SAC Nih Kyats 20,000 Ca An Chuah Hnu In Hakha Thil Man Cheukhat Dirhmun
=========
SAC nih kyats 20,000 ca an chuah hnu in Hakha ah thil man a kaimi zong an um i amah kel in zuarmi zong an um ve, tualchung mi hna sinin theih a si. Tualchung mi pakhat nih The Chin Post chimh ning ah, SAC nih kyats 20,000 ca an chuah hlan in Hakha ah facang man le chiti man cu a kai ngai cang. Facang dawr a tuahtu hna zong an zuar ning aa khat cio lo. Dawr pakhat nih facang tun khat ah kyats 90,000 in a zuar lio ah 95,000 – 100,000 kar in a zuarmi zong an um.
SAC nih kyat 20,000 ca an chuah hnu in atu lio Hakha facang man cheukhat cu Pawsan hmui(ပေါ်ဆန်မွှေး) tun khat ah kyat 150,000, Lungtuai hmui(လုံးသွယ်မွှေး) tun khat kyats 140,000 le Kanan Ayarmin(ကာနန်ဧရာမင်း) hi tun khat ah kyats 110,000 a si, tiah theih a si.
“T.S.O.(Sunflower Oil) chiti pung hme pakhat ah kyats 40,000 a phan i pung ngan pungkhat ah kyats 150,000 a phan. Hakha facang man le chiti man hi SAC nih kyats 20,000 ca an chuah hlan zong in a kaimi an um i an chuah hnu zong in a kaimi an um ve,” tiah Hakha ummi pakhat nih The Chin Post ah a chim.
Cu ṭhiamṭhiam in Hakha thil man cheukhat lakah a man a ṭum lei a panh lomi ah datsi hi aa tel ve. Datsi thawl khat ah kyats 2,500 – 3,000 kar a si i Gollon khat ah kyats 13,000 – 14,000 kar a phan. Nain cheukhat datsi dawr ah cun Gallon khat ah kyats 11,000 man zong a um, tiah theih a si.
Hakha thil man cheukhat lakah a herh bik tiin langhter mi facang, chiti le datsi man hna hi Hakha khuachung ah an zuarning aa khat cio lo caah hihi a dik bik, tiah The Chin Post nih kan fehter mi a um lo, buaktlak in kan ṭialmi a si. SAC ralbawizik Min Aung Hlaing nih Sagaing ramṭhen, Magway ramṭhen, Chin ramkulh le Karen ramkulh hna hi tlaih khih an har ngaingai tiin July 31 meeting ah a rak chim.
Cu ruangah Chin ramkulh hi zeitindah an hruai te lai, lam le sul phihkhamnak asilole thil man faak tuk in kaiter tibantuk ngian maw an hman te lai ti cu tualchung mi cheukhat nih an ceihphai mi a si. Hakha ummi cheukhat cu datsi le thil man a kai ṭhan lai ti thawng an theih caah an ngeihchun tangka in eidin tete a cawmi zong an um, tiah theih a si.
Hakha ah mifir nih inn an bauh i tangka an fir. Nizan July 31, Hakha khua, Leisen sang ah mifir nih inn an bauh i tangka an firpiak hna tiah kan theih. Inn ngeitu hna cu thlacamnak i an kal kar ah mifir nih an inn an bauhpiak hna. Inn zong tha tein an hrenh ta ko nain chun laipi ah mifir nih inn an bauhpiak hna hi a si i tang ka Kyats sing hnih an firpiak hna tiah kan theih.
“Hakha ah hin miphun kan i cawh tuk cang i mizei an si ti chim awk zong a tha ti lo. Hmailei ah mi dang zong i ralring cio hna sehlaw, kanmah zong kan i ralrinnak tu si hram seh,” tiah min langhter a duh lo mi inn ngeitu nih a chim.
Ralkap nih nawlngeihnak hramhram in an laak hnu in Hakha khua le hmun tampi ah fir le inn bauh tibantuk a karh i, Pyosawhtee tiah ruah mi pawl zong nih Hakha khua ah mi ramhnak tiang a chuak cang.
Kalaymyo Pengkomh Ah Kyats 20,000 Ca Hmankhawh A Si Lo Tiah PDF Nih Ralrin Pek. Sagaing ramthen Kalaymyo pengkomh chung ah mipi hna nih SAC cozah chuah thar mi Kyats 20,000 ca cu hman lo ding in an kham nak kong Kalaymyo pengkomh mipi hriamtlai phu PDF nih ralrin peknak thawng an thanh.
July 31 zinglei ah a thar chuak mi Kyats 20,000 ca cu dothlennak tuah tu phu nih a humhaknak chung ah luhpi lo dingin kham a si i a hmang mi le a luhpi mi kan in hmuh sual hna ah cun nan cung ah dan tatnak tuah dingin tinhtuahnak kan ngei tiah an langhter.
“Tuanvo kan i pek nak pengkomh kip ah kham a si. Hmundang cio zongah a tubantuk in an kham lai zumh a si, minung pakhat nih hi tangka a hman lio voi 3 kan hmuh ah cun upadi ning in dantat a si ko lai” tiah Kalaymyo pengkomh PDF tuanvo ngeitu pakhat nih a chim.
“Mipi sinin Kyats 20,000 ca a hmangtu kan hmuh sual hna ah cun a voi khat nak ah a tangka chuh in kan thleh lai, a voi 2 hnihnak ah ralrin kan pek lai i a voi thumnak ah upadi ningin dandat a si cang lai” tiah a chimchap.
SAC cozah nih Kyats 20,000 ca a chuah mi cu Bank, chawleh thal tuah mi le Non-CDM sin hna in a pek hna lai caah hi tangka cu mipi ralkap nih kan humhaknak hmun ah luh pi in hman khawh a si lai lo tiah thanhca chuah mi ah an langhter chih. NUG cozah zong nih a luan cia July 27 ni ah SAC cozah Center Bank nih Kyats 20,000 ca chuah ding cu kan co hlang lo tiah mipi sin ah thawngthanh nak a rak tuah.
SAC Ralhrang Le KIA Karlak Kahdohnak Ah KIA Hriamtlai Phu Chung In Nungak 1 Nunnak Liam. Kachin ramkulh Nam San Yang khua pawng KIA le SAC ralhrang karlak kahdohnak ah mipi hriamtlai phu chung in nungak 1 nunnak liam tiah KIA hriamtlai phu chung in ṭuanvo ngeitu pakhat nih a chim. SAC ralhrang nih Lawi Ai Lwin hmunhma KIA hriamtlai phu umnak hmunhma hi MI-35 helicopter hmang in hriamngan an thlak mi nih a khen sual caah asi tiah an langhter.
SAC ralhrang cozah hruairtu upa hna nih mipi hriamtlai phu an umnak hmunhma kip ah cunglei in hriamngan hmang dingah a thlah hna tiah theih asi. A bik in Laiza hmunhma (KIA/O) nih an humhaknak hmunhma hna hi rawk ding in aa hmuitinh mi a si tiah an langhter chih.
Mizoram cozah nih Manipur Ralzaam Caah Nuai 5 Hman. Manipur buai ruangah mah nunhimnak kawl in Mizoram ah a lutmi hna caah Mizoram cozah nih nuai 5 a pek tiah theih a si i, Centre cozah sin zong ah tangka a hal ko nain Centre cozah tu nih cun a pe duh lo tiah tualchung media hna sin in kan theih. Manipur in Mizoram ah a rak zaam mi hna herhhai caah Home Department nih an hal bantuk in Finance Department nih nuai 5 a pek cang tiah theih a si.
Manipur buainak a chuah in a ni 14 nak May 16 ah Mizoram Chief Minister Pu Zoramthanga nih Manipur in Mizoram ah a rak zaam mi hna bawmhnak caah Centre cozah sinah nuai 5 a rak hal, ralzaam a lutmi an i chap chin lengmang caah May 23 ah nuai 10 a rak hal. Bawmhchanh ding in Centre cozah cu chimh lengmang a si ko nain nihin ni tiang bawmhnak a pek mi a um rih lo.
Mizoram cozah nih a langhter ning ah Manipur buainak ruangah Mizoram ah a rak zaammi hi July 28 tiang ah 12,611 an um. An lak ah minung 9,382 hi relief camp ah an um i a dang minung 2,799 cu chungkhat sin le le inn hlan in khua an sa. Mizoram ah Manipur Chin ralzaam caah Relief Camp 38 ser a si. Aizawl District ah 13, Kolasib District ah 14, Saitual District 9 a um tiah Vanglaini nih a langhter. Credit: The Hakha Post, Lungmili Media