Kukki Chin Palik Pa nih a Hruai hna i Tamu Palik Sakhaan an Doh, Palik 5 an Thah Hna

Kukki Chin Palik Pa nih a Hruai hna i Tamu Palik Sakhaan an Doh, Palik 5 an Thah Hna
——–
Tamu khua ah CDM ah aa telmi Kukki Chin miphun palik Thong Hao Gin (kum 25) nih mipi a hruai hna i April 1 chun ah Tamu palik sakhaan an doh, tiah theih a si. Thong Hao Gin nih kutcheh bomb (grenade) pathum a ken i palik sakhaan an vung doh i palik 5 an thah khawh hna.

A rauh hlan ah ralkap nih Thong Hao Gin te cu an rak kah hna caah an dohmi palik sakhaan he meter 200 hrawng a hlatnak hmun ah Thong Hao Gin cu a ttang ah meithal nih a khen i a nunnak a liam. Thong Hao Gin ruak cu nihin zinglei sml. 9:00 ah an vung char khawh i zanlei sml. 2:00 hrawng ah ruakvuinak an tuah, tiah kan theih.

Gangaw-Kalay Karlak i Khuami pawl Chinram Tlangcung ah an Rak Zaam. Gangaw-Kalay lamthluan cung i khua pawl a simi Hakhalay, Sitha, Ngapha, Chaungkhuah, Natchaung, Tanphu le Aungchantha ah a ummi khuami 80% hrawng cu Chinram tlangcung ah an rak zaam hna, tiah kan theih. April 1 ah Myanmar ralhrang ralkap nih a cunglei khua pawl ah an lut i Lai meithal an i chiah le chiah lo khuabawi pawl cu meithal in an hmuah hna i an hal hna.

Khuami cheukhat thilri an hrawhpiak hna pin ah tangka le phone lakpiak a tongmi zong an um. Khuachung ah kan rak ra tthan lai an ti caah khuami chung in kum upa, nu le ngakchia deuh pawl Chinram tlangcung ah an rak zaam hi a si.

Tuzan ah Hakha Khuasa U Thar Aye an Tlaih. Hakha, Cherry Lam sang ah a ummi U Thar Aye cu tuzan sml. 7:30 hrawng ah Myanmar ralhrang ralkap le palik nih an tlaih, tiah kan theih. U Thar Aye hi Sipin zung ah rian a ttuanmi a si i, vuanci Ram Mang fanu i a va a si. The Chin Journal