Min Aung Hlaing Ralhrang Nih Uknak A Kal Pi Rih Ahcun Mipi Vialte Nih Hriam An Tlaih Dih Cang Lai, Tiah KIO Nih An Chim

Min Aung Hlaing Ralhrang Nih Uknak A Kal Pi Rih Ahcun Mipi Vialte Nih Hriam An Tlaih Dih Cang Lai, Tiah KIO Nih An Chim
================
Min Aung Hliang ralhrang tapung pawl nih uknak hi pehzulh in an kalpi peng rih ahcun ram pumpi mipi vialte nih hriamnam an tlaih dih lai, tiah KIA chimhnak nawlngeihtu Bohmukyi Naw Bo nih a chim. Atu ah ralhrang tapung pawl doh dingah aho hmanh mipi pawl sawm hau loin tlangcung hriamtlai phu umnak hmunhma kip ah an kal cio hna, tiah Bohmu Naw Bo nih a chim. Nihin ni ahcun hriamtlai phu umnak hmunkip ah ralhrang tapung pawl doh dingah training tuah ding in an kal cio i, an phan cio cang, tiah Bohmukyi Naw Bo nih a chim.

KIO/KIA lei nih ramchung ramleng ah a ummi mipi he hmunkhat teah dirhti ding le kahdohnak tuah ti dingin ralhrang a tla khawhnak ding caah kan zapi tein kan doh ti hna lai, tiah an chim. Kan nih KIO phu cu mipi he hmunkhat tein a dirhti mi kan si. Kan nih cu mipi nu le pa kan si. Mipi cungah thinlung dihlak in kan taang i, kan dirh lai. Mipi kan ti tikah Kachin ramkulh chung um mipi kan chim duhnak a si.

Kachin ramkulh chung um mipi pawl chimh duhmi a si ko nain ramchung ramleng le mipi he zong hmunkhat ah kan dirti thiamthiam lai. Ramchung ramleng a ummi mipi cung zongah dawtnak thinlung taktak kan ngeih ko. A hnu lei in kan dirh peng ko. Cucaah, ralhrang tapung hriamtlai phu kahdohnak caah cun kan zapi tein kan tuanti kan doh ti a hau. Kachin Independence Army (KIA) hriamtlai phu nih an lak mi Alaw Bum sakhaan pawng hrawng ah atu cu kahdohnak a daih ngai rih, tiah Bohmukyi Naw Bo nih a chim.

Min Aung Hlaing ralhrang tapung pawl nih an sungh cang mi Alaw Bum sakhaan lak thannak ding caah a phunphun in an izuam peng rih. Vawlei ralram in le cunglei raltuknak vanlawng in an doh peng ko nain nihin ni tiang ahcun an lak than kho rih lo. KIA hriamtlai phu lei nih nihin ni tiang ALAW BUM sakhaan cu an veng kho rih. Atu tan Alaw Bum sakhaan kahdohnak an ngol chungmi hi ralhrang lei nih raltuk ningcang thleng an i timh caah le hmun dangdang ah kahdohnak ah ralkap pawl kuat chap le an kuat hna caah a si, tiah Bohmukyi Naw Bo nih a chim.