Min Aung Hlaing nih mipi tikhor ah sivai an thlakpiak hna timi thawngpang nih

Namtoe Peng Sinli Khua Ah SAC ralkap An Lut I Sui Le Phaisa An Fir, Cun An Tikhor Ah Sivai An Thlakpiak Hna!
========
Shan ramkulh Namtoe peng Sinli khua cu SAC ralkap nih luhhnawh in an sui le phaisa an fir, inn le motor an hrawhpiak hna lengah an tikhor ah sivai an thlakpiak hna tiah tualchungmi hna sinin theih a si.

Shan ramkulh chaklei Namtoe peng Sinli khua cu a luancia September ni 29 in SAC ralkap an lut i khuachungmi thilri motor, cycle le inn an hrawh, cun phaisa sing 150 ks le sui an fir, cu lawng si lo in innzuat saṭhil zong an duh paoh in an thah, cun tikhor ah sivai an thlak ta i October ni 6 ah khua in an chuak tiah theih a si.

Namtoe peng Sinli khua cu a luancia September ni 29 in kahdohnak a rak chuak i khuami pawl cu a himnak ah an zaam dih tiah theih a si. Sinli khua ah hin PDF le KIA i fonh in SAC ralkap an doh hna i SAC lei a thimi zong an tam ngai tiah theih a si.

Pale Ah Ral Vengtu SAC Ralkap Hriamngan He Kah An Tong, Ralkap 7 An Thi. Sagaing ramṭhen, Yinmapin pengkomh, Pale ah ral vennak a tuahtu SAC ralkap hna cu October 6 ah hriamngan he kahdoh an ton caah SAC ralkap 7 an thi tiah theih a si.

SAC ralkap, palik le pyusawhṭi tiin minung 18 cu Pale khuachung ah ral vennak an tuah lio zaan suimilam 8:40 hrawngah tualchung hriamtlai phu hna nih Auto gun, sniper le 40 mm hmang in kan kahdoh hna tiah Southern YSO PDF in Bo Aung Maung nih a chim.

Cu SAC ralkap hna cu Sagaing ramṭhen hrambunh ṭah-khah-mah 33 in an si i, kaphnih kar i kahdohnak ruang ah SAC ralkap 7 an thi, tualchung hriamtlai phu lei in minung pakhat hliamhma a tuar tiah Bu Aung Maung nih a chimchap.
“PDF leiin minung pakhat nih hliamhme a tuar, ralkap lei minung 5 an thi, cun sizung phanmi ralkap hna chungin minung 2 an thi chap” tiah a chim.

Kanbalu Ah SAC Ralkap Nih Pehtlaiin Nili Chung Rallam An Sial Caah Tualchung Mi Thonghra Renglo Ralzaam Dirhmun An Phan. Sagaing ramṭhen, Kanbalu pengchung October 4 in nihin October 7 tiang, SAC ralkap nih pehtlaiin nili chung rallam an sial.

Mipi umnak inn an hrawhpiak pinah an khangh piak hna, cun mipi ngeihmi thilri an firpiak rih hna caah tualchung mi thonghra renglo nih an umnak an zaamtak tiah theih a si. Nili chung SAC ralkap nih rallam an sial caah khua 7 in khuami minung thonghra hrawng nih an umnak khua cio chuahtak in an zaam hna tiah Kyunhla khuami dohthlennak tuahtu phu chungtel pakhat nih a chim.

Rallam sialtu SAC ralkap hna nih cun October 5 ah Lwingyi khuachung an khangh, cun nizaan October 6 ah Zawchaung khua an khangh ṭhan. Tintaw khua zong ah an lut i mipi umnak inn chung thilri an thlok dih tiah tualchung mi nih an chim.

Htilin Ah Kahdohnak A Chuak, SAC Ralkap Nih Tharakhar Khua An Khangh Caah Inn 6 A Ciam. Magway ramṭhen, Htilin pengah SAC ralkap le PDF-Htilin kar kahdohnak a chuak i SAC ralkap nih Tharakhar khua an khangh tiah PDF-Htilin nih cathanh an chuah.

October ni 6 ah Shwe Aung Thar in Htilin lei ah a rami SAC ralkap thazaang 80 tluk cu tualchung hriamtlaiphu hna nih Gyichaung hleidonh ah zaanlei suimilam 3:19 ah bomb in an kahdoh hna tiah theih a si. Tualchung hriamtlaiphu hna nih an kah hna hnu ah SAC ralkap lei nih hriamngan le hriamhme he an kah ve hna i kaphnih kar kahdohnak faak a chuah.

Cu hnu zaanlei suimilam 5:30 hrawngah Tharakhar khua umhmun khuarmi SAC ralkap pawl cu PDF-Htilin nih 60 mm in an kah ṭhan hna nain SAC lei a thi le aa hliammi theih a si rih lo. October ni 7 zing suimilam 7:20 ah SAC ralkap pawl cu Tharakhar khua ah an lut i tualchungmi inn 2 an khangh i a pawngkam inn 6 zong a ciam chih tiah theih a si.

Wundwin Ah Cycle In Aa Chawkmi SAC Ralkap Kah An Tong 2 An Thi. Mandalay ramṭhen Wundwin peng Yonepinkone khua hnulei ah SAC ralkap ralveng in ai chawkmi cycle pawl cu bomb puah an tong i palik 2 an thi tiah theih a si.

SAC ralkap le palik ralvennak tuahmi cycle pawl cu nihin October ni 7 chun suimilam 12:30 hrawng ah Wundwin Township Revolution Force (WTRF) nih bomb in kan doh hna caah palik 2 an thi tiah Wundwin Township Revolution Force nih cathanh an chuah. Credit: The Chin Post