Kum 2022 le Kawlram Thluachuah Ruahchannak!

KUM 2022 LE KAWLRAM THLUACHUAH RUAHCHANNAK
=========
Kum 2000, kumthar zanah, BAWIPA nih a rak ka hmuhtermi langhnak; Ka ihnak ah kawlnu hi a rak ra thliahmah i a kut dongin a ka sawh i, “Nan KHAMHTU a țum cang,” tiah a ka ti. Cun, a hun ka sawh țhan i, “Nan KHAMHTU a țum cang” tiah a ka ti țhan. Cun a let i a kir! A liam lai te ahkhin, siaherh ngai khin a hun i mer ta țhan i, a kut dongin a hun ka sawh țhan i, “Nan khamhtu a țum cang,” tiah a voithumnak a ka chimh țhan! Cun, van lei khi a kut dongin a hei sawh pahkhin, “MESSIAH cu,” a ti!

Hi kawlnu nihhin, a lu cungah țalawn pathum a thuatmi a hun i khinh pah! A tangbik le a pahnihnak țalawn cu an lawng i an cungah zeihmanh an um lo, an lawng ko! A pathumnak a cungbik țalawn ahcun facang a țha ngaimi, amu aa tello mi pawngkhat hrawng khi a um!

BAWIPA hmuhter mi hrimhrim a si caah hitihin Ka tuak; Țalawn aa khinh minu kha Kawlnu a si caah, kawlnu nihhin kawlram le mipi a hmuhsak! Țalawn cu facang vamhnak le thleinak a si caah, kawlram minung rai le ralin, hneksak, vamh le thlei kan sinak a hmuhsak!

Țalawn pathum nihhin kumthum a hmuhsak! kum 2020 le kum 2021 le kum 2022 an si. Țalawn pakhatnak le pahnihnak ah zeihmanh a um lo bantukin, kum 2020 le kum 2021 ah, rai le ral ruangah, kawlram mipi caah lunglawmh nak ding zeihmanh a um lo! Sihmanhsew, țalawn pathumnak ahcun, facangțha pawng khat hrawng a um caah a kum thumnak, kum 2022 ahcun, kawlram mipi caah a zatawk lunglawmhnak ding a um cang lai tiah ka tuak!

Kanmah Chin Miphun caah; “Nan KHAMHTU a țum cang, MESSIAH cu,” timi he pehtlaiin THIANG THLARAU nih, a philh bakin ka philh cang hnu, kum 2012 ah a hun nolh țhan i, David le Josep bantukin Thluachuah pek kan si nak ding cu fiang ngaiin a hun ka hngalhter țhan! Amen.

Kum 2020 January thla ah, fiang ngaiin Bible pahnih a ka pek țhan! Jer 29:11 le Hosea 6:3 an si. Jer 29:11 “Nan ca i ka tinhmi cu KEIMAH lawnglawng nih ka hngalh, tiah BAWIPA nih a ti. Cucu vanchiatnak si loin hmailei ruahchan nak le thluachuahnak caah a si lai.” Hosea 6:3 “BAWIPA hngalh cu i zuam u sih. Khua a dei hrimhrim lai bantukin, kan sinah a ra hrimhrim lai; Vawlei a hnawntertu ding țhal ruah a sur hrimhrim lai bantukin kan sinah a ra hrimhrim lai.

“Nan KHAMHTU a țum cang, MESSIAH cu,” ti le Hosea 6:3 i “BAWIPA cu ra hrimhrim lai,” ti hi Exodus 3:8 he hin zohchunh te u. Ni hmanung a rat lai cu a si rih lo. Chin/Lai Miphun hna hi BAWIPA PATHIAN nih a rianțuantu dingah a kan thim hrimhrim ko. Asinain thimmi hna nih BAWIPA PATHIAN Zaangfahnak le a Vel hi lunglawm taktakin kan cohlan thiam ve le a duhnak kan ruah le kan zulh ve a herh.

BAWIPA nih khi bantukin Chin miphun le Kawlram mipi caah, aa tinhmi langhnak a ka hmuhter mi hna an tlin khawhnak hnga, a biakam kengtu a sal pakhat ka si. Langhnak a dang zong an um rih ko hna. BAWIPA nih Vel le Daihnak in pe ko hna seh. KHRIH Lamkaltu, Tluang Lian (Martar). Credit: Even Tluang Lian