Uknak Laak Hnu Kum Thum Chung Ah Rian Ngei Lo Minung Nuai Hnih Tluk An Um!
====================
SAC nih hramhram uknak an lak 2021 in 2023 tiang ah rian ngei lo mi cu zatuak 3.52 tluk in an karh, tiah SAC kuttang um Ministry of Labor nih 2022-2023 chung rian ngei cazin an langhter i, rian ngei lo mi hi minung nuai 2 tluk deng an um, tiah theih a si.
SAC nih uknak a lak hnu 2023 kum chung ah rian ngei lo mi hi zatuak 3.69 tluk an si i, NLD cozah chan lio 2020 ah cun rian ngei lo mi hi zatuak 0.17 an si. Rian ngeilo mi hi zatuak 3.52 an karh, tinak a si. SAC ralkap nih hramhram in nawlngeihnak an lak kum 2021 ah cun rian ngei lo hi zatuak 1.33 an si i, 2022 kum ahcun zatuak 2.53 an si, tukum 2023 ah cun zatuak 3.69 tiang a phanh caah rian ngei lo an tambik kum zong a si.
Ramchung ah rian ṭuan ding a har caah pawcawmnak ruah ah ramleng chuak zong an tam. 2020 in 2023 tiang rianṭuan ding in ramleng a chuak mi hi zatuak 1.35 an karh, tiah theih a si. Ramleng chuak mi hna chung ah hin a tam bik hi kum 15 in kum 19 kar an si i, kum 40 in kum 44 kar hi cu a tlawm lei an si, cu chung ah a tam deuh cu pa an si, tiah The Irrawaddy nih a ṭial.
India ram, ramkulh pahnih ah cun nikhua a linh tuk ruangah a luancia ni tlawmpal ah khan minung 96 an nunnak a liam, tiah ṭuanvo ngeitu hna nih an chim. Nunnak a liammi hna hi Uttar Paradesh ramkulh le Bihar ramkulh in an si. Nikhua a linh tuk ruangah kum 60 cung upa hna cu leng chuak lo ding in nawlngeitu hna nih ralrinnak an pek hna.
Uttar Pradesh ramkulh chung ah nunnak liam mi dihlak hi 54 an si i, an dihlak in Ballia district chung mi an si hna. Nunnak liammi hna chung ah tam deuh cu kum 60 cung upa le a ngandamnak a ṭha lo mi an tam, tiah ṭuanvo ngeitu hna nih an chim. Khualinh ning hi 43°C tiang a phan.
Bihar ramkulh chung zong ah a luancia ni hnih chung ah khan khualinh ruangah minung 42 an thi i, khualinh ning hi 44.7°C tiang a phan. Khua a linhsat ruangah ti zong a har i, minung nuai renglo cu din awk ti kong ah harnak an tong, tiah The Guardian nih a ṭial.
Mawlamyaing hrambunh Southeast region(nichuah thlanglei) SAC ralkap headquarter uktu ralbawi, General Myat Thet Oo cu a rian in an dinhter i, Lao People’s Democratic Republic(Laos) Ambassador ah SAC nih June 17 ah an thim, tiah theih a si.
2022 August ah nichuah thlanglei SAC ralkap headquarter uktu ah an rak thimmi General Myat Thet Oo cu 2023 March thla ah a rian an thlen i, Naypyidaw ah chekhlatnak an rak tuah, tiah theih a si. Cu hnu ah General Myat Thet Oo cu a rian in an dinhter i ramdang palai zung ah Laos-Myanmar Ambassador rian an pek.
SAC ralkap Regional Headquarter pakhat uktu rian cu dinhter in ramdang palai an ṭuanter mi hi dantatnak phunkhat a si, tiah CDM ralbawi cheukhat nih an chim. SAC ralkap sianghleirun DSA 38 in a dihmi General Myat Thet Oo cu SAC nih nawlngeihnak an laak hnu in Myigyina khuapi hrambunh chaklei headquarter uktu rian an rak pek i, 2022 August thla ah nichuah thlanglei SAC ralkap headquarter uktu ah an rak thlen.
Nichuah thlanglei headquarter uktu rian thla 7 chung a ṭuan i, 2023 March thla dongh ah a rian in an dinhter ṭhan. Hi kong he pehtkai in CDM ralkap hna nih cun, Karen ramkulh kahdohnak ah teinak a hmuh lo caah an dinhter a si lai, tiah an zumh.