“Min Aung Hlaing cu a thirh in a thirh cang” nan hei ti. A thirh nemmam lo

Hiti bak hin tongh kan duh hna eh….
========
Hohmanh thinhun lo tein, si lai. Biatak chim ko ahcun, “nan tei bal lai lo”. Nan icawngia tuk palia i teinak a hmu dingmi nih an icawngia tuk palia bal lo.

Meithal kan zal lai tiah vawlei pumpi theih dingin zoom nan thlah. Video camera drone nan izalh le vawlei pumpi theih in nan icawngia. Vanruang Thilzun ti phun nih vanlawng kahnak kan caw lai an ti i vawlei pumpi theih dingin an ithanh; an iZoom cu rel cawklo in an hung pawt tawn.

“Min Aung Hlaing cu a thirh in a thirh cang” nan hei ti. A thirh nemmam lo. A nih nan chuak taktak lai. Dohthlennak cu icawngia le ithanh tuk palia rian si lo; a thup rian si deuh. Dohthlennak tuah loin marketing tu nan tuah i si kho lo.

Dalaan ti i dalaan tak maw tak lo hliah tak lo i a lu hei hloh. YGN in pei buluk nih an awnh hnawh peng ko hna khi. Nan thangchiatnak, nan santlaihlonak rumro in a awn pengmi hmanh a tawlrel kho lo pawl i rampi pakhat kum 70 chung a thawtnak a tit le a sa vialte a ei dihtu Sahrang Phu kan tei lai ti cu, mang lawng ah si kho lai.

Imaa ziar uh! Nan hrawh ciami pawl tu remh izuam ulaw ṭha lai. Tei lo dingmi Sahrang cu va teer leen ti duh hlah. Mipi le ram caah fahnak nan tuarter chin lehlam.

Nan Lung Dong Hrimhrim Hlah Seh! Korea Kawl community ah an upatmi caṭialthiam Saya Win Paw Maung nih nihin a cathlahmi pakhat ka hmuh. A tanglei hmanthlak khi an si. Korea nichuahlei khua pakhat i primary siangngakchia pawl nih an hruk-aih zuar in fund an kawl. Cu an thil zuarmi in an hmuhmi phaisa dihlak cu Kawlram dohthlennak caah an pekchanh hna, ti a si.

An pekchanhmi phaisa zat cu Korea phaisa won in sing khat te khi si. US $ 100 tling deuhvak lo. Cu ngakchia pawl nihcun an hlutmi phaisa pekchanh pah in “절대 희망을 버리지 마세요” tiah thapeknak ca an ṭial chih. A sullam dikthlir ning tak cun, “Nan ruahchannak Hlonh hrimhrim hlah uh” ti khi si. Nain, Korean holh cu miphun dang holh in van leh tikah, mah context a kalning khin leh an hau. “Nan lung dong hrimhrim hlah seh!” ti khi si ko.

Ralkap uknak chiahru a rak tuar balmi miphun an si ve tikah, Kawlram caah an kan siaherh bak. Ngakchia pawl nih ningzak lo tein anmah thinlung um-ek le si khawh tawk in an izuammite khi izahpi lo tein an chuahpimi khi uar um ngai. Cucu Jesuh zong nih a rak cohlanmi thawhlawm phun a rak si i, mitluang mifim hna cohlan duhmi dawtnak phun zong si fawn.

CNF ca i phaisa khawltu pawl phaisa rak hal tawnning he tuakchun ah cun, ningzak taktak khi kan si. “Na zanglu, na nu chu, na sian zong sian lo zongah phaisa thawh” ti phun he an ikhat. Pakhat pa nih tlawmpal a van thawh hnga i a thawh rih lo ti a theihmi pa khi, bianeek in a tongh colh hnga. Mi cung cuannak ah an hman.

Tutan CDF chan a phan. Aa ning ngai cang nain, kanmah bon ah kir ṭhan aa tiim. Thawhmi phaisa an tawlrel ning pawl a dik maw diklo kong khi cu va um rih seh, phaisa haltu pawl hrimhrim khi le “dohthlennak caah kei cu ai pumpemi phu lei ṭang ka si” aa titu cheukhat pawl bia le hla khi celh chuak an rak si tawn lo. A bo in an bo i a ngalh in an ingal.

CNF cu, a min cun, Chin miphun huap rak timi si nain, a ram a rak bii chin lengmang i a dongmarawt ah cun, a biapi cun, Thantlang peng deuh lawng nih bawmhchanhmi phu ah ai chuah. Minung pakhat nih $ 5,000 a thawhmi nakin, minung 5,000 nih $ 200 cio an thawhmi a let in a tam deuh ti theih a hau. Cucu business a thiammi nihcun hmuh khawh ding khi si nain, Laimi cu business thiam kan um lo hraat i mi sopaw pawl lawng kan tam.

Cun, Korea ngakchia pawl nih Won ting khat te he “Nan lung dong hlah uh” an kan ti ngam nain, Laimi (Kawlram mi) $ 10,000 thotu nih “nan lung dong hlah uh” iti ngam ding si men lai lo.

Zei ruangah? Annih cu an phaisa neh dawitu a chekhlat phu an um chih zungzal. An phaisa nih rian a ṭuan tak maw tak lo zohfeltu an ngei. Cucu miphunpi si khawh venak dingah a biapi taktakmi a si. Khi ngakchia pawl bia khin “Nan lung lam cu dong hlah seh!” Nain, “iceer hmasa deuh le ivirhkhoih hmasa deuh zong a herh chih” ti in beet chih ka duh hnga ta. Cu vial seh..van beet ve tuah ulaw. Credit: Salai C Alexander