Min Aung Hlaing nih thawngthanhnak a tuah cang, tihnung a si ko!

Terrorist phu pawl hrawh an si lai tiah Min Aung Hliang nih a chim!
=========
Hramhram uknak latu Kawl Ralkap phu (SAC) nih ralhrang an sti tiah thanhmi Ralhrang (Terrorist) phu pawl, Terrorist Organization pawl tha a petu phu pawl he ramkhel lei biaruahnak ngeih loin kan hrawh dih hna lai tiah an lutlai Min Aung Hlaing nih a chim.

Mah bantuk phu hna telh loin NCA minthutnak a ngeimi phu pawl he cun biaruahnak kan ngei lai i [NCA] min a thu rih lo phu zong riikhiah lo (precondition) tein zalong tein biaruahnak kan ngei lai tiah a chim. Asinain, Karen National Union (KNU) in ramdang lei kong rianngeitu Pado Saw Taw Nee nih “kahdohnak dinhdorh loin SAC a tlak tiang kan doh lai,” tiah RFA ah a chim.

“Kuan tampi a um ko buin zeihmanhtuah khawh loin a sung an pek caan a tamtuk cang. Hmun tampi ah a cang cang. Kahdohnak lawng hi ralkap hrawhnak a si lo. Thil tampi aa rak fonh tikah an mah lei nih zeitin hmanh in an ṭhawng kho ti lai lo tiah zumhnak fek ka ngei. Cucaah, kan tuah rih dingmi cu hramhram uknak hrawh khawhnak ding caah kan tuah hrim lai”.

SAC Ralkap ralhrang nih amah a dohkaltu chung in, National Unity Government (NUG) le a kuttang ummi People Defense Force (PDF) pawl cu ralhrang (Terrorist) phu pawl tiah a thanh, a chiahmi hna an si. 2023 ah zalonnak kan ngah kum 75 a tlin lai caah atu caan karlak ah ramchung buainak daihter ding kan tawlrel lai tiah Min Aung Hliang nih a chim.

Ralkap nih anmah lei lawng (kapkhat) kahdaihnak kan tuah tiah a chim fawn. Atu bantuk ramchung buainak hi tlangcung hriamtlai phu EAOs sin in a raami a si tiah SAC hruaitu nih a chim. March 27 ah tuahmi Ralkap Ni (Armed Forces Day) ah Karen ramkulh, Muṭaw peng, Pekay khua lei ah SAC nih vanlawng in a kah caah mipi inn cheukhat a rawk tiah KNU nih a thanh.

Cun, Kachin ram, Moekaung peng, Kasung khua pawngah Kachin Independence Army (KIA) battalion-2 cu March 27 ah SAC nih vanlawng in a kah tiah KIA nih a chim. Natmatee peng chungah kahdohnak um lo buin SAC nih bom in an kan kah tiah KIO Major Nawbu nih RFA ah a chim.

Min Aung Hlaing Nih Nawl thar a Chuah than! ကြေးမုံ၊ မြန်မာ့အလင်း Journals Reltu An Tlawm Chin Lengmang Ruangah Riantuantu Nih Nan Rel Lai Tiah Min Aung Hlaing Nih Nawl Chuah! SAC ralhrang nih a chuahmi မြန်မာ့အလင်း၊ ကြေးမုံ le The Global News Light of Myanmar journal hna reltu an tlawm tuk cang ruangah SAC ralhrang kuttang ah riantuantu dihlak nih nan rel lai tiah Min Aung Hlaing nih nawl a chuah.

SAC ralhrang nih a chuahmi thawngpang catlap hna cu hmunkip ah a kal khawh ti lo caah SAC ralhrang kuttang ah riantuantu dihlak nih cawk cio dingin le rel cio dingin le cuti rel lawnglawng ah SAC ralhrang nih a tinhtuahmi hna hi theihfian khawh a si lai i, thiltha tampi a chuahpi lai tiah cathanh an chuahmi ahcun an langhter.

Vuanci zung lawng siloin palek, mei thattu, hruaitu zungkip, sianginn, khua chung a sang le veng tiangin ကြေးမုံ၊ မြန်မာ့အလင်း၊ The Global News Light of Myanmar thawngpang catlap chuahmi hna cu catlap pakhat ah kyats 100 in cawk cio dingin, vuanci zungkip le riantuantu dihlak nih loh theih loin nan cawk lai tiah cathanh an chuah hi a si.

Nawlngeihnak Laak Dingin Duhlonak Langhternak Dingah Phaisa Sing (800) Lengkai Bawmhnak Petu U Khin Shew Le A Fapa Cu Ing Sein Thonginn Ah An Hrenh! Kum 2021 January thla ah khan Yangon le khuapi ngan deuhnak hmun ah Kawlram ralkap nih nawlngeihnak laak dingin forhfialnak an tuahmi puai caah phaisa tampi a petu Yi Kabar U Khin Shew le a fapa Yi Tyi Hah hna cu Bahan palek sakhan nih an tlaih hnuah Ing Sein thonginn ah an kuat cang tiah FNG nih a langhter.

An tlaih tan ahcun Yangon khuapi chung tawlreltu U Bo Hte zong a tel ve i, Yi Kabar Company riantuantu minung (20) telh in U Khin Shew he aa pehtlaimi minung (60) hrawng zong an tlaih chih tiah theih a si.

Yi Kabar Company ngeitu U Khin Shew cu kum 2021 January thla chungah Yangon khuapi Bahan peng Shew-Tri-Gan Syi Tyi pawngah ralkap nih nawlngeihnak an laak nakhnga puai an tuahmi ah phaisa sing (800) lengkai bawmnak petu a si i, ralkap nih nawlngeihnak an laak hnuah a ngeihmi Myiah Yik Ngyu Hotel hmunhma cu ralkap nih an tlaihmi paohpaoh cuka ahcun caan karlak hrenh chung dingin hmunhma petu a si tiah theih a si.

Nawlngeihnak laaknak caan kum khat a liam hnuah Min Aung Hlaing chungkhar caah England serchuahmi Jaguar F Type motor zong laksawng ah a pek rih hna tiah FNG nih a langhter.

U Ye Htun Tlaih A Tong Timi Cu A Dik Lomi A Si Tiah Amah Lila Nih A Fianter! Thawngzamhnak le thawngthanhnak lei chief minister hlun simi U Ye Htun cu March 23 ah khan tlaih a tong timi cu a dik lomi thawngpang a si tiah amah nih a fb ah March 24 ah khan fianternak a tial.

Ayeyawady Times nih U Ye Htun he U Shew Man i fapa U Toe Nyi Man, Bogyoke-gyi Kyaw Shew hna cu SAC ralhrang ralkap nih an tlaih tiah a langhter. “Tutan cu lampi hmanhah kaa chawk rih lo, ihnak in ka thawh lecangka, ka konglam cu ka rel ko ai, hawikom zong ka ngei a si mu” tiah amah nih a tial.

A liamcia kum 2021 November 10 lio zongah khan Yangon khuapi chung amah umnak inn ah SAC ralhrang ralkap nih an rak tlaih tiah thawngpang a chuak bal cang.

Kalaymyo Ah Ralhrang Ralkap Chung Nurse Bogyi Pakhat Cu Amah Le Amah Hri In Aa Awk That! Kalaymyo ah ihkhun 100 umnak ralhrang ralkap sizung ah ralkap chung nurse bogyi pakhat Chian Myih Maung cu March 22 zanlei sangah amah le amah hri in aa awk that tiah theih a si.

Zeiruangahdah atu bantukin amah le amah hri in aa awk that timi aruang cu theih a si lo. Nurse bogyi Chian Myih Maung cu ralhrang ralkap nurse le medical university a vawi (9) nak, kum 2011 ah khan a liammi saya pakhat a si i, a liamcia nikum ah khan bogyi rank an pek mipa a si.

Kawlram Mino Tanghra Ongmi Nih India Ramchung Mizoram University Ah Sianginn Kai Khawh A Si Cang! Vawlei cung ram dihlak ah nu lei he pehtlai in special reward a cotu Mara nu Rev. Maiki le professor K. Robin hna nih India ramchung Mizoram University ah tuanvo ngeitu hna he tonnak an ngei hna i, Kawlram mino tanghra ongmi hna nih sianghleirun an kai khawh nakhnga tonbiaruahnak an ngeihmi cu an hlawh a tling.

Kawlram siang ngakchia hna nih cuka university ah MA,Msc, Ph.D engineering le subject dangdang zong an cawn khawh cang lai. Tanghra a ong cangmi hna nih plus-2 (XI-XII) cawn loin thla (6) chung cawnnak an ngei lai i, thla 6 chung an dih hnuin anmah duhmi subject an cawn khawh cang lai tiah theih a si.