Manipur Buainak Ah Biakinn 250 Leng An Khang, Minung 100 Leng An Thi
============
Manipur peng ah minung tam deuh a si mi Meitei miphun le Chin-Kuki tlangcung miphun hna karlak ah a cang mi buainak chung ah Khrihfa biakinn 250 leng an khangh i minung 130 leng an thi tiah Indigenous Tribal Leader’s Forum (ITLF) nih a thanh.
ITLF cu Manipur chung ah a um mi Chin-Kuki tlangcung miphun zapi fonh nih dirh mi phu a si i Meitei miphun nih an khangh ruang ah biakinn 250 leng le biaknak he aa pehtlai mi inn 90 leng a rawk tiah The Aizawl Post nih a langhter. Atu a cang mi buainak chung ah Chin-Kuki tlangcung miphun 130 leng an thi i cu chung ah 50 leng i an tlau tiah ITLF nih a ṭial.
Cun Chin-Kuki tlangcung miphun khua an saknak khuate 160 leng in mipi inn 4,500 leng an khanghpiak hna i minung 40,000 deng inn ngei lo in an um tiah ITLF nih a langhter. Hliam a tuar mi minung tampi an um i Manipur peng Lamka pengkomh sizung ah aa thlop lio mi minung 200 leng an um tiah theih a si.
Manipur peng ah minung a tam deuh i Meitei miphun hna nih minung tlawm a si mi tlangcung miphun hna caah India phunghram nih a langhter mi Scheduled Tribe ah teltum kho ding in caan saupi an rak hal.
Cu an hal mi duhlonak langhternak caah May 3 in Manipur peng Churachanpur khua ah Chin-Kuki tlangcung miphun hna nih lungrual tein “Solitary March” an tuah dih hnu ah Meitei le Chin-Kuki tlangcung miphun hna karlak ah buainak a chuah hi a si. Buainak ruang ah Manipur chung ah a um mi Chin-Kuki tlangcung miphun 50,000 hrawng nih innlo an zaamtak i Mizoram chung zong ah minung 10,000 leng an i dor tiah theih a si.
Manipur Ah Biakinn 250 Leng An Khangh; Manipur peng ah minung tam deuh a si mi Meitei miphun le Chin-Kuki tlangcung miphun hna karlak ah a cang mi buainak chung ah Khrihfa biakinn 250 leng an khangh i minung 130 leng an thi tiah Indigenous Tribal Leader’s Forum (ITLF) nih a thanh.
Monywa University Ah Hmunhma A Khuar Mi SAC Ralkap Kahdohnak Ah SAC Ralkap 3 An Thi; Sagaing ramṭhen, Monywa khua, Technology University ah hmunhma a khuar mi SAC ralkap pawl PDF phufonh nih an kah hna i 3 an thi tiah Golden Eagle Force – Monywa nih a thanh.
June 14 chun sml 1:00pm hrawng ah Monywa University ah hmunhma a khuar mi SAC ralkap pawl PDF phufonh nih an kah hna hi a si i gate a hngak mi 4 chung ah 3 an thi tiah an thanh.
Kahdohnak chung ah sianginn chung dot 3 in an kan kah PDF 1 a lu ah kuan nih a hneuh tiah an langhter. Golden Eagle Force – Monywa le Red Star Front, Pungna Guerrilla phu, God of Monywa People Defense Force le Tawce Guerrilla phu hna fonh in kahdohnak an tuah hi a si tiah theih a si. Crd;The Chinland Post