Mi thihnak kong ah mi thawsawh nan hmang fawn. Nan rumnak le phaisa in mi nan soilem hna!

Apa Nakin Upa Deuh Aatimhmi Popular Aduh Tukmi Chinmi Cheukhat
=========
Phuntungtu le Ramdawtu Chin Mino hna cu Zeizong vialte kaltakin, Hriam tlaih in, sifah harsatnak phunzakip tuarin, Ralhrang MAH le Rallokap cu andoh. Polpuar le Minthang lawng aduhmi Chin mino hna cu khuapi ah, nuam ngai in khua ansa.

Rangoon khua ah nuam ngai ngai in an tlawnlen. Acan ah ramdang an kal pah. Bar le Night Club ah kal in, deilei Nazi 4 tiang an thu khawh. MAH ruangah Kawlram sipuazi arawk dih cikcek. Rian loin tampi um asi. Tirawl loin a ummi hi, Kawlram milurel, hnarcheu nakin a uak deuh saumau. Pawcawmnak caah, Rangoon Sipuazi cu Nuthalo aazuar mi an tam. Chinram kadaw ve aati mi Chin Mino Cheukhat cu; Bar le Night Club ah kalin, Cu Nu Tawzuar hna he zan khua dei an i nuam khawh.

Facebook le Social media ah a laar ngai mi an si caah, likes le followers an tampi i, an capar share tu zong an tam caah, phaisa tampi an hmuh. Sipuazi thatuk mi ah aacang. Cu an rumnak cun; Nuthalo Kawlnu hna he zan khuadei (Nazi 4 tiang), nuamnak ah an hmang ko. Remittance le Money transfer Service (Ngwe Hlway – Phaisa kuatnak rian) cu Tax piasen hmanh pek loin an tuan. Minthang le Popular siduh ruangah, mi sifah cheukhat cu an ngeihchia tampi chung in, relcawklo lakin, pelte an hei bawmh ve tawn hna.

CDF le CNA thangchiatnak caa an tial ko ahhin likes, followers le share atam caah phaisa a lut khun. CDF nih Teinak an hmuh tikah ciato in Chinram hruaitu si kha an chunmang lianbik asi fawn. Chin Vuanzichu si ka duh tiah an ti rih. MAH cu ankaa le Cabia in Uicopa an i ti ter. Lungtakin MAH adoh ve mi sik ko ahcun CDF he lungkhat awkhat thinkhat si aherh. CDF thangchiat in, MAH kadoh ticu arai asilo. Upa lungfim lungput le ramdawtu hna ziaza asilo. Pasal lungput zong asilo. Nudawk padawk ziaza le lungput.

Hakha Thantlang meithal nan puak ni cu Rangoon in kan kai ni nanti. Nipidaw, Mandali, Rangoon le Kawlram khuapi hna ah, raltuknak biatak tein a um lawng ah kan kai cang lai nanti hoi cang. Depde zia, Zozer zawngzer zia bak siko.
David nihcun, Ka mihna ral an doh lio ah khim tein ka ei khawh lo i ti dinh zong ka duhlo ati. Maw Bethlehem cerhti kha din ka va duh dah tiah achimh thawng a theihmi Ralkap pahnih nih, cu TI cu an va than. David nih kan phunhawi raldoh lio ka din khawh lo tiah a elh hna.

Kannih cu asilo. Thih le hnai he kan um, lu lo hna in kan i phum, khualipi a ciam dih, khuami hna riaklang va bang kan vakvai, Zion ngai in kan tap i kan hrum riangmang, Innhliam kung Tintang bahin Zion Khuailipi le Pennak ngaih in Nithla kanrel. Cucu nan i thawh riangmang i, CDF, CNA soisel le thangchiat ah nan i lak i nan tlo ngai ngai. Yangoon khua ah duh tawk nan i chawkvai, Singapore hna nan kal salam. London ka kal lai nan ti rih. CDF tuanlo ding in, USA le Aussie ah Student visa tuah in Sipuazi nan kawl rih.

Mi thihnak kong ah mi thawsawh nan hmang fawn. Nan rumnak le phaisa in mi nan soilem hna i, CDF, CNA doh awk ah nan khawmsuat hna. CDF dohnak capar tial le an mualpho kha adikmi le Justice ah kan tanh tiah uarthlar ngai in nan um. Ceihngia zia asi hi nan theih rihlo. Methal, Vainam le Bomh hi sorry aumlo hi aw, na ka pauh tuk in le kutdong rang tukin khuasa ti hlah uh. CDF tu ah hung kir ve cang uh.

အဖေထက်သားတစ်လကြီးချင် timi tuanphung nan zulh ko nain, Hrintupa nakin upat deuh khawh asilo. Ramkhel le ramrian ah Level sangbik CDF, CNA nakin popular deuh le cungnung deuh i timh cu nan i palh bakko. Kan ram a that ve te tikah, CDF hnu zulhtu le an zal puttu na si lai zong thazang lak cia cio ve ding ah kan sawm hna. Mi kut in rutlaih aatimh i, Ciato derhhmun in Uktu si aduhmi, Vokpi le Uite lokal aduh tukmi, popular le minthang lawng aduh mi, Chinmi, Chin Mino, Chin Politicians vialte sinah, Tarpa Zan Bia in caa kankuat hna. Credit: Joseph R. Thang