Mah pa an luatter than mi cu a poi kho taktak ee!

Tamu ah ti dawpnak seh a firtu pa an tlaih hnu ah an luatter ṭhan!
========
Sagaing ramṭhen, Tamu khuachung Sandako (ဆန္ဒကူး) sang saram sibawi inn ah thilri a firtu mifir pakhat cu nihin September 15, zinglei suimulam 5:00 ah Gorkha mino nih an tlaih tiah theih a si. Thil a firnak saram sibawi inn ahcun inn ngeitu an umlonak a sau cang i, cu inn ah cun voithum tiang thil a fir cang tiah theih a si.

Gorkha mino phu chungtel pakhat nih cun ” nihin zinglei suimilam 4:00 hrawng a luh in bawh a si cang, suimilam 5:00 hrawng ah ti dawpnak seh a fir i a rak chuak, cun sangchung ummi Gorkha mipi nih an tlaih. Cu a firtu ahcun Chinlay le Soetu tiin minung pahnih an i tel.

Nizaan zong ah thing an fir i ruahsur lak ah an zuar rubes 300 an ngah. Hmailei ah thil fir tilo ding in an cawnpiak hna hnu ah kan thlahṭhan hna” tiah a chim. September 4 zaan suimilam 11:00 hrawng ah Zamyu Yadana (ဇမျူရတနာ) sianginn pawng ah misual 5 cu Gorkha mino phu nih an tlaih hna i palik kut ah an ap hna tiah theih a si.

September thla zarhhnih chungah SAC ralkap le Karenni ralkap phufonh kar kahdohnak ah SAC ralkap 80 leng an thi, hriamthil tamlak an lak. September thla zarh hnih chungah Moebyel (မိုးဗြဲ) le Karenni ramkulh ah SAC ralkap le Karenni ralkap phufonh kar kahdohnak fak ngai in a chuak, cu kahdohnak ahcun SAC ralkap lei ralbawi telhin minung 85 hrawng an thi, hliamhma tuar an tam tiah KNDF nih cathanh an chuah.

Shan-Karenni ramri Moebyle(မိုးဗြဲ) ah SAC ralkap le Karenni ralkap KA, KNDF, Moebyle PDF, Pekhon PDF, KRU, URF, Naypyidaw PDF, Karenni GZ phufonh kar September 8 in September 12 tiang ninga chung kahdohnak a um i SAC ralkap 60 renglo an thi tiah theih a si. Kahdohnak chungah Karenni ralkap phufonh nih SAC ralkap thilri hriamhme 13, hriamngan le hriamhme kuan le raltuknak ah hmanmi thilri tampi cu an lak khawh.

Hi kaphnih kar i kahdohnak ah Karenni ralkap phufonh lei in a tlawmbik minung pahnih an nunnak a liam ve tiah theih a si. SAC ralkap hna cu Moebyle khuachung RC Biakinn ah umhmun an khuar i, an umnak pawnghrawng cu vanlei kahdohnak an tuah leng ah hriamngan in an kah caah, tualchung mi hna umnak inn 100 hrawng a rawk tiah theih a si.

Yinmarpin ah ṭat-kyat-kyi pakhat nih a meithal pakhat he CDM a tuah, sing 80MMK an pek! Sagaing ramṭhen ah SAC ralkap ṭat-kyat-kyi Min Thu cu Yinmarpin peng battalion 3 sin ah a meithal pakhat he CDM cawlcanghnak a tuah caah tualchung hriamtlai phu nih sing 80mmk an pek tiah tualchung hriamtlai phu hna sin in theih a si.

Ṭat-kyat-kyi Min Thu nih cun mizapi cungah hramhram thilsual a tuahtu SAC ralkap kuttang ah rianṭuan a duh tilo caah a hriamthil hna he tualchung hriamtlai phu sin ah aa dor hi a si tiah theih a si. Hrimthil he CDM cawlcanghnak a tuahtu Min Thu cu Yinmarpin battalion 3 nih lunglawm tein kan in don tiah phaisa sing 80mmk laksawng kan pek tiah cathanh an chuah.

Dohthlennak Ah NUG Acting President Rianṭuan Ning! National Unity Government (NUG) Acting President Duwa Lashi La hi mi nih theihmi a si lem lo. NUG nih Acting President rian an khinh hnu lawngah zapi zaran nih kan vun theihmi a si. Khin Nadi nih English in a ṭialmi Acting President of Myanmar’s Civilian Govt Wins Hearts of the People timi cabia chungin Duwa Lashi La a konglam le dohthlennak ah Acting President pakhat dirhmun nifatin rian a ṭuan ning tlawmpal ka vun char.

Duwa Lashi La cu kum 72 a si cang i Kachin miphun Khrihfa a si. A chuahkehnak cu Shan ramkulh Mung Ji khua a si i cuka ah cun sianginn cachim a rak ṭuan bal. Rangoon University ah upadi a cawng i sianginn a dih in kum 18 chung sihni le upadi bawi a ṭuan. English, Chinese, Burmese le Shan holh cu a nuhrin holh a simi Kachin holh bantukin a thiam i Kachin miphun chung i holhṭeng dangdang zong a thiam.

Fa 4 a ngei i kum 1990 thok khan ṭhanchonak, fimcawnnak, ngandamnak le zatlangrian phun tampi ah pumpek in a cawlcang i hruaitu pakhat zong a si. January, 2021 tiang kha Kachin ramkulh ah huham a ngei bikmi zatlangbu Kachin National Consultative Assembly ah Chairman a ṭuan. SAC nih nawlngeihnak an lak hnuah ramchung ramleng Kachin mifimthiam hna nih dirhmi Kachin Political Interim Coordination Team (KPICT) zongah Chairman a si fawn.

Nawlngeihnak lak hnu, a thla hnihnak April ah khan KPICT le CRPH cu tonnak an ngei i cu tonnak ah Duwa Lashi La cu Acting President rian an khinh. Cu tonnak ah cun CRPH nih ramkomh minister (vuanci) caah minung pathum chuahpi u tiah KPICT cu an chimh hna. Cuticun cozah thar ser ding kong an i ceih. NLD cozah i Vice President Henry Van Ṭhio cu NUG cozah ah Vice President dingin an chuahpi.

Henry Van Ṭhio kongah KPICT chairman Duwa Lashi La nih “Anih (Henry Van Ṭhio) cu SAC nih NLD Cozah bawi dang hna he an tlaih i a inn ah an hren. Asinain taza an cuai lo. Kannih cu chantiluan thlen dingah khongton uknak a dohmi kan si caah SAC he aa naihniammi paoh cu cozah thar ah telh lo an ṭha bik. Thlennak a duhmi, democracy le federal tha a pemi lawng kan thim hna ah a ṭha deuh” tiah a chim. Cucu midang zong an lungtlin caah Henry Van Ṭhio cu NUG cozah ah an telh lonak a si.

CRPH nih cun Duwa Lashi La cu Vice President caah an chuahpi i KPICT palai dihlak nih an lungtlinpi. Duwa Lashi La nih cun a chungkhar cu phone in thawng a thanh hna i ralring le timhcia tein um dingah a chimh hna. Cu hnuah Vice President rian cu a cohlan. Cuticun Duwa Lashi La cu April 16, 2021 ah cozah thar NUG Vice President ah fehter a si. President U Win Myint cu SAC nih an tlaih caah Duwa Lashi La nih Acting President a tlaih.

Mi tampi an khuaruah a har tukmi pakhat cu NUG cozah rian vialte hi Duwa Lashi La nih ramchung in a tlangtlak khawhmi hi a si. Min Aung Hlaing hruaimi SAC nih thah an duh bikmi (most wanted) a si ko nain ramleng ah a zam lo, ramleng in Acting President rian a ṭuan lo. Ṭih a nung tukmi rian cu ramchung in a ṭuan. A chungkhar zong amah sinah an um. Acting President a si hnuah Shan ramkulh Lashio khuapi i a inn cu SAC ralkap nih an kalhnawh nain an um ti lo caah an kharpiak.

NUG Cozah office cu Myanmar ramchung hmun pakhat ah an chiah i cuka cun NUG Cozah rian le dohthlennak rian vialte cu a tlangtlak hna. A PS (personel secretary) nih “Kumkhat le cheu chung ah voikhatte hmanh a vuivai bal lo. A rian hi tlolh lo tein a ṭuan. Niruk le zarhpi zongah a herh ahcun din loin a ṭuan” tiah a chim.

Nifatin a rian hi zinglei 5:00am in a thok tawn. Kum 72 a tling cang nain rian thok hlanah pum cawlcanghnak (exercise) a tuah ta peng. Nikhat chung a rian ahhin cozah meeting kai, NUG tang i hriamtlaibu 300 renglo le tlangcung hriamtlaibu hna he tonnak tuah, ramleng palai hna he i ton le ramchung ramleng (Ukraine kong telh in) thawngpang rel hna an si.

Office ah rianṭuan lawng a si lo. Kahdohnak hmun tiangah a va kal i PDF hna he an i tong, an dirhmun le sining an chimmi kha ṭha tein a ngaihpiak hna. Chin ramkulh in CDF pakhat nih “President nih PDF a tonmi hna ka hmuh tikah kaa lunghmuih tuk. Kanmah umnak zongah a ra te lai tiah ruahchannak ka ngei” tiah a chim.

D-Day thanh in kumkhat tlinnak ah Duwa Lashi La nih cun PDF le tlangcung hriamtlaibu hna nih Myanmar ram zatuak 52% cu kan lak khawh cang tiah a chim. Special Advisory Council-Myanmar (SAC-M) hruaitu Miss Yanghee Lee nih cun “NUG cu zuamcawhtu cozah a si, ramleng ah a zammi cozah a si lo. Mipi dohthlennak aiawhtu a si. Ram chung hmun tam deuh a tlai khotu a si” tiah a chim ve.

Ram mipi nih a chia bikmi dirhmun an phak lioah SAC khongton uknak doh i hrawh dih dingin a ngan bikmi rian Acting President cu aa khinh i ramleng ah zam loin ramchung in dohthlennak rian vialte a tlangtlak. Ramdang cozah bawmhnak tel loin ramchung ramleng Myanmar mi hna bawmhnak tlawmpal tein NUG tang i rian vialte a ṭuan. Cucaah dohthlennak ralkap hna le ram mipi dihlak nih an upat, an ṭihzah i an dirkamh.

Myanmar Ramchung Kahdohnak Thawngpang! Sagaing Ramṭhen, Pale Peng, Muaidung khua Pawng Kahdohnak Ah SAC Ralkap 5 An Thi! Sagaing ramṭhen, Pale thlanglei meng 5 ah ummi Muaidung (မွေ့တုံ) khua pawng ah nizaan September 13 zaanlei sml 4 hrawng ah SAC ralkap le tualchung hriamtlai phu kar kahdohnak a chuak, tiah theih a si. Cu kahdohnak ah cun SAC ralkap 5 an thi i 30 hliam an tuar, tiah Yinmarbin(ယင်းမာပင်) pengkomh Bataillon 11 KYIATHITNAT PYOHKYIA hruaitu pakhat Ko Aok Ka nih a chim.

SAC ralkap 180 hrawng cu September 12 ahkhan Shwelaung(ရွှေလောင်း) khua ah umhmun an khuar i, Muaidung khua cu hriamngan in an kah pinah inn an khangh. An kir lei ah bomb kan puahhnawh hna caah kaphnih kar kahdohnak a chuak i SAC ralkap 5 an thih lengah 30 hliam an tuar. A thimi le hliam a tuarmi hna cu Shwelaung khua ah cycle in voihnih an thiar hna hnu ah, Shwelaung in Pale si-inn ah ambulance in an kalpi hna, tiah Ko Aok Ka nih cun a chim.

Cu kahdohnak cu Yinmarbin Bataillon 11, 12 le tualchung hriamtlai phu hna i bawm in an tuah mi a si, tiah theih a si.

Mandalay Ah Palik Pakhat Le Yephyo Peng Ah Pyusawhti Pakhat Cu PDF Nih An Thah Hna: Mandalay Kandawkyi, Kanpat lam Ayemya(အေးမြ) phura pawng ummi No. 10 palik sakhan in mangki(palik) pa cu, MDY PDF phu nih September 8 zan sml 7:30 ah an kah i, a hmun ah a thi colh, tiah theih a si.

A thimi palik Rakhinekyi(ရခိုင်ကြီး) sinah kuanruk tlum pistol zun 1, 380 min ngei kuan 12, laisen, phone 1, zal 1, zung he aa pehtlaimi catlap, hnaciat(နားကြပ်) 1, Shuse(ရှုဆေး) bawm 1, cycle 1, kutkhih cikcin tuah 2, phone No cauk le a dangdang thilri kan tlaih, tiah MDY-PDF nih cathanh an chuah.

Cu ṭhiamṭhiam in Tanintharyi ramṭhen, Yephyo peng Ciakhata Pinin(ကျခတ္တပင်အင်း) khua lam ah September 12 zinglei sml 11:00 ah USDP party chungtel Pyusawhti Thein Zaw cu hngalh lomi phu nih meithal in an kah i a thi, tiah tualchung mi pakhat nih a chim. Thein Zaw cu Tabezun(သဗြေဇွန်း) khuami a si pinah USDP party chungtel pakhat zong a si. SAC nih nawlngeihnak an lak hnu in Pyusawhti chungtel a si i, PDF a ral ngaithlaitu a si tiah theih a si.

Monywa Economics Sianghleirun Pawng Ah PDF Nih SAC Ralkap 3 An Thah Hna: Sagaing ramṭhen, Monywa khuapi Economics sianghleirun pawng ah sentari cawngtu SAC ralkap cu, PDF Guerrilla phu nih nizan September 13 zan sml 10:00 ah an kah hna i, SAC ralkap 3 an thi, tiah theih a si. Cu kahdohnak ah cun Black Dragon Special Task Force le God of Monywa People Defense Force hna i bawm in an kah hna i, SAC ralkap bawmtu an rat caah hriamnam kan la manh lo, tiah Black Dragon phu nih cathanh an chuah.

Cu bantuk ṭhiam in Magway ramṭhen, Yesagyo peng Yelaykyun(ရေလယ်ကျွန်း) hmunram Ngaungpin khua in Wabu khua lei ah rallam a sialmi SAC ralkap 50 hrawng cu, bomb kan puahhnawh hna caah SAC ralkap 6 hliamhma fak ngai an pu, tiah MG6 Guerrilla phu nih cathanh an chuah.

Cu bomb puahnak ah cun MG6 Guerrilla, YSO NO1 Guerrilla le YLK NEW POWER PDF hna i bawm in an puahhnawh hna. PDF lei in ralkap pakhat hma a pu nain thinphan awk a um lo, tiah theih a si. MG6 Guerrilla phu in ralkap pakhat nih, “SAC ralkap 6 hliamhma an pu tiin thawng kan theih. Tilawng in Yesagyo lei kap ah hliamhma pumi hna cu an kalpi hna. A thimi an um le um lo cu fiang in kan thei lo,” tiah a chim. Credit: The Chin Post