Matupi ah ralkap le palek nih Bapist Mino pastor pa telh in minung pahnih an tlaih hna

Matupi ah ralkap le palek nih Bapist Mino pastor pa telh in minung pahnih an tlaih hna
====
Matupi peng khuate thanchonak zung riantuam SAC minung pakhat le Baptist khrihfabu mino pastor pa cu ralkap le palek nih 2021 March 10 zaan ah an tlaih hna tiah kan theih. An tlaih mi hna kong he pehtlai in khuami pakhat nih, “An tlaih hna hi suimilaam 9:00PM tluk ah a si men lai. Lam an kal lio ah an tlaih mi hna an si. Thawng kan theih ning ah an mah pahnih lawng si dawh an si lo. Pastor pa hi cu biakinn in a kir lei ah an tlaih. An tlaih mi hi tam pah dawh an si,” tiah a chim.

Tuzaan Matupi tlaih a tongmi hi minung pali hrawng an si lai tiah khuami nih an zumh. Minung pahnih cu tlaih an sinak a fiang cang nain pahnih tu hi cu aa fiang rih lo. Ralkap nih uknak a laak hnu Chin Ramkulh chung ah tlaihkhih a tongmi dihlak hi Minister le thimnak zung riantuan an tlaihmi hna telh in minung 70 an si i a tam deuh cu an thlah than cang hna.

Relchap, Thantlang ah ralkap nih Cung Bawi Lian cu CDM a tuahmi ralkap he naa pehtlai tiah an tlaih. 2021 March 10 zaanlei suimilaam 6:00 tluk Thantlang khuapi chung ah ralkap nih Cung Bawi Lian an tlaih tiah theih a si. An tlaihmi kong he pehtlai in Thantlang khuami pakhat nih, “Atu an tlaih hi zaanlei suimilaam 6:00 hrawng ahkhan a si. An tlaihnak a ruang hi pawngkam minung nih an chim ning ahcun, “Tunai Thantlang ralkap CDM a tuahmi he nan i pehtlai,” ca an ti tiah an chim. Biafiang cu kan thei ve rih lo,” tiah a chim.

An tlaih mi Salai Cung Bawi Lian hi Thantlang khualuhnak hauka Laipawng lung i dawr a hngak mi a si tiah kan theih.
Atu hi Thantlang mino minung 90 in 100 kar i pum in kan thlahpiak uh ti hal ding in palek sakhan lei ah an kal lai tiah kan theih. Credit: The Hakha Post