Kumkhat Chung Ral Kan Dohmi Nih Hmailei Kan Dirhmun Kong Tampi Bia Achim Teh Lai.

Kumkhat Chung Ral Kan Dohmi Nih Hmailei Kan Dirhmun Kong Tampi Bia Achim Teh Lai.
=========
Lt- General Soe Win nih thlathum chungah PDF pawl anhram phelh lakin kan do dih hna lai, ‘tiah order achuah. An operation min ah Anowrahta min an phuah. Hi Anowrahta operation nih abikin raltuknak hmunhma a thimmi hna cu; PDF an tha tthawnbiknak Magway Divition, Sagaing Division le Kan Chinram hna hi, an si. Ralkap thazaang hi 25000 in 30000 hrawing ahman khawh men,’ tiah zumh asi.

Ral an tuknak hmunpi hram anbunhnak (command and control operation) hi ‘Tatmah’ 101 umnak Pakokku hi anhman. Pakukku hmun hi kan zoh tikah Magway Division le Sagaing Division alai bak ah aum mi asilawng siloin, KIA Tatmaha- 9 umnak zong he aanaih pin ah Kan Chinram he zong aa-naih ngai. Cucaah Anowrahta Operation hmunpi hi Pakukku an thimnak asi. Hi operation hi, General Than Hlaing le General Te Zah nih anhruai hna tiah theih asi.

Acunglei ka chiim bangkhan, Anowrahta raltuknak hmunhma hi akau ngai. KIA (tatmaha) 9 in aathawk i, Magway/ Sagaing le kan Chinram tiang hi a huap. Hi hmun raltuknak ah an thimnak a ruangcu; Kawl miphun lakah PDF thazaang an tthawnbiknak hmun asi pinah CDF thazaang athawng tuknak hmun zong asi caah asi, Khatlei ah NUG nih raltuknak hmunhma ah achiah nak hmun pi zong asi i, hmailei ah NUG an thawnbiknak hmunhma asi teh lai, ‘ti hi fiang ngai in ahmuh.

Cu pinah ‘hi hmunhma hi Kawlram nichuah chaklei in hriamnam a lutnak hmunhma asi caah hika lam hi kaphih khawhlo ahcun PDF le CDF pawl nih hriamnam fawi tein an lak lai i, ahnu ahcun ka doh khawh ti hna lailo ti hi aphang caah, hi hmun hna hi raltuknak hmunpi bikah ahun chiahnak hi asi.

Hi Anowrahta raltuk hi, kan zohtikah aitinhningin hmai akal hrim loh, Tahchunnak ah Nikhat meng 10 ka kal lai a timi kha meng 5 hrawnghrang lawng akal khawh. Aruangcu; PDF pawl nih ralthli in. ‘cu hlan nakin ankah khawh tikah hliamhma fakkhun in atuar, Vuipi kan hliam i akal kho setsai lomi bantuk khi asi, Khatleiah ralthli in ankah tikah, khoika lei indah ankah tikha atheih tilo pinah khoika indah anka bawh ti zong athei tiloh, Cucaah ralhmai sernak kha athei lo. Abikin Kawl rawn ah, hi thil hi aton caah a vai vuan, Hihi a raltuknak ah a sunhnak pakhat cu asi.

Atuning tein PDF nih hnahnawhnak anpek khawh hna peng ahcun kan Chinram ah a tunak tam ralkap thazaang hi achap kho men ti lailo tiah ka ruah, Aruangcu; atulio hi hmunkip cio in rak doh asi tikah, ‘cu hlan KIA, KNU, AA tibantuk apik apak in, atuk hna bantuk khan cun thazaang aneih ti lailo. Cucaah a tutan kan Chinram ah Anowrahta raltuknak a tuahmi hi zenh ding asi lem lailo, tiah ka ruah.

Atulio Kawlram dirhmun hi 1948 Independent kanhmuh kaa (zawngsungtapung) chanlio Communist Party Of Burma (CBP) anrak thawngtuk i, Kawlram pumpi hmunkip ah raltuknak anrak tuah i, Kawl ralkap an lungfim loin anrak tuah hna lio bantuk dirhmun kha asi. Khelkhat in kan chim ahcun ‘cuhlan tlangcungmi arak kantuk ton lio mi nakin a tulio a kantuk mi hi, alet in aihar deuh, Culawng asiloh…atulio ralhrang lungput hi, cuhlan bantuk an si tilo.

Hriamngan /miakpi in ankalnakding lam kha an kah hmasa lo ahcun ankal nagm tilo. Cun tatkhuai /tatsuh lawngin ralram an kal ngam fawn tilo, A tlombik ‘Tatyin’ lawngin ankal ngam cang, Tatyin in kal ti ah le an i phazo hoi tilo. Cucaah a tulio caan hi can thabik kan neih lio asi tininglaw kapalh ka zumh lo.

Zei paoh vasi aikun; A tutan Anowrahta Operation thla 3 chungah kan lim lai,’an timi hi anlim kho nemmam lailo. Kumkhat chunghrawng hi fakpi in akan doh lai i, a kantei lo ahcun anmah tein hnu ankir tthan teh ko ti hi zumhning asi, Kumkhat chunghrawng hi fek tein kan dirh-onh khawh hna asi ahcun apin lei khi cu a tulio bantuk in, kan re athei lem ti lailo ti hi ka ruahdom mi cu asi. Cucaah kumkhat chung hi cu kan thazaang um-ek in, kan chuah caan, a biapibik raltuknak caan ah kan chiah aherh lai tihi ka hmuhning asi.

Note: Hmailei zeidah acang khawh ti hi chim a harbik mi asi caah ka palh ahcun ka palh ka rak ti tthan teh lai. Van Neih Thang