Lairam Cu Pathian Dirhmi A si Ruang ah Tei nak Cu Lairam ta A si Than Zau lai!

Lairam Cu Pathian Dirhmi A si Ruang ah Tei nak Cu Lairam ta A si Than Zau lai!
===============
“Ka thlacam lio i ka lung um mi Biatawi” Laimi cu, thingkung, Lungkua le khuazing arak bia mi kan si ko nain Bawipa Pathian, “dawtnak ruangah” atu cu, Pathian thatnak kong tu, khua zakip le ramkip ah, chimtu dingah “Lai Mi” cu Pathian nih “meiceu” bantuk in mi Phun vialte caah a kan hmang mi miphun kan si tihi hohmenh nih philh hlah usih. Tulio kan tongmi harsatnak kongah pakhat le pakhat mawh phurhnak bia chim hlah usih!

Hi thil vialte cu asi te lai ti a hngaktu cu kan biak anung Pathian asi. Amen. Tuchun ni ah hin, Lai mi chung in a phunzai mi zong kan tampi ko lai, kan phunzai zong cu kan mawh baklo, Pathian minung( Prophet) Habakkuk zong ral ruangah Pathian sinah arak phunzai i Pathian kha bia tampi arak hal.

Habakkuk hi BC 600 hrawngah Pathian rian a rak tuan mipa asi, atuan lio caan hi Babylon a thawn lio cem caan asi I, Habakkuk cu a lungre atheituk caah Pathian kha bia ahal, “Ziah an mahnak tha minung pawl an hram an that ko lio ahhin Bawipa cu dai tein na um ti khi asi” Habakkuk duh ning ahcun, misual mi cu Bawipa nih that colh ve hna seh, a miphun mitha mi hna hi tluk in an kan tuahto lio ah hin ziah Bawipa daite in na um ti khi asi.

Habakkuk zainak cu Pathian nih hin tin a leh! Pathian nih a letnak ahcun amah Pathian nih a rem ati mi caan ahcun a tuante ko lai i “ a ding mi cu Pathian an i bochannak thawngin thawngin an nung lai” ati. Amen. Lairam na lungdong hlah, na dingnak ruangah teinak cu na kut ah Bawipa nih an pek lainak “ Ni lian ngan” ni cu ara lio, caan raulo teah na sin aphan than lai.

Cun (Bawipa) nih a ka leh i, “Langhnak na hmuhmi cu ṭial tuah, Lungtlap ah khan ṭial law a reltu nih tlikpah hmanh in an rel khawh nakhnga fiang tein ṭial tuah. Na hmuhmi langhnak a tlin caan cu a phak rih lo caah a ṭial in ṭial. Asinain a caan cu khulrang in a ra lio ko i, Kan hmuhsakmi cu a tling hrimhrim ko lai. A caan cu a raumi a lo lai, sihmanhsehlaw hngak ko, a tling hrimhrim ko lai i sau a rau ti lai lo,” a ti.

Cun a bia cu hihi a si: “A ṭha lomi cu a nung lai lo. Sihmanhsehlaw a dingmi cu a nung lai. Pathian sinah zumhtlak a sinak thawngin a nung lai,” a ti. Teinak Caan Cu Khualrang In Ara Lio! Isaiah 37(in thazang la usih). 1. Siangpahrang Hezekiah nih an chimhmi bia kha a theih cangka, a ngaihchiatnak langhternak ah a puan kha a thleh i buri puan kha aa aih i (Bawipa) Biakinn ah a kal.

2. Siangpahrang inn zohkhenhtu Eliakim le zung ca ṭialtu Shebna le tlangbawi upa pawl kha profet Isaiah, Amoz fapa sinah khan a thlah hna. Annih zong nih buri puan an i aih ve. 3. Hi bia hi Isaiah nan va chimh lai, a timi hna cu a si: “Nihin hi temhinnak ni a si; dantatnak kan in ni a si i hmaichia in kan um ni a si. Zei he dah kan i lawh tiah a fa a chuak dengmang cang na i chuahternak thazang a ngei lomi nu bantuk kan si.

4. Assiria siangpahrang nih a nungmi Pathian kha nihsawh awkah a ralbawi kha a rak thlah. (Bawipa) na Pathian nih hi nihsawhnak bia hi rak thei hna seh law a chimtu kha dantat ko hna seh. Cucaah a tangmi kan mi hna caah thla rak cam ko.” 5. Isaiah nih Siangpahrang Hezekiah bia kha a theih tikah, 6.hitihin a leh: “{ Bawipa } nih, ‘Assiria mi nih an ka serhsat ruangah na zei hmanh rak poi hlah! an ti.

7. (Bawipa) nih an siangpahrang cu bia chawkvai pakhat a theihter lai i cu bia chawkvai nih cun a ram ah a kirter lai; cun cuka ah cun mi kha amah cu a thahter hna lai,” a ti. Cun Siangpahrang Hezekiah le a mi phun hna cu Bawipa hmai kha an kawl,

15. thla a cam. 16.“Ralkapbu (Bawipa) Pathian bawiṭhutdan cungah a ṭhu mi, nangmah lawnglawng hi Pathian na si i vawlei cung pennak vialte a uk dihtu na si. Nangmah nih van le vawlei kha na ser hna. 17. Atu cu (Bawipa) kan thlacamnak hi kan theihpiak law kannih cu run kan zoh tuah. A nungmi Pathian nangmah serhsatnak bia Sennakherib nih a chimmi vialte hi ngai tuah.

18. (Bawipa) kannih nih kan dihlak in, Assiria siangpahrang nih miphun tampi cu a hrawh hna i an ram kha an rawk dih cikcek i, 19. an pathian kha an khangh dih hna, ti cu kan theih — sihmanhsehlaw annih cu pathian an si lo, minung nih an kut in an ser chommi thing le lung siasal menmen an si.

20. Cucaah (Bawipa) kan Pathian, kannih cu Assiria mi hna kut chungin kan khamh ko sawh; cuticun vawlei cung miphun vialte nih nangmah lawnglawng Pathian na si kha an hngalh lai,” a ti. 21. Cun Amoz fapa Isaiah nih Siangpahrang Hezekiah cu bia hei cah i Siangpahrang thlacamnak kha (Bawipa) Israel Pathian nih hi bangin a leh tiah a hei chimh.
22. (Bawipa) nih cun, “Sennakherib, nangmah cu Jerusalem khua nih khan a nih in an nihsawh men ko, capo men ah an saih ko.

23. Ahodah ka nihsawhmi le ka serhsatmi hi a si tiah na ruah? Israel Pathian thiang hi na ka serhsatmi cu ka si.
24.Tlang sang bikbik cu ka rangleng in ka tei hna, Lebanon tlang parpahlek hmanh ka tei, tiin keimah kha tluangkhawnhnawh awkah na sal cu na thlah hna. Cuka ah cun sidar thing a sang bik cem hna le saipres thing a ṭha bikbik hna kha ka hau hna i tupi a deng tiang ka phan tiah tluang na khawng.

25. Ram dang ah tikhor ka cawh hna i ka din hna, ka ralkap nih Nail Tiva cu vawlei ro tan in an tan, tiin naa thangṭhat. 26. “Hi thil vialte hi hlan piin keimah nih ka rak timh cangmi an si ti kha na thei bal lo maw? Atu cu ka tlinter cang hna. Kulhmi khua kha hnawmpon i ser khawhnak nawl cu kan pek. 27. Cuka i a ummi hna cu zeihmanh an tuah kho lo. An thin a phang i an lung a caw. Lo chung i a khomi ram si hna seh, inncung i a khomi belh si hna seh, nichuahlei thli lin nih a hranh tik hna i an uai an car bantuk khi annih zong cu an si ve.

28. “Asinain nangmah kong cu a dihlak in ka hngalh dih; zei na tuah le khuazei i na kal kha ka hngalh dih. Zeitluk in dah ka cung i na thin a hun kha ka hngalh. 29. Cu bantukin na thin a hun le naa porhlawt kha ka theih i cucaah cun atu cu na hnar in sio in kan sio lai na ka ah chak kan hlomh lai; cun n ratnak lam te khan kan kirter ṭhan lai,” a ti.

30. Cun Isaiah nih khan Siangpahrang Hezekiah cu a thawh i, “Hmailei ah a tlung dingmi thil hmelchunhnak cu hihi a si lai. Tukum le kumvoi cu rawl a hlih nan i rinh lai, sihmanhsehlaw a kum thumnak ah cun anmahte in a khomi rawl lawng kha nan ei lai, sihmanhsehlaw cu kum a hun changtu kum ah cun rawl kha nan cin khawh lai i nan zun khawh lai, mitsur ruang kha nan zun khawh lai, mitsur ruang kha nan phun khawh hna lai i an thei kha nan ei khawh hna lai.

31. Judah phun chungin a tangmi hna kha, vawlei chungah thuk piin hram a thla i thei a tlaimi thingkung bantukin an hninghno lai. 32. Ralkapbu (Bawipa) nih hi cu a tlinter hrimhrim lai caah Jerusalem khua le Zion Tlang ah a tangmi cu an um lai,” a ti. 33. Assiria siangpahrang kong ah (Bawipa) nih a chimmi cu hihi a si: “Hi khua chungah hin a luh zong a lut lai lo, thal zong pakhat hmanh a thlah lai lo. Phaw aa putmi ralkap zong nih a naih in an naih lai lo i a velchum ah raltuknak chuntlung zong zeihmanh ser a si lai lo.

34. A ratnak lam khan a kir ṭhan lai i hi khua chungah hin a lut lai lo. Bawipa nih hi bia cu ka chim cang.
35.Keimah nih upatnak ka hmuh nakhnga le ka sal David sin i biakamnak ka rak sermi ruangah khan, hi khua cu ka hum lai i ka huhphenh lai,” a ti.

36. Bawipa vancungmi pakhat kha Assiria mi ralkap riahnak hmun ah khan a va kal i sing khat le sang riat le thong nga a va thah hna. A thaizing khua a hung dei tikah cun an thi phengphung ko. 37. Cu tikah Assiria siangpahrang cu aa let i Nineveh khua ah khan a kir.

Mi thalo mi hna nih an i tinhnak hmun phan kholo ding in Bawipa nih a kan veng lai ni cu ara lio. Vawlei cung mi phun vialte nih, tutan kan tuarnak le sungh zatlaknak thawngin, “ Anung Pathian Fa” kan sinak theih dihlai ni cu kan pawngte aphan cang! “Lungthin Ading Mi Lairam ” Bawipa nih an kaltak lo! Credit: Rev. Dr Paul Za Tlung Lian FB