Kyauktaga peng kahdohnak ah SAC ralkap 30 leng an thi i hriamnam kuanzen tampi an laak!
=========
Bago ramthen, Kyauktaga peng, Thamininn Kone khuate ah KNLA, PDF Special Commando Battalion le SAC ralkap kar kahdohnak a chuak i SAC ralkap 30 leng an thi, hriamnam tampi an laak khawh tiah Thlanglei PDF Command Zung nih a thanh. August 9, zinglei suimilaam 2:00 in chun 1:00 tiang an i kap i cuka ah cun SAC ralkap 30 leng an thi tiah theih a si.
Kahdohnak chung ah SAC hriamnam MA1 zun 8, MA2 zun 1, MA3 zun 1, MA4 zun 1, machine gun zun 1, Drone gun 1, mine kawlnak seh 1, kuan bawm 11, bombthei le kuanzen tampi an laak khawh tiah theih a si. Tu zing tiang ah a dihlak zun 24 an laak khawh cang ti in report peknak zong a um tiah an langhter. Hi kahdohnak ahhin Rammi ralkap KNLA in ralkap pahnih le PDF commando pakhat nih ram ca ah nunnak an pek ti zong an langhter.
Monywa Ah Duhlonak Langhter In Lamzawh Mi 3 An Kah Hna Hnu Ah An Tlaih Hna. August 8, Zanlei sangah Sagaing ramṭhen Monywa khuapi Kanthayar tlonlennak hmun ah kum 1988 July 8 (8888) camtuak langhter in lamzawh mi 3 cu SAC ralhrang palik nih an tlaihkhih hna tiah theih asi.
“SAC ralhrang palik hna cu tualchung mipi motor in an ra i Kanthayar tlonlennak hmunhma ah kum 1988 July 8, (8888) camtuak langhter in lamzawh mi tlangval 3 cu an kah hna hnu ah an tlaih hna hliam an tuar tu cu ka hmuh an thih le thih lo tucu ka thei lo” tiah Kanthayar tualchung mi pakhat hmutu nih a chim. Cu pinah Monywa khuapi kum 2 chungah hin tlaihkhih tong mi 100 tluk an um cang i cu lak ah kahthah tong mi 30 naak tlawmlo an thi tiah an langhter chih.
Kareni Ram Ah SAC Nih Anmah le Anmah Bom An I Thlak Sual Caah Ralkap 12 Nak Tlawm Lo An Thi! Myanmar le Thai ramri, Karenni (Kayah) ram ah a cang mi kahdohnak chung ah SAC nih vanlei in bom a thlak sual caah kekal ralkap 12 hrawng an thi tiah Thai PBS thawngzamh nih a langhter. August 5 ah kahdohnak a fah lio ah Thai ramri he Kilometres 30 (meng 18 leng) aa hlatnak ah a um mi KNDF, KA sakhaan hna cu SAC nih vanlawng 3 in bom a rak thlak.
An thlak mi bom pawl cu vawlei ah a um mi kekal ralkap pawl cung bak ah a tlak caah 12 hrawng an thi i tampi an i hliam tiah Thai PBS nih cun a langhter. Cu bantuk vanlei kahdohnak ruang ah Karenni hriamtlai 2 zong an nunnak a liam ve i 7 fak ngai in an i hliam. Hliam a tuar mi hriamtlai pawl cu Thai ram lei ah an thlop hna tiah theih a si.
SAC ralkap le Karenni ralkap hna karlak kahdohnak a chuah lio ah KNU zong nih Karenni lei ah bawmhnak pek ding in a ralkap a samh ve tiah PBS nih cun a chim. SAC ralkap pawl cu Karenni ralkap pawl nih an lak mi sakhaan pawl lak ṭhan khawh nak hnga le dothlennak phu pawl kutchung a phan mi 120MM Motor 7 le kuan 12,000 hrawng lak khawh ṭhan an i zuam tiah theih a si.
SAC ralkap 300 hrawng cu Thanlwin tiva an tan khawh cang i adang 300 hrawng zong tiva tan ding in timhtuahnak an ngei i Karenni hriamtlai pawl doh ding an i zuam tiah Thai thawngzamh nih cun a langhter.
SAC Ralkap Sakhaan 30, Palek Sakhaan, Pyusawthi le BGF Sakhaan 40 Leng Thla 6 Chung Ah An Lak Khawh! People’s Defense Force, tlangcung hriamtlai phu le adang hawikom phu hna bawm in kahdohnak ruang ah 2023 kumcheu chung ah SAC ralkap sakhaan 30 an lak khawh tiah NUG Ministry of Defense biachimnak nawl a ngeitu U Mg Mg Swe nih a chim.
“Thla 6 chung ah kan ral hna sakhaan voi 30 an lak khawh. Karenni ram ah voi 10, Sagaing ramṭhen ah voi 6 le thlanglei ramṭhen hna ah voi 14 tiah PDF le adang hawikom phu pawl nih teinak an hmuh” tiah a chim. Cubantuk in palek sakhaan 15, BGF sakhaan 10, Pyusawthi sakhaan 14 zong an lak khawh tiah a chim.
Thla 6 chung ah kahdohnak voi 935 a chuak i SAC ralkap 3,012 an thi, 4021 an i hliam tiah a chim fawn. Kahdohnak chung in hriamhme 203 an lak khawh i kuan 3,000 leng, bom lung 6,000 leng le bomrap lung 170 leng an lak khawh tiah theih a si.
Thla 6 chung ah Northwestern Regional Military Command voi 6, Southeastern Regional Military Command voi 1, Brigade 44 Headquarters voi 3, Brigade 33 Headquarters voi 1, Brigade 101 Headquarters voi 2 an doh khawh tiah U Mg Mg Shwe nih a chim.
Thabeikkyin Peng Ah Tualchung Mi 6 Cu PDF Thuam Hrukter In SAC Ralkap Nih An Thah Hna. Mandalay ramṭhen, Thabeikkyin peng, Kyaukai khuami 6 cu SAC ralkap nih an thah hna hnu ah PDF thuam hrukter in “PDF chungtel an si” tiin thawngthanhnak an tuah, tiah Thabeikkyin peng pah kah phah in ṭuanvo ngeitu pakhat nih a chim.
August 4 ah Ayeyarwady tiva hrawn in a kaimi SAC ralkap tilawng 9 humhimnak a lakpiaktu ralkap 700 cu Thabeikkyin pengchung khuate ah rallam sial in, tualchung mi hna umnak inn an khangh. Cu pinah Kyaukai khuami 6 cu an tlaih hna hnu ah an thah hna i, Takaung pah kah phah thuam hrukter in “PDF 6 kan tlaih hna” tiah thawngthanhnak an tuah.
“SAC ralkap thazaang tam ngai nih rallam an sial ruangah tualchung mi hna cu an herhmi thilri i put in an zaam lio ah khuami 6 cu SAC ralkap nih an tlaih hnu i PDF thuam an hrukter hna. PDF 6 an thi tiin thawngpang a than caah khuami nih hlathlainak an tuah i Kyaukai khuami an si tiah tualchung mi nih an chim. A luancia July 29 in nihin August 8 tiangah kahdohnak pehtlai in a chuak, PDF cu kan him dih ko” tiah Thabeikkyin peng pah kah phah in ṭuanvo ngeitu pakhat nih a chim.
SAC ralkap nih Thabeikkyin peng khuate hmunkip ah thazaang tampi he rallam an sial ruangah tualchung mi hna cu harsa ngai in ralhrial dirhmun an phan. SAC ralkap le tualchung hriamtlai phu kar kahdohnak ah SAC ralkap lei a thimi le hliamhma tuar mi an um lengmang caah tualchung mipi cungah lehrulh cham in inn kip ah an duhmi thilri poh an laak hnu ah inn cu an khangh, tiah tualchungmi hna nih an chim.
Kalaymyo Thonginn Ah CNDF Ralkap Pakhat Nunnak A Liam! Sagaing ramṭhen, Kalaymyo thonginn ah thong a tla mi Chin National Defense Force-CNDF chungtel Salai Van Biak Him cu Kalaymyo siizungpi ah thlop cuahmah a si nain August 6, zinglei suimilam 10:00 hrawngah a nunnak a liam, tiah tualchung mi nih an chim.
Salai Van Biak Him cu a luancia 2022, March 15 ni Kalaymyo thonginn chung i kahnak a chuahlio ah a nunnak liammi CNDF chungtel Van Dim he 2021, May 30 ah SAC ralkap nih sualpuhnak he an rak tlaih hna. “Keimah he Kalaymyo thonginn ah kan rak umṭi bal.
Salai Van Biak Him hi Van Dim he hmunkhat teah a umṭi pengmi an si i, Van Dim a thih hnu ah hruaitu a si an ti ruangah fak tuk in hrem a tong. Cu pinah a nih hi a ngandam lo ngai mi a si i, a cuap zong a ṭhat lo caah siizung ah an thlop lengmang mi a si,” tiah Salai Van Biak Ham he hmunkhat ah thong a rak tla ṭi bal mi pakhat nih a chim.
CNDF ralkap Salai Van Biak Him hi a ngandamnak a ṭhat lo pinah sii-ai tlamtling in thlop a si lo, ṭha tein siizung ah i thlopnak nawl zong a ngei lo. A zual tuk hnu lawngah thonginn leng siizung ah an kalpi, tiah an chim.
Salai Van Biak Him thihnak kong he pehtlai in CNDF chimphuannak nawlngeitu Salai Cung Ngai nih cun, “Anih hi lungzawtnak a ngeimi a si tiin kan theih. Siizung an phanhpi hnu minutes 30 hrawng a rauh ah a nunnak liam, tiah an chim nain, a zoh dawhnak in siizung i a thi mi bantuk in an chim a si ko. Thonginn chungah ṭha tein an thlop lo ruangah atu bantuk in a nunnak tiang a liam hi a si. A ruak zong a chuah semnak Chin ramkulh Falam ah vui ding in hal a si nain an sianh hna lo caah Kalaymyo ah nihin ah ruak vuinak an tuah,” tiah a chim.
Atu tiangah CNO/CNDF chungtel 14 cu SAC ralkap nih phungning loin an tlaih hna. 2022, March 15 Kalaymyo thonginn chung i kahnak a chuah lio ah Salai Van Dim cu a nunnak a rak liam i, tutan ah nunnak luammi Salai Van Biak Him hi thonginn chung i nunnak a liam mi pahnihnak a si. Credit: The Chin Post