Manipur Cozah Nih Chin Ralzam 700 Renglo Khirh Dingin Nawl A Pek Hna
=========
Tamu peng chung kahdohnak ruangah Chin miphun ralzam minung 718 hna cu Manipur ramchung ah an lut ti an theih caah mah hna pawl cu khirh than dingin ramri hngak mi ralkap pawl cu Manipur cozah nih nawl an pek hna tiah kan theih.
Tamu peng Khampat khua kahdohnak ruang khua mi minung 718 hna cu Manipur cozah nih “zeiruang ah dah rammi sinak ngei lo in ramchung ah nan luh ter hna, a rannaknak in Myanmar ralzam hna cu kir ter than hna uh” tiah ramri hngak ralkap pawl cu nawl an pek hna hi a si.
Manipur ramchung ah a rak lut thar mi hna hi ngakchia minung 300 renglo le nu 200 renglo an i tel hna. Atu lio ah Manipur state chung ah Meitei miphun le Chin miphun kar ah buainak a chuah lio pi a si tiah kan theih.
Kan Sin Ah Pathian A Um Amah Nih Lam A Kan Hruai Lai I Teinak Kan Hmuh Ko lai – R. Lalngheta, Chairman, All NGO CC. Central YMA le ALL Ngo CC chairman, R. Lalngheta nih “Manipur kan unau hna
buainak hi a rauh hlan ah cozah nih deihnak a serkhawhnak lai i pumkhat in ṭangṭi hna usih. Kan sinah Pathian a um amah nih lam a kan hruai lai i teinak kan hmuh ko lai ti hi zum ko hna usih tiah” tiah a chim.
July 25, Manipur Zohnahthlak hna dirpinak langhter in lamzawhnak ngeih mi ah R. Lalngheta nih ka pau in bia a chim mi cu “Manipur kan unau hna tuarnak hi a fak in ṭihnungtuk mi si an mah an tuar bantuk in kan nih zong kan lung a fak kan tuar ve” tiah an tuarpinak hna a langhter.
“Manipur cozah nih kan unau hna a venghim kho hna lo, an khuasaknak inn le lo, kan Pathian biaknak biakinn an khangh piak hna pin ah nunnak tampi a liam, kan nungak sualnak ngeilo hniphuan lo in a chawhpi hna pin ah tlaihhrem in an thah hnanak hi theihthiam le ruah thiam a har ko. Mizo mipi nih hacang rial buin zoh sawh sawh hi kan i herh tuk, India cozah nih hin rianrang in hi buainak hi deihter ding ah kan nawl tiah Mizo aiawh in a lungfahnak bia a chim.
“Tuni tiangin India cozah nih a khua le miphun hna Mizo ramah ralzaam in um mi hna ca ah bawmhnak tangka a pek lo mi hi kan theihthiam kho lo thleidannak lungthin ngei lo in Mizoram ralzaam kan unau hna caah bawmhnak pek ding in India cozah kan in nawl tiah” R. Lalngheta nih a chim.
Mizoram NGO Co-Ordination Committee Tawlrelnak In Aizawl Khuapi Ah Kuki Hna Dirkamhnak Lamzawh An Ngei Lai. Thaizing July 25, zinglei suimilam 11(IST) ah Mizoram chung zatlang bu fonhkomh, NGO Co-Ordination Committee(CYMA, MUP, MHIP, MZP, MSU) tawlrelnak in Aizawl khuapi ah kan unau Kuki hna dirkamhnak lamzawh an ngei lai.
Hi caan ah hin ahopoh i tel cio ding in NGO Co-Ordination Committee nih cun Mizoram chung mipi sinah sawmnak an tuah i, Mizoram chung ah a ummi Meitei miphun hna cu anmah pumpak himnak ding ah leng chuak lo dingin theihternak an tuah fawn.
Senegal Khuapi Kam Rili Cung Mipem Phurtu Tilawng Cansualnak In Minung 17 Nunnak Liam. July 24, ah Senegal khuapi rili cung hmundang ka dang aa ṭhial mi (migrant) tilawng cansualnak in minung 17 tluk an thi tiah tualchung ṭuanvo ngeitu hna nih an langhter.
Nunnak liammi RUAK hna hi tilawng ralkap rianṭuantu phu (navy) nih zinglei sang ah an hmuh hna tiah theih asi. Cansualnak tong mi tilawng hna hi phun dang dang an si caah khuadang ah pem ding in aa ṭhial mi ansi lai zumh a um tiah deputy mayor Ndeye Top Gueye nih a chim.
Nunnak liam mi hna hi khoika in dah an rat zei bantuk miphun dah ansi ti le khuazei lei panh in dah kal an i timh ti hi fiang te in kan theih kho rih lo tiah an langhter. A tu bantuk (thing tilawng) cansualnak hin 2023 kum canceu ah minung 800 tluk an thi cang tiah Spanish aid group Walking Borders nih a langhter. Credit: Lungmili Media