Lt. Colonel Sang Cem Asangbik Mi Upatnak Kan Pek!
============
Lt. colonal Sang Cem hi keimah he raltuk thiamnak training a kai ti mi kan si.. Training kan dih in training saya te nih a thiambik tiah an timi hna minung 3 kha training saya caah an thim hna i ‘cuchung ahcun Sangte hi aatel ve..Mohre khuapawng Camp victoria kan um lio ahhin kei hi Camp incharge ka si i, a nih hi Camp commandant a si. Tleicia Thang Khum le tleicia Tluang Chawn tiin inn khat ah kan um ti hna..Zan ih lai ahhin thaizing riantuan ding hi kan i ceih tawn.. Rian a tam ngai i minung kan i phahzo lo tikah rian tuan hi a har ngaingai.
Acaan ahcun acunglei nih nikhat ah mah rian hna hi nan lim lai ‘tiah order a rat can zong a um ton i, mah bantuk can ahhin ka rak buai ngai tawn i zeitindah ka tuah lai ‘tiah Sangte hi ka hal tawn. Sangte hi riantuan ningcang a thiam lawng silo in, ralkap pakhat cio an pahrang hna zong hi a thei dih hna,,Zanlei rian kan dih hnu ah hriamnam kan neih mi hna namtong /hre tlung/ poh pia le thirfung hna hi atling maw? tling lo ti hi tha tein na chek peng lai a ka ti tawn. Na chek hna lo ahcun thaizing rian kan tuan tikah hriamnam kan kawlnak ah a can tamtuk a dih a ka ti. Zan kan ih lai ahhin a nih khi mah bantuk rian na fial lai ‘a nih khi mau tah na fial lai.
Anih khi thing cek na fial lai’ ti tiang khin a ka chim dih…mau tah a thiam mi pa kha thing ceh na fial ahcun rian hma a kal lailo i, thing ceh a thiam mi pa kha tlah tham na fial ahcun rianhma a kal chinchin lailo ‘tiah a ka ti tawn. Rian a tam deuh paoh ahcun a mah pumpak nih a tuan ve tawn..Nangmah rak um law keimah nih ka va bawmh hna lai ‘ka ti paoh ahhin nangmah na um lo ahcun acunglei nih thil pakhat khat an herh ah siseh, atanglei nih thil an herh ah siseh na um lo ahcun a si thiam lailo’ a ka ti tawn.
Voikhat cu Tluang Chawn rawl ka chum ter i a hmin hlan ah rian ka fial i zeidek a va tuahpah i rawl vialte a ut ter dih..Fung ka lak i ka tuk lai ka ti i, Sangte nih tuk duh hla mah tihin kan tuah lai a ka ti..Thang Khum hi cawka lei tuanvo na pek lai i Tluang Chawn hi a herh mi paoh ah rian na fial lai. Tluang chawn hi rian na fial paoh ah cu zat ah na rak kir than lai ‘na ti peng lai a ka ti.. Cuticun Khuma cu cawka lei tuanvo ka lak ter i Lian Chawn cu rial fial ah ka hmang. Chim duh mi cu sangte hi rian tuan a thiam ngai mi le ralkap hna an pahrang cio zong a theih hna caah mah 2 hi a kawmh thiam caah rian hi a tei ngai tawn nak hi a si.
Sangte hi phundang ngai a sinak cu; i hawikom lio caan ahhin cun a mah nak in rank a niam deuh mi le ralkap sawh sawh an si zong ah anmah nakin niam in tangtor te le hmurka tha te in mi chawnhbiak le mi komh a thiam. Asinain rian pipa a tuan lio ahcun a mit auh a phun dang a holh zong a phun dang i a cawlcangh ning zong a phun dang hna i a mui zoh ah rumra le huham a neih colh..Mah ka zawn hin za raan nih kan tluk lonak hi a si. Zeibantuk rian a tuan paoh ah a biatak i rian tei lo hrimhrim hi a duh lo. Uniform a hruk mi hi a smart peng. Ake dan hri a tem mi tiang khin dawh te le rem te in a tem peng hna..
Voikhat cu ka nau le he khual tlawng kan si i zanlei sang ahkhin a rak ka leng i tutan cu cathiam mi tampi in na rak ka phurh hna lai tiah siaherh ngai in a ka cah. Ka khual tlawng kir pah in cathiam deuh timi pawl cu ram nih an herh hna tiin ka rak sawm pah hna i minung zeimawzat ka rak tlung pi hna..Camp ka phak le cangka in ‘kha’ cathiam mi lawngte an si hi ka ti i, a rak ilawm tuk. Tutan training ka pek ding mi cu ka lung hmui ngai a rak ka ti, Sangte hi training in charge..[tinttan hmu] sau pi a rak tlai mi a si i, CNA ralkap tampi hi a mah kut chuak an tam bik lai ‘tiah ka zumh.
Lungler sakhan an lak lio ahkhan hma a pu tiah ka theih caah phone ka chawnh.. Sii zung a um lio a si i a hma cu a ka zoh ter.. Mah tluk a ngan mi hma kha ‘ziah tuan ah sii zung na rat lo ka ti i, India ralkap nih ka thawng hi an theih i ramri in an ka bawh caah tuan ah ka rat ngam lonak a si ‘a ka ti. Lungler sakhan an kah nak kong kha ka hal..Nikhat nak kan kah ahkhan vanlawng in bomb an rak thlak mi nih a ka khen i hma ka putnak hi a si.
Sakkhan lak lo in kir hi ka duh lo caah Sopum lei kan kir hnu ah zan ah kan va kah than hna i Sakhan kan lak khawh than nak kha a si ‘a ka ti. Mah tluk na hma a fak bu khan zeitindah Sakhan cu na va kah khawh than ka ti i. acaan ahcun lam ka kal kho lo i ka nau le nih a zawn in an ka zawnh a ka ti. Zan ah mei zong kan van ngam lo caah hma pu bu cun a har pah ve ko a ka ti..Mah tluk hma he sakhan na valak khawh cu Aungsan thuriya boih’ kan pek ka ti i a ni len.
Sangte hi zeibantuk minung dah a si ti ahcun; Mi raltha a si. Rian khinh mi paoh tlolh a duh bal lo.. A caan a upat caah a tlai bal lo. A thil hruk mi hi a kedan in a luchin tiang a smast zungzal. Mi thinlung le ralkap pakhat cio an pahrang kha a thei dih hna i ‘mah an pahrang cio cu tha tein ahman thiam hna.
Training saya a si caah mi cawnpiak le hruaining a thiam. I hawikawm caan ahhin a mah nak in rank a niam deuhmi le ralkap sawh sawh hna sin ahhin an mah nakin niam deuh khin a um i aw nem te le tangtor ngai in mi a kawmh hna..Asinain uniform ai hruk hnu cun amithmai le a aw hna ai dang colh i rumra le huham a nei colh..Ralkap cung ahhin zawnruahnak le dawtnak a nei.
Voikhat cu kuak ka neih tilo i india phaisa 20 te a neihchun mi khi a ka thenh. Chimduh mi cu a neihchun mi hman khi ralkap caah cun a siang. Zeibantuk harnak kan ton zongah a lung a dong bal lo. A chim tawnmi cu hnulei kir awk kan tha ti lo ‘timi bia hi a si. Hibantuk ralbawi tha nih a kan liamtak tikah kan ar fi lian ngai a tla. Sangte phone kan i chawn paoh ah nangmah le Sunny kan ngai bik hna na ka ti tawn mi kha’ hi hnu cun na aw ka thei kho ti lailo. Mangtha law. Van Neih Thang