Maw…Hakha, Chinram khuapi, na chung i a ummi, midam lo hna le, nuhmei pahmei hna!

A MI HNA HARSATNAK AA HRAWMMI PROFET ELISHA
=============
Profet Elisha cu a mi hna nih harnak an ton ahkhan a zaam bal lo. A mi hna harsatnaktu kha aa hrawm i an sin te ah aa benh peng ve! Profet Elijah kha cu a mi hna harsatnak i hrawm loin, an sinin a zaam lengmang caah, a nun si a vang i nun hmanh huam loin a thihnak hnga tu thla a cam diam!

Profet Elisha cu Moad siangpahrang Mesha le Israel mi hna i tuk dohnak ahkhan a mi hna sinah a kal ve! Israel ralkap hna nih harnak an tong i profet cu thlacam an fial. PATHIAN bia a ra i teinak bia kha a phuan! PATHIAN bia a phuan bantukin Moad siangpahrang Mesha cu an tei (2Siang 3:9-19).

Profet Elisha cu a mi hna raldohnak kong ahkhan, dirkamhtu le bawmtu țha a si i lam hmuhsaktu țha a si (2Siang 6:8-25). Siria ral nih Samaria khua an dum ruang i mangțaam faak a tlun tikah, a mi hna kha a zaam taak hna lo. A mi hna sifah harsatnak vialte kha aa hrawm ve i, Safe bangin fek chinchin in aa benh!

Samaria khua in ahohmanh zaam a fial hna lo i a zaamter fawn hna lo, BAWIPA a cawlcangh ding kha a hngahpi hna. Velngei BAWIPA PATHIAN zaangfahnak kha an hmuh i luatnak nganpi kha an hmuh (2Siang 7:1-20).

Maw… dawtmi Chinram, maw… dawtmi ka miphun, hi tluk i ka miphun nih harsatnak nganpi na tonmi tuarpi loin, zaam taak awkah ahodah ka si? Kan zaam taak lai lo, kan zaam taak kho lai lo. Na inmi ka in ve lai i na tuarmi ka tuar ve lai. BAWIPA thawngin teinak le luatnak na hmuh hlan tiang chun zan thlacam kan dai lai lo.

Maw…Hakha, Chinram khuapi, na chung i a ummi, midam lo hna le, nuhmei pahmei hna le, sifaak santlai lo hna le, miderthawm hna le nu nau tete hna hi ka zaam taak kho hna lai lo. Na harsatnak hi kaa hrawm ve lai i na inmi ka in ve lai.

BAWIPA khamhnak na hmuh hlan tiang kan chuah taak lai lo i Jerusalem khua ah, pentecost ni i THIANG THLARAU Mei a rak tlun bang na cung i THIANG THLARAU Mei a tlun hlan tiang, BAWIPA bia indah ti lo kan chuah taak lai lo.
BAWIPA aa bochan i AMAH MIN bochan in khuachia ral a dohtu vialte cungah, BAWIPA Țhawnnak le Lam hmuhsaknak le Daihnak um ko seh. Amen.

KAN FALE HNA THISEN AU THAWNG; Kan fale thisen, au thawng hi a thang tuk e! Li bangin a hninh in a kan hninh ko! A hna a chehter lomi nihcun an theih ko. Kan fale nunnak thisen le Lai lungrawn khua i mitthli le țahhramnak aw thawng hna hi, BAWIPA nih a theih ko, tluk-rualnak le dinfelnak theipar ah, cangte selaw tiin ka thlarau cu a hrum i, ka mitthli zong nih a ti ve! Ka nunah a langmi cu, “Cung PATHIAN nih a theih ko, Lai a rel te ko lai,” ti hi a si.

Nihin, BAWIPA pekmi kan pulpit cung i kan fale hna thisen au aw hi hodah aa theih ter lo ngam? Thingin sermi pulpit cung i aupi mi a si ti lo. Mino, kan fale thisen pulpit cungin, miphun dawt le Dinfelnak le Tluk-rualnak cu au pi a si cang!

Cucaah, Chinmi, khuanu khuapa, mifim mirum, ngaknu tlangval, ram cung ram leng a ummi kan dihlak in, kan ram chungah miphun Dawtnak le Dinfelnak le Tlukruannak a um khawhnak hnga, lungrual in țan caan a si cang. BAWIPA rianțuantu vialte nih, kanmah sualnak, kan chungkhar sualnak le kan miphun sualnak phuangin, BAWIPA cu au lengmang hna usih.

Atu caan hi kanmah caan a si. Kan cawl caan a si. Nan lung dong hlah u, zeitintiah, hi dohnak hi BAWIPA ta a si. Teinak petu cu BAWIPA a si. KHRIH Lamkaltu, Tluang Lian (Martar)