Min Aung Hlaing nih kan fimchimh cawnpiaktu an kan tuahto piak hna ning!!

NUG Sianginn Ah Ca Chimtu CDM Saya Cu SAC Ralkap Nih A Hngawng An Tan, A Hngawng Cu Innka Ah An Bah
=======================
Magway ramṭhen, Poah peng thlanglei Taungmyint(တောင်မြင့်) khuami pakhat cu SAC ralkap nih an tlaih hnu ah a hngawng an tan tiah tualchung mi nih an chim. SAC ralkap kut in thah a tongmi hi Titngyinaung(သစ်ညီ‌နောင်) khuami U Saw Htun(kum 45) a si i, a hngawng le a kut kee cu an tanpiak i faktuk in an thah hnu ah Taungmyint(တောင်မြင့်) khua sianglairuun innka ah an tanmi a lu cu an bah tiah tualchung mi nih an chim.

Private boder siangsangruun ah kum 15 tluk hrawng ca a chim cang mi U Saw Htun Moe cu SAC ralkap nih hramhram uknak an lak hnu ah CDM cawlcanghnak a tuah i ca chimh ai din nain, NUG nih a onmi sianginn ah ca chimtu saya a si tiah min langhter a duhlo mi tualchung mi pakhat nih a chim.

“October 16 ah khuachung ah SAC ralkap nih rallam an sial caah khuami cu i thuh in bawh dih a si, cu ah cun sayapa cu ralkap pawl nih mithaupa kan zul tiin an auh, CDM saya Saw Htun Moe cu a kut hnulei hri ṭem in an kalpi. Ralkap pawl nih cun meithal zong voi tampi an puah, lampi an hmuh mi hna paoh phone, an sui le an phaisa an chuh hna.

Zaanlei suimilam 3:00 hrawng ah Taungmyint(တောင်မြင့်) sianginn an khangh, meithal zong an puah caah khuami hna cu ramlak ah an zaam hna, cu ramlak ah cun saya Saw Htun Moe cu an thah” tiah Titngyinaung(သစ်ညီ‌နောင်) khuami pakhat nih BVJ ah a chim. Saya U Saw Htun Moe faktuk in thah a tonnak hmanthlak cu tualchung mi hna sin in ngah asi ko na in, mipi hmuhawk ah a ṭhatlo caah langhter a si lo tiah theih a si

SAC Ralkap Hriamngan Kahnak Ruang Ah Sianginn Ca Chimtu Sayamah Le Tualchung Mi Pakhat An Nunnak A Liam, Rakhine ramkulh Minpya(မင်းပြား) peng October 17, ah SAC ralkap nih hriamngan an duhnak hmunpaoh an kah caah ca chimtu sayamah telh in minung 2 an nunnak a liam, hliamhma tuar an tam tiah theih a si.

SAC ralkap nih umhmun an khuarnak Minpya(မင်းပြား) Kyein(ကျိန်း) tlang in hriamngan an thlahmi nih Taungshaungkyi(ထောင့်ရှောင်းကြီး) khua sianginn zaanlei chuah caan ah inn lei a tlungmi sayamah Mya Saw(kum 48) cu a khen caah a nunnak a liam tiah theih a si.

Cu hnu ah SAC ralkap nih hriamngan an thlahtuk caah Hpalaungpin(ဖလောင်းပြင်) khuami Ma Hla San Yin cu SAC ralkap hriamngan kahmi nih a khen ve caah a nunnak a liam, Ma Hla San Yi nih cun kum hnih tluk fanu pakhat a taantak tiah theih a si. SAC ralkap hriamngan thlahmi ruang ah tualchung mi pahnih an nunnak a liam leng ah minung 4 nih hliamhma an tuar tiah theih a si.

Relchap, ZRA Nih Mipi Hriamthil Nan Pek Ṭhanlo A Si Ahcun A Herhning In Hmanlaknak Kan Tuahlai-PDF-Zoland, Chin ramkulh, Tedim peng ah mipi hna nih an thlanti he an cawkmi hrianthil hna cu ZRA hriamtlai phu nih fir in an i zaampi, cucaah mipi sin ah an pek ṭhanlo a si ah cun a herhning in hmalaknak kan tuah lai tiah PDF-Zoland nih an thanh tiah theih a si.

October 14 ah Manipur tiva Mansaung hleidonh ah ZRA phu hna nih dohthlennak ding caah hmandingmi hriamthil a phurtu mino 2 cu an tlaih hna, cun an hrem hna hnu ah an hriamthil an chuh hna. Cu hnu October 15 ah Saizaang khuachung ah lut in khuami hna cu checkhlatnak tuah in lungretheihnak an pek hna tiah theih a si.

Khuachung ah buaibainak chuahter kan duhlo caah PDF Zoland mino hna khuachung an luh hlan ah, ZRA nih an chuhmi hriamthil cu pek ṭhan in khuachung in dai tein chuah ding ah phone in pehtlaih le chimhruah an si ko na in, an duhlo caah an hmanmi cycle cu chiatak in kee in an zaam tiah theih a si. An hmanmi cycle cu Tedim Public Administration nih an fim tiah theih a si.

ZRA phu hna nih an kaltakmi cycle hna cu Mansaung hleidonh um mipi hna sin ah chuhmi thil hna he nan van thlen khawh, mipi thilri nan lakmi nan pek ṭhanlo a si ah cun ZRA cu misual phu, SAC ralkap hmanrua tiin cohlan le hmalaknak tuah nan si lai tiah PDF Zoland nih ralrin peknak an thanh.

Tedim peng, Tonzang peng le Kalaymyo um ZRA phu thazaang a petu hna cu mi zei nansi hmanh ah, a dikmi dohthlengtu phu nih kan in veng hna lailo tiah PDF-Zoland nih an thanhmi ah cun an langhter chih.

Monywa Thong Inn Ah Poh-mah 505 In Biakhiahnak Tuahpiak Mi Hmundang Ah Ṭhial An Tong, October 17, chun suimilam 12:00 hrawng ah Monywa thonginn in poh-mah 505 he biakhiahnak tuahpiak mi thongtla minung 70 hrawng cu Myinchain thonginn ah an ṭhial hna tiah ṭhial a tong ve mi thongtla pakhat i a chungkhar nih an chim tiah theih a si.

“Kum hnih tla ding in biakhiahnak an tuahmi an si, a chuah lai ni zong a nai cang, a hohmanh theihternak tuahlo in hmundang thonginn ah an ṭhial hna. Kan hnu teah khan thongtla mi hna cu minung pakhat ah singthum an hal hna, cu lio i phaisa a pe kholo mi paoh hi ṭhialmi an si rua” tiah a chim.

Thongtla mi hna hi thonginn lei ṭuanvo ngeitu hna nih a lam kip in phaisa an hal tawn hna tiah thongtla chungkhar hna nih an chim. Phaisa a pe kholo mi hna cu fakngai in an hrem tawn hna, hliamhma an tuarmi i thlopnak sii an pek hna lo ruangah nunnak liammi thongtla zong an um tiah theih a si.

Pathein Ah Mino 20 Hrawng PDF He Pehtlaihnak Nan Ngei Ti In SAC Nih An Tlaih Hna, Ayeyarwaddy ramṭhen Pathein ah SAC ralkap nih October ni 14 thok in tualchung mino hna cu PDF he pehtlaihnak nan ngei ti in an purh dah hna ca ah an tlaih hna tiah tlaih a tongmi chungkhar hna sin in theih a si.

Tlaih a tongmi mino tam deuh cu pa deuh an si na in nu zong an i tel ve, cun anmah te in sii-inn a ong mi sibawi cheukhat zong an i tel tiah theih a si. Tlaih a tongmi hna cu Southwest Regional Command (အနောက်တောင်တိုင်းစစ်ဌာနချုပ်) ah an kalpi hna i checkhlatnak an tuah hna tiah kan theih nain a tutiang pehtlaihnak kan tuah kho hna lo tiah tlaih a tongmi chungkhar hna sin in theih a si.

Wundwin Penguk Zung Lutlai Le A Kuttang Minung Pahnih Rawl An Ei Lio Ah Thah An Tong, Mandalay ramṭhen, Wundwin(ဝမ်းတွင်း) khuachung ah SAC ralkap kuttang um penguk zung lutlai le a kuttang pa 2 cu rawl an ei lio ah kah an tong tiah theih a si.

October 17 chunhnu ah Wundwin(ဝမ်းတွင်း) penguk zung lutlai U Kyaw Moe Oo le a kuttang minnung 2 cu kan fimhlawm hna tiah Wundwin Township Revolution Force(WTRF) in chim phuannak nawl ngeitu nih a chim. Cu penguk bawi cu palik a rak tuan hnu ah penguk zungah ai ṭhialmi a si i, mipi nih pekmi thlahlawh ei in mipi a hremtu a si caah kan fimhlawmnak a si tiah Wundwin Township Revolution Force(WTRF) in chim phuannak nawl ngeitu nih cun a chim.

“Wundwin ah thil ṭhalo paoh tuah ding in nawl petu a si, penguk bawi le a kuttang minung 2 kah an si i 2 an thi, pakhat cu hliamhna tuar, hliamhma tuartu pa cu Meiktila sizung ah an kalpi ” tiah WTRF in chim phuannak nawl ngeitu nih a chim.

Natmauk Ah SAC Ralkap Le Tualchung Hriamtlai Phu Kar Kahdohnak A Chuak, Ralkap 4 An Thih Pinah Meithal 2 An Lak, Magway ramṭhen, Natmauk pengah SAC ralkap le tualchung hriamtlai phu kar kahdohnak a chuak i SAC ralkap 4 an thi, meithal 2 tualchung hriamtlai phu nih an lakpiak hna tiah theih a si.

October 16, zaanlei ah Beikthano(ဗိဿနိုး) hmunram tualchung hriamtlai phu hna le Natmauk- PDF phufonh hna cu dalan fimhlawm ding in an kal lio ah Hpattawye(ဖက်တောရေ) khua in a chuakmi SAC ralkap hna he hmaitonh in kahdohnak a chuak. “Kaphnih kar i kahdohnak minutes 20 hrawng an rauh hnu ah SAC ralkap 4 an thi, PDF in minung 2 nih hliamhma an tuar” tiah tualchung hriamtlai phu lei nih an chim.

October 17, ah SAC ralkap hna nih Hpattawye(ဖက်တောရေ) khua mi cu an tlaih hna i an hrem hna, checkhlatnak an tuah hna, inn pakhat zong an khangh tiah theih a si.

Paletwa ah eidin a va lami SAC ralkap AA nih an kah hna, Chin ramkulh, Paletwa peng October 14 zinglei ah eidin a lami SAC ralkap pawl cu AA nih an kah hna i kaphnih karlak kahdohnak a chuak tiah AA he aa naihniam mi nih DVB ah a chim.

Khawai tlang ah a ummi SAC ralkap 18 hrawng cu October 14 chun sml 2:00pm hrawng ah Abaungtha khua lei ah eidin an lak lioah AA nih an kah hna tiah theih a si. Kaphnih karlak kahdohnak sml cheu hrawng a rauh hnu ah SAC ralkap 6 hrawng an thi kho tiah AA he aa naihniam mi nih cun an chim. Sihmanhsehlaw kahdohnak kong he pehtlai in AA lei le SAC lei nih zeihmanh an thanh mi a um rih lo.

Kalay-PDF No.4 Battalion In Ralkap Pahnih Nih Ram Le Miphun Ca ah An Nunnak An Pek, Kalay-PDF No. 4 Battalion in ralkap Aung Than Sein, pumpak No. P12104260 le ralkap Thu Rein Soe, pumpak No. P12104264 hna nih ram le miphun ca ah an nunnak an pek, tiah Kalay-PDF nih cathanh an chuah.

PDF-Kalay No. 4 Battalion in ralkap pahnih cu, an biakam bantukin hranhram uknak doh in Federal Democracy ser nakding ca ah ralhmun pakhat ah ral an tuk cuahmah lio, 2022 October 11 ah an nunnak a liam hi a si.

Atu bantuk in ram le miphun le mizapi ca ah nan nunnak nan pekmi cungah No.4 Battalion nih upatnak kan in pek hna. Nan tantaak mi nan chungkhar zong an ngaihchiahnak kan hrawmpi hna, tiah Kalay-PDF No. 4 Battalion nih cun cathanh an chuah.

Shwe Bo Ah SAC Ralkap Motor Le Cycle Cu Bomb Puahhnawh An Ton Caah Ralkap 5 An Thi, Sagaing ramṭhen, Shwe Bo pengah SAC ralkap an i citmi motor pakhat le cycle 5 cu bomb puahhnawh an ton caah SAC ralkap le pyusawhti 5 an thi, tiah theih a si.

October 15 zanlei sml 2:30 ah Palai khua ah umhmun khuarmi SAC ralkap le pyusawhti cu, Shwe Bo in Palai khua lei an kal lioah Chipar(ချီပါ) khua le Metaw(မဲတော) khua kar ah PDF nih bomb lung 8 an puahhnawh hna caah SAC ralkap 2 an thi.

October 15 zanlei sml 6:30 ah Palai khua in Kunseih khua lei ah cycle 5 in a kalmi SAC ralkap pawl cu bomb lung 8 in an puahhnawh ṭhan hna caah SAC ralkap le pyusawhti 3 an thi i 4 hliamhma an pu, tiah theih a si. Cu bomb puahhnawhnak ah Thidi Shin PDF, Golden Triangle PDF Companny, Shwe Min Thar PDF, Lightning Storm PDF, Shwe Freedom Force le a dang PDF phu 7 hna i bawm in an puahhnawh hna, tiah theih a si.

Uganda Ramah, Ebola Zawtnak In Minung 19 An Nunnak A Liam Cang!, 2022 September 20 , Ebola zawtnak a chuah hnuin, minung 19 an nunnak a liam cang i minung 58 sinah zawtnak hrik an hmuh hna tiah Uganda ngandamnak lei zung nih October 15 ah an thanh tiah theih a si.

Uganda President Yoweri Museveni nih Ebola zawtnak kham khawhnak ding caah pengkomh 2 cu zarhthum chung lockdown a chiah i cu zawtnak cu zeitindah ai thok timi a hrampi kan kawl lai tiah a chim. Biakinn, dawr, bar ti bantuk pawl zong an khar dih i, Mubende le Kassanda pengkomh pahnih cu ni 21 chung lockdown an chiah tiah theih a si.

Mizoram Ah Nawlngei Bik Phu CYMA Le CYLA Hruaitu Hna Cu Chin Kum Thar (Tho) Zawh Dingah American Ram An Phan, India ram, Mizoram ramkulh ah rumra ngei bik le nawlngei bik phu a simi Central Young Mizo Association-CYMA, Central Young Lai Association- CYLA hruaitu hna cu Chin kum thar va zawh dingah American ram an phan cang, tiah theih a si.

CYMA Chairman Pu Lalhngeta Ralte, chungṭuan Professor Malsawmliana le CYLA Chairman Pu HC Ruatpuia cu, nizan October 16 ah American ram Indianapolis dam tein an phan, tiah theih a si. CYMA le CYLA in hruaitu pathum hna cu a ra laimi October 22 ah tuah dingmi Chin Kum thar zawh dingin Chin Association of Maryland nih an sawm hna hi a si.
A hlan zong ah Mizoram ramkulh, fimcawnnak zung palai zong American um Chinmi nih an rak sawm bal cang.

CYMA phu cu Mizoram ramkulh khuapi le khuate ah chungtel an um i, Mizoram ramkulh chung ummi mino paohpaoh cu CYMA chungtel in an um dih. CYMA nih Mizoram ah ralzam dirhmun in ai dormi Myanmar rammi hna cu a lamkip in an bawmhchanh hna, tiah theih a si.

Matupi Head Of Education Kah A Ton Hnuin, SAC Nih Matupi Khuachung Ah Checkhlatnak An Tuah!, Chin ramkulh, Matupi ah nizaan October 16 zaan suimilam 8:25 ah head of education U Tin Luai cu a inn chungah kah a tong i a hmunah a thi.

Thah a tongmi U Tin Luai cu, a luancia 2019 lioin head of education rian a tuan. SAC ralkap nih hramhram uknak an lak hnu zong ah CDM tuah loin NON-CDM in a ummi a si tiah theih a si. U Tin Luai kah a tonnak kong he pehtlaiin nihin October 17 zingka tein, SAC ralkap nih Matupi khua chung i mi choklet hna cu checkhlatnak an tuah hna i, lam ai tonnak hmunkip le lam kilkawi kip ah, gate an chiah caah khuami cu thinphang in kan um ko tiah Matupi khuami pakhat nih a chim.

Kyainseikgyi ah Infantry 32 cu Drone in bom an thlak hnawh hna i an inn pawl a rawk, Lieutenant 1 le adang pakhat an thi, Karen ram, Kyainseikgyi peng ah hram a bunhmi Infantry 32 tual chungah Drone in bom an thlak hnawh hna i Lieutenant pakhat telh in Lt. Sergeant Kyaw Sua Moe an thi i an inn pawl a rawk tiah thawng theih a si.

October 16 zinglei sml 1:41am hrawngah Red Dragon phu, KNLA phu le FEDERAL WINGS phufonh hna i Kyainseikgyi khua Infantry 32 tual chungah Drone in 81 MM le 60 MM hna an thlak hnawh i Captain 1, Sergeant 1 le adang ralkap 1 hna an thi tiah Red Dragon phu nih a thanh. Ralkap leiṭang thawng pawl nih cun ralkap pawl an thih lengah inn pawl a rawk i rianrang in an remh tiah an ṭial.

Tamu kahdohnak ah sing 200 hrawng man hriam an sung, PDF pakhat aa hliam, Sagaing ramṭhen, Tamu khua chuahnak meng 4 ah kahdohnak chungah PDF pakhat aa hliam i sing 180 leng man 81 meithal 1 kan sung tiah Tamu PDF sin in October 13 ah thawng theih a si.

“SAC ralkap pawl zaan tein an i thuh cang kha thawng kan theih. Anmah lei nih hriamngan in an kan kah hmasa. Kahdohnak chikhat a chuak. Hliam a tuarmi pakhat kan phorhnak le an kah tuk caah 81 hriam pakhat kan phor kho ti lo i kan chiah tak” tiah Tamu PDF rian ngeitu nih DVB ah a chim. Tamu peng ah SAC ralkap nih Internet a phihnak hi thla 6 hrawng a si cang tiah theih a si.

Dawei-Myatta lam cungah SAC ralkap mawṭaw 7 an kah hna, ralkap 15 nak tlawm lo an thi, aninthary ramṭhen, Dawei peng, Tinkantone khua le Wakone khua karlak ah SAC ralkap mawṭaw cu October 14 ah an kah hna i SAC ralkap a thi mi le aa hliam mi an tam kho tiah Dawei Information Center nih a thanh.

October 14 zaanlei sml 4:45pm hrawngah Myatta khua lei ah a kalmi SAC ralkap mawṭaw 7 cu PDF phufonh nih an kah hna tiah DEE-PDF phu nih an thanh. “Hmunhnih ah kan i ṭhen i kan kah hna. Kahdohnak sml 1 hrawng a rau i SAC ralkap nih hriamngan an hman caah kan kir ṭhan” tiah PDF chungtel pakhat nih Khit Thit ah a chim. Cu kahdohnak chungah SAC ralkap 15 nak tlawm lo an thi i tampi an i hliam tiah an langhter. Cu SAC ralkap mawṭaw cu Kaw ThooLei Army, DEE-PDF, DGRF, Dawei pengkomh PDF phu 6 nih an kah hna tiah theih a si.

Dawei le Bilin ah SAC ralkap le pyusawhtee pawl an kah hna, 16 hrawng an thi, October 15 zinglei sml 4:10am hrawng ah ke in a kalmi SAC ralkap pawl cu meng 8 dum le Uhyin khua karlak ah Dawei peng hriamtlai DDT nih an kah hna i 15mins tluk kahdohnak a chuah caah SAC ralkap 5 an thi, tampi an i hliam tiah theih a si.

Kahdohnak a chuah hnu October 16 zinglei ah mipi hriamtlai phu pawl nih hmunhma an va zoh ṭhan i 60MM hriamngan 2, M16 kuan 74 hna an lak khawh tiah theih a si.

Taninthary ramṭhen, Launglon peng ah pyusawhtee 1 an kah tiah LLPDF nih an thanh., Pyusawhtee Htun Naing cu Oct 15 ah LLPDF nih an kah i a thi. Amah sin in lai meithal 1, fung 1, WY rithai sii 25, phone 2, tangka 3,000 hna an lak khawh.

Cun Mon ram, Bilin peng, Daukyet khua pawng October 15 chun sml 3:30pm hrawng ah Kyaikto in Thaton lei ah a kalmi SAC ralkap mawṭaw 14 cu KNLA phufonh nih bomrap an puah hnawh hna i 10 nak tlawm lo an thi tiah thawng theih a si.

Video zohnak-

[/vide