Kuki- Chin miphun caah India ramchungah a dang te khuakhan Lairelnak an duh.
==========
Manipur State, India um Kuki-Chin Member of Legislative Assembly (MLA) pahra hna nih Chin-Kuki-Mizo-Zomi unau rual umnak tlanghrawn vialte cu a dang te in Khuakhan Lairelnak ngeih an duhnak kong cathanh in an langhter. Manipur hi MLA 60 umnak State pakhat a si i, MLA 10/11 hi Kuki -Chin hna nih hin an ngei kho peng tawn. Manipur ram pumpi zatuak ah 65 % cu Kuki-Chin umnak hmunhma le ram a si.
Tu thla (Biangreithlep) thlatir ah khan Metei miphun le Kuki -Chin miphun hna buaibainak ruangah minung tampi an thi i, Kuki-Chin inn le lo le khua pinah Biak Inn tam ngai duah le khangh a si.
Cu hnu ah cun hibantukin MLA 10 hna nih a dang tein khuakhan Lairelnak an duh nak kong cachuah an tuah hi a si.
Chin Ramchung, Mara hmunram ah Arakan Army an lut; Chinland Defense Force, Mara nih an chim ningah Chin ramchung Mara Miphun umnak khua cheukhat ah Arakan Army (AA) 60 hrawng cu 12 – Biangreithlep ( May) – 2023 ah khan an rak lut tiah theih a si. Hi AA hna hi Mara Defense Force (MDF) hna he an rak lut tti, ti zong kan theih khoh. MDF chungtel 42 hna cu Arakan Army sinah hin Ral lei thiamnak an va cawng i, an lim hnu ah Arakan Army hna he an hung luh hi a si.
Hibantukin Paletwa kongah Chin miphun hna he a buaibai lengmang mi Arakan Army hna Chin ramkulh chung ah zalong ngai in an hung luh tikah hin Chim mipi pawl thlalau thinphang ngai in an um.
CDF Mara lei nih cun zalong ngai in an tlawnlen ko ah cun kan zoh sawh hna lai lo. I kahnak zong a chuak kho mi a si” Tiah an chim fawn.
THEIHTERNAK LE NAWLNAK; Tukum 2023, Mizoram Board of School Education tang i High School Leaving Certificate (HSLC)/tanghra results chuakmi ah Distinction in hlawhtlinnak a hmu mi hna cu Lai Students’ Association, General Headquarters : Lawngtlai nih conglawmhnak ngeih an timh. Lai hritlai siangngakchia chung in hlawhtlinnak a hmu mi hna nih May 25, 2023 hlan ah LSA zungpi Lawngtlai, Electric sang ah pehtlaihnak tuah khawh a si lai i, General Secretary MC Vanlalrova Lai, Ph: 8730828233 sin zong pehtlaihnak tuah khawh a si lai. Pehtlaihnak tuah tikah a herhmi:-
1. Roll Number
2. Min
3. Nu/Pa min
4. Sang/Khua
5. Sianginn min le Address
Thlichia Nih Phaneng Khua Cu 99% A Hrawh, Luhchuah Khawh Loin SAC Ralkap Nih An Kham! Chin ramkulh, Matupi peng Phaneng khua cu thlichia ruangah inn 170 hrawng a rawk i, inn rawkmi hi zatuak in 99% hrawng a si. Cu chungah 1% tluk lawng a him i 2% hrawng hi a ning piin a rawkmi an si. Zatuak 8% tluk hi remh awk ṭhami an si lo, tiah The Matupi Times nih a ṭial.
SAC ralkap nih nawlngeihnak an laak hnu in Phaneng khua zatuak 60% tluk hi khua a hlummi an si. Thlichia nih minung umnak le um lonak inn zong a den dih. Inn rawkmi pawl remh ṭhan nak ding ah thirkhenh le chanpheo tibantuk an chambau ngai, tiah theih a si.
Hi kong he pehtlai in Phaneng khuami pakhat nih cun, “SAC ralkap nih Matupi in Phaneng khua chung luh khawh lo dingin lam an kham caah luhchuah khawh a si lo. Ukhruainak zung rianṭuanmi hna le a rawkralmi cazin latu hna lawng an luhchuahter hna. Atu tiang cu eidin ti rawl kong ah kan buai lo nain Inn rawkralmi remh ṭhan nak ding thilri kan herh. Chanpheo can ah ruahkham muka sawhsawh kan cih hna. Lo thlam ca ah kan rak hmanmi chanpheo kan khawmh hna i kan cih hna. Thlichia a hran i ruah a sur ṭhan sual ahcun kan cei ngai te lai,” tiah a chim.
SAC ralkap nih luhchuahnak lam an kham dih caah thlichia hrial in a zaam mi hna zong khua ah an lut kho rih lo. Matupi in chiti le cite tibantuk chanh an duh hna zong ah SAC ralkap nih gate an kham dih caah luhchuah khawh a si lo, tiah The Matupi Times nih a ṭial. Credite; The Phongpi Post