Moebye Pawng Ah Mipi 26 SAC Ralkap Nih a Bu In An Thahnak Kong Kan Cohlang Lo Tiah An Thanh
==========
Shan ram thlanglei, Moebye pawnghrawng ah SAC ralkap nih June 6-8 tiang ah mipi 26 a bu in a thahnak hna kong ah fak pin in kan cohlang lo tiah NUG Ministry of International Cooperation nih June 14 ah a thanh.
SAC ralkap pawl nih June 6-8 chung ah Moebye khua chaklei pura pawng ah khuami 14 a bu in a thah hna i Moebye pawng ah SAC nih Motor in a kah ruang sh minung 12 thi tiah theih a si. SAC ralkap nih an kah mi mipi 6 hna ruak cu Shan khuami hna nih an hmuh i adang ruak 5 zong lak ṭhan an duh ko nain SAC ralkap nih an tlerh hna caah an la kho rih lo tiah theih a si.
Cun a luancia zarh 2 chung ah, SAC ralkap hriamngan ruang ah mipi 12 an thih leng ah 20 hliam an tuar tiah an langhter. Cucaah atu bantuk hramhram in mi thahnak kong he pehtlai in a bawntu zeibantuk phu hmanh tuanvo lakter nan si lai tiah an langhter.
2023 Kum Hramthawk Thla 5 Chung Ah Mipi Inn 20,000 Leng An Khangh; 2023 January in May thla dongh tiang Myanmar ramchung mipi inn 21,353 SAC ralkap nih an khangh tiah Data For Myanmar nih June 15 ah a thanh. Thla 5 chung ah an khangh mi inn hi 2021 kum 1 chung an khangh mi inn (1,946) nak in a let 11 deng in a tam deuh.
2023 Thla 5 chung ah Sagaing ramṭhen chung inn 16,635, Magway ramṭhen chung inn 1,840, Chin ramkulh chung inn 164 SAC ralkap nih an khangh i Rakhine le Shan ram chaklei dah ti lo, adang hmunhma vialte aa tel dih. Sagaing ramṭhen, Magway ramṭhen le Chin ramkulh hna hi hramhram in uknak lak a si hnu 2021 thawk in 2023 tiang mipi inn a tam bik an khanghnak hmunhma a si.
Monywa University Ah Hmunhma A Khuar Mi SAC Ralkap Kahdohnak Ah SAC Ralkap 3 An Thi; Sagaing ramṭhen, Monywa khua, Technology University ah hmunhma a khuar mi SAC ralkap pawl PDF phufonh nih an kah hna i 3 an thi tiah Golden Eagle Force – Monywa nih a thanh.
June 14 chun sml 1:00pm hrawng ah Monywa University ah hmunhma a khuar mi SAC ralkap pawl PDF phufonh nih an kah hna hi a si i gate a hngak mi 4 chung ah 3 an thi tiah an thanh.
Kahdohnak chung ah sianginn chung dot 3 in an kan kah PDF 1 a lu ah kuan nih a hneuh tiah an langhter.
Golden Eagle Force – Monywa le Red Star Front, Pungna Guerrilla phu, God of Monywa People Defense Force le Tawce Guerrilla phu hna fonh in kahdohnak an tuah hi a si tiah theih a si. Crd;The Chinland Post