Lawmhpi Cio Hna Usih! P. Thawng Bawi Nih CDF – Hakha India Tangka In Rs. 1,271,480 Bak A Hlut Hna!

P. Thawng Bawi Nih CDF – Hakha India Tangka In Rs. 1,271,480 Bak A Hlut Hna!
=============
CHARITY CONCERT FOR CDF (hakha) tiin Oct.16.2021 ah favebook Live in Nan rak pek (Hlut) mi phaisa dihlak cu
$30804.95 asi. Cu chung cun hmannak (Expense) kan zoh dih hnu ah a taang mi zaapi cu.

1. CDF Hakha le Thantlang fonhmi (USA) sin ah $5000 pek asi. 2. CDF hakha sin ah 1,271,480 INR kan pek khawh hna.
Phaisa a rak thotu nan dih lak cung ah kan i lawm tuk. Bawipa nih lunun ngandamnak in pe cio hram hna seh.
Concert a chuah khawhnak ding ah zaanghlei cawi in a ka bawmtu.

Thawng Pi Lian (Event Organizer) USA, Hlasak in a ka bawmtu, DJi le Mang Hlei Tial, Band le sound le Light le a Dangdang vialte a ka bawmbik tuk, Thangbawiha (EME Record). Phaisa luhnak lei in a ka bawmtu, Pau Lam Piang (Kimo resturent) le Sui Ceu Lian (CCN).

Europe lei in a rak ka bawmtu ka kawipa, Sui Lian (Norway) le Nawl Uk Lian Hlawnceu (Denmark). Cun a dangdang in a ka dirhkamhtu kan nu Dadeo, A bik in phaisa a petu nan dih lak. Nan zaapi te cung ah kaa lawm tuk. Love You All. P.Thawng Bawi

“Ralhrang tih hlah, Pathian lawng tih” November 3, 2021. Matthai 10:28 “Pum cu a that kho ko nain thlarau a that kho lomi cu va tih hlah u; hell chungah pum he thlarau he a that khotu Pathian tu kha va tih u”. Ralhrang nih kan khua an khangh. Kan ram an hrawh. Kan thilri an fir. Kan miphun an kan thah.

An hriamnam dihlak he an kan doh. In awk a that ti lo caah kan nungak tlangval hna nih mah-ral-vennak (self defence) an tuah ve. Thlacamnak he bawm cio hna u sih. Kan thlarau nunnak cu an khang, an hrawk, an fir, an that kho lo.

Ralhrang bantuk in Satan nih kan chungkhar nun a hrawh ve. Satan pennak cu Bawipa ah zumhnak a fekmi nih Bawipa thawng in an tei khawh. Zumhnak a fek lomi chungkhar cu nu le va a kan hrawh, hrinhniang semmawng nun tiang in a hrawh hna. Cucaah Laimi cu ral phun hnih a ngeimi kan si.

“Hoilopar muvi” hi muvi zoh in zoh loin, sermon bantuk in nan rak zoh dingah kan sawm hna. Fa le dawt timi hi zei set dah a si?. A duhmi paoh na tuahpiak mi kha dawt a si loh. Thong va tla te seh na ti bia asi deuh. Hoilopar Jesuh he na tontermi tu kha fa dawt cu a si.

Fidi le Fitlaw an nun hi rak zoh law nai fiang ko lai. Hoilopar team vialte zong upatnak kan pek hna. Kan ram dam tuan cang law chungkhar vanram ser kan duh tuk cang e. Bawipa kan bawm.

“Mikip tel khawhmi thlacamnak”. Camp Victoria lei in Pastor le Ralbawi nih miphun dihlak thlacam an kan sawm.
Jacob cu amah thah ding ah Esau le ralkap 400 an ra lio ti a theih tikah Bawipa sinah thla a cam (Genesis 32:9).
Laihritannak kan ram lei ah ralhrang rual cu hriamnam phuntling le motor tampi he an kal lio, timi thawngpang le hmanthlak nih media hmai a cul dih. Hi thawng kan theihmi nih Jacob bantuk in Bawipa hmai ah thlacam lo kho lo dirhmun a kan phakter.

Thlacam tikah hin a camtu minung cu kan thawng lo nain kan hei chonhmi Bawipa hi a thawngmi lakah a thawng bikmi a si. Haleluijah!. Thlacam cu a camtu lei kap zoh loin Bawipa ah kan zumhnak hei chiah khi a si. Jacob nih amah lei aa zoh tikah, a nupi Leah le Rachel, salnu Zilpah le Bilhah, a fapa le ngakchia tete hleikhat, an farnu tleirawl Dinah, a hmuh hna.

A fa le cu puak le cawi hau mi, an ban in hruai chom hau mi, an tam deuh. Raldoh cu chim lo, thinphan thlalau in a thi colh ding phun an si. Cucaah cun pei Bawipa cu a fuh fam cu.

Ralhrang doh tikah i-tel khawhnak phunphun a um. Cu lakah kan zapi hmunkhat te ah tel khawhmi cu thlacam hi a si. Hriam tlai kho lo zong nih, chawva pe kho ve lo zong nih, thlacamnak ah kan i-tel kho dih. A ngaingai ti ahcun thlacam hi dah kaw a thawng bik mi a si cu. Teinak cu Bawipa kut chungah a um.

Miphun dihlak in thla kan cam lai. Thlacam kan thiam lo zongah Thlarau nih Bawipa sinah a kan chimh piak lai, Haleluijah!. Thla kan cam lo ahcun chimpiak kan si ve lai lo. Thla kan cam dih hna lai. Thlarau nih Bawipa sinah a kan chimpiak lai. Bawipa nih teinak a kan pek lai.

Rom 8:26 “Cu bantuk thiamthiam cun, a der ngaingaimi kan si caah, Thlarau zong cu kanmah bawmh awk ah khan a ra. Zeitindah thla kan cam awk a si ti hmanh kan hngalh lo lio ah bia in chim khawh lomi hram-ainak in Thlarau nih Pathian cu a kan nawlpiak”.