Mamit Ngakchia Remruata Kum 11 Hnipuan Lo In A Ruak Char Asi Mi Konglam Ah Thilsual Tuahtu Aa Phuang Cang!
=========
Mamit Pa ngakchia tlau (Uico) fim he an rak kawlmi Mamit khuami Remruata thihnak konglam ah thilsual tuahtu cu amah tein aa phuan cang caah Central Thonginn Aizawl ah an khumh tiah theih asi.
Mamit tualchungmi siin Zalen news nih a langhter ning cun, Lalremruata thihnak konglam ah Mamit palik nih amah he a neihniam mi a hawikom tampi biahalnak an tuah hna. Culak ah minung 2 cu an lunghrinh hna caah a hlei in biahalnak an ngeih hna hnu ah Mamit khua mi (Pa) kum 21 mi nih cun keimah nih ka thah mi asi tiah aa phuang.
August 25, khan mi thattu pa hi palik nih Aizawl thonginn ah an kalpi colh tiah theih asi. Hi konglam ah tualchung mipi sinin thinhunnak/buainak a chuak kho mi asi caah, palik lei zong ralring tein an cawlcang atutiang ah cun thilsual tuahtu aa phuannak hi a dihlak in langhter asi rih lo.
Mizoram Tlanglawng Lam Cimhnak In Nunnak Liammi Minung 23 Ruak Cu Tlamtling Tein An Hmuh Cang. Bairabi le Sairang karlak tlanglawng lam hleidonh mi cimhnak in nunnak liammi minung 23 ruak cu tlamtling tein thil a can ni 3 hnuah an hmuh char khawh dih hna tiah theih asi.
Kan langhter cang bantuk in August 23, zing suimilam 10:00 tlin hlan deuh i tlanglawng hleidonh mi nih a cimh pimi hna minung 26 lak ah minung 23 an nunnak a liam i an ruak zong tlamtling tein hmuh ansi cang, midang 3 cu tlamtling tein canhchuah ansi.
Nunnak liammi hna hi Bengal nitlak chaklei ah ummi ansi i an dihlak in (Pa) lawngte ansi hna. An ruak hi rimchiat khawhlonak sii-kah in anmah le an khua cio ah an kuat hna tiah theih asi. Hi kong he pehtlaiin, tlanglawng lam buaipitu Ministry of Railways hna nih hlathlainak ngei dingin minung 4 an thim hn atiah an langhter chih.
Mizoram Tlanglawng Lam Nih A Cimh Pi Mi Minung 26 Lak Ah Ruah 22 An Hmuh Cang. August 25, ah Tlanglawng lam sertu phu (Ministry of Railways) nih Bairabi le Sairang karlak tlanglawng lam cimhnak konglam ah hlathlainak tuah ding in member 4 umnak committee a dirh i thlakhat chung caan anpek hna tiah theih asi.
Tlanglawng lam sermi minung 26 a cimhpi hna lak ah minung 22 ruak char asi cang i konglam theih loin minung 1 a tlau August 25, ah hin kawl ṭhan asi lai tiah an langhter. Nunnak liammi hna ruak hi ZMC le Aizawl mipi sii-inn pi ah sii-bawi te nih check-hlatnak (post mortem) an tuah hnu ah rimchiatkhawhlonak sii kah in an umnak khua cio ah an kuat hna tiah theih asi.
Kanbalu Ah A Ho Theihlo Hriamtlai Phu Nih Chungkhar 1 Ah A Hngilh Liomi 5 An Kahthah Hna. August 25, zinglei suimilam 2:00 tluk ah Sagaing ramṭhen Kanbalu pengkomh Ngarmyaung khuachung inn pakhat ah aa hngilh liomi, minung 5 cu aho theihlo hriamtlai phu nih an kahthah hna tiah theih asi.
Kahthah tongmi 5 hna cu U Than Win, Ma Khin San Win, U Kyaw Aye, Daw Than Ngw le Ma Kyai hna hi ansi tiah Ngarmyaung tualchungmi pakhat nih a chim. Hi kong he pehtlai in, Kanbalu pengkomh khua vengtu/ralvengtu hna nih an chim ning cun Ngarmyaung khuachung hin zaanṭim ah a ho theihlo hriamtlai phu an rak lut i chungkhar pakhat ah aa hngilh liomi 5 cu an kahthah hna inn chung thilri mansung zong an lak tiah an langhter.
SAC Ralhrang Riahcaw Phurh Mi An Kah Hna Caah Hriamnam Tampi An Lak Piak Hna. Karenni ramkulh Shadaw peng chung 2888 le May-yu tlang kar ah SAC ralhrang riahcaw phurh pah in rallam sial mi hna cu a karlak ah Mipi hriamtlai phu nih an kah hna caah hriamnam tampi an lak piak hna tiah kan theih.
“2888 le May-yu tlang kar ah SAC ralhrang kah in kan lak mi an si”tiah a thi mi ralhrang ruak le hriamnam an lak mi kong cu Karenni ralkap pakhat nih Telegram ah hmanthlak he a tar langh.
“Riahcaw phur SAC ralhrang hna cu August 23 zanlei sang ah an kah hna nak kong, ralhrang lei a thi mi zat fiang in theih an si rih lo nak kong, le hi kong he pehtlai in tuanvo ngeitu hna nih thawng an thanh than te lai”tiah Karenni ralkap pakhat nih cun a chim. Credit: Lungmili Media