Gangaw Ah Ramkhel Ruang Thongtla 2 Cu Ralhrang Nih Khua Leng Ah An Chuahpi Hna I An Thah Hna
=========
Magway ramṭhen, Gangaw khua palik sakhan ah tlaihkhih a tongmi hna ramkhel lei thongtla 2 hna cu a luancia June 11 ah SAC ralhrang nih khualeng ah an chuah hna i an kahthah hna, tiah tualchung mipi nih an chim.
“A kapthattu hna chung ah hin khuapi um Beer dawr ngeitu zong simi pyusawhti pa zong aa tel. Gangaw khuapi in nitlak lei hmun ah motor in an kalpi hna i an thah hna hi a si” tiah min langhter a duhlomi tualchungmi pakhat nih June 16, nihin ah Khit Thit ah a chim.
Thah a tongmi hna hi a luancia thla 2 hrawng ah ramkhel kong he pehtlai in an tlaihkhihmi hna an si. Zahaw (ဇဟော) khuami pakhat le Gangaw khuapi Khinthar sangmi pakhat hna an si. SAC ralhrang le an kuttang pyusawhti pawl nih an thah hna i, Moekaungtutan (မိုးကောင်းသုသာန်) ah an ruak an vui colh hna, tiah tualchung mipi nih an chim.
Gangaw khuapi um SAC ralhrang le an kuttang pawl nih a luancia April thla lio zong ah ramkhel lei thongtla pakhat cu atu bantuk in khualeng ah chuahpi in an rak thah bel cang, tiah an chim chih.SAC ralhrang nih nawlngeihnak a laak hnu in Magway ramṭhen chung lawng ah mipi 300 hrawng cu SAC ralhrang le pyusawhti pawl kut in thah an tong cang, tiah tualchung Media hna nih an langhter. Crd; Lungmili Post