tiang an hlawhtling kho lo.

Tlangcung hriamtlaibu hna nih ralhrangbu sawmnak cu zeihmanh lehnak an tuah lo tiah theih a si. China he pehtlaihnak dirhmun, ramchung ramleng nawrnak le covid zawtnak ruangah umkalnak a har tuk rih mahca cun lehnak kan tuah rih lonak a si tiah an chim.

CDF-Tonzang sin ah Council ralkap Pakhat aa fon. Shan ramkulh, Mongyawng khua hrambunh Kha La Ya – 335 ralhraang battalion in Ralkap Hau En Lian nih September 7 ah rammi zapi lei ah ttang in ralhraang a chuahtak hna i November 2 ah CDF-Tonzaang sin ah aa fon.

“Min Aung Hlaing ralkap chung ah riantuan ka duh ti lo ca ah October 7 ah rammi sin ah kaa fon cang´ ti in nihin November 2 ah CDF-Tonzang sin ah thawng a kan thanh i lunglawm tein kan don,” tiah CDF-Tonzang nih thawng an thanh.

Mindat-Matupi kar ah an i Kap, SAC Ralhrang JCB Pakhat an Khanghpiak Hna. Nihin chun ah Matupi le Mindat karlak meng 50 zawn ah CDF-Mindat nih SAC ralhrang pawl an kah hna i lamcawhnak JCB pakhat mei in an khanghpiak hna. Matupi in motor 70 hrawng, Tank 2 le JCB pakhat he SAC ralhrang pawl an rak ttum i, lampi ah CDF-Mindat nih an kah hna hi a si.

CDF-Mindat chimnak nawlngei nih, “Lamcawhnak JCB pakhat cu mei in kan khanghpiak khawh hna. A mongtu ralkap zong hliam a pu. Ralhriam ngan in a kan kah tuk caah hnu ah kan i thawn chung,” tiah RFA ah a chim.

October 30 zong ah khan Thantlang ca lehrul chamnak ah CDF-Mindat nih Mindat khuachung ah SAC ralhrang pawl an kah hna i, ralhrang lei in minung 3 an thih pin ah a dang minung 8 hrawng hliamhma an put, tiah CDF-Mindat nih thawngpang an rak chuah.

American President Joe Biden le Indonesia President Joko Widodo nih kawlram ramkhel thawngtla pawl chuah ding le buai nak ngol ding in ralhrang sin ah nawl nak an tuah. Scotland ram, Glasgow khuapi ah tuah mi November 1 COP 26 meeting dih hnu ah a tu ban tuk in Presidents pahnih nih an chim mi hi a si tiah Media tampi nih an langhter.

American president White House ah president pahnih cu kawlram hramhram uk nak lak ruang ah an lungretheih nak an langhter i uknak la tu ralhrang lei in hramhram uk nak ngol colh ding, ramkhel ruang ah tlaih mi hna thlah ding le Democracy ram si than nak ding ah bawmh ding in hnatlak nak an ngei tiah kan theih.

American President Joe Biden nih October thla i tuah mi Asian meeting zong ah ralhrang cung i Asian lungput a cohlan kong zong a chim. Ramkhel thawngtla pawl zohkhanh tu bu (AAPP) nih an langhter ning ah cun hramhram uk nak an lak hnu ah hin a tlawm bik minung 1229 an thi i minung 9500 leng an tlaih an tong.