KNU Hriamtlai phu nih ralhrang tam taktak an thah khawh hna!

KNU brigade 3 hmunhma ah kahdohnak voi 70 leng a cang, SAC ralkap 80 leng an thi!
=========
KNU brigade 3 hmunhma ah a luancia September thlakhat chungah kahdohnak voi 70 leng a cang i cu kahdohnak ah cun SAC ralkap 83 an thi, 86 nih hliamhma an tuar tiah theih a si. KNLA battalion 7,8,9, KNDO battalion 3 le SAC ralkap kar a cangmi kahdohnak a si i, KNLA/KNDO le tualchung hriamtlai phu lei in minung 3 nunnak a liam i minung 12 nih hliamhma an tuar tiah theih a si.

SAC ralkap lei nih kahdohnak a chuah lio ah tualchung mipi hna umnak khuachung ah tinhchih in hriamngan an kah lawng si lo in, van lei kahdohnak zobg voi 3 tiang an tuah tiah theih a si. Mung pengchung khuahnih cu hramhram in an ṭhialter hna i, khuami pakhat an tlaih leng ah khuami pakhat an thah.

Cun SAC ralkap hriamngan kahnak ruangah tualchung mi 2 nunnak a liam i minung 3 nih hliamhma an tuar tiah theih a si. Myanmar ramchunh hmunkip ah a cangmi kahdohnak ruang ah SAC ralkap lei a thimi le hliamhma tuarmi hna kong ah SAC ralkap lei nih thawng thanhnak an tuahmi a um lo.

Khin U Peng Ah SAC Ralkap Nih Motor 127 Le Khualtlawng Mi 300 Leng Zarhkhat Chung An Hren Cang Hna. Sagaing ramṭhen, Khin U peng ah SAC ralkap nih lam an kham caah motor 127 le khualtlawng mi 300 leng cu, zarhkhat leng an hren cang hna, tiah tualchung mi hna nih an chim.

Shwe Bo pengkomh Khin U peng Ye U-Nyaungpinkyi Suh-Nyaungpinthar-Shwe Bo motor lampi cu SAC ralkap nih, a luancia September 30 in lam cu thetse tom in an kham caah Ye U-Shwe Bo lam in a kalmi motor 127 le khualtlawng mi 300 leng cu zarhkhat leng an hren cang hna, tiah theih a si.

“Hren a tongmi khualtlawng 300 leng cu pawngkam khuami hna nih rawl voikhat ei ah kyats 1,000 in an zuarh hna. A lak in rawl a petu zong an um,” tiah Khin U khuami pakhat nih a chim.

SAC ralkap nih Khin U peng cu pehtlaihnak, eidin le lam an phih hna i, Kandaw in Tikone(ကန်တော်, သီးကုန်း) khua karlak lam vialte zong an phih dih. Inn hmai ah an chiahmi cycle hna zong pakhat hmanh tang loin SAC ralkap nih cycle 60 leng an lakpiak dih hna. Liecence a ummi cu kyats sing 2 in an tlanhter hna.

Liecence a um lomi cu an pe ti hna lo, tiah theih a si. “Khin U peng cheukhat hmun ah cun datsi, chiti le eidin dangdang hna zong a lut kho ti lo. SAC ralkap nih facang, i pehtlaihnak, tangka, um kalnak lam hna cu phih dih an i tim,” tiah tualchung mi hna nih an chim.

Mandalay Mi An Tamnak Hmun Ah Tthilchuhnak A Chuak, Nu Pahnih Thah An Tong. Mandalay, mi ai chawkhlatmi an tamnak no.72 lam, 118/119 lam kar ah nihin October 6, zinglei suimilam 4:00 hrawng ah sidawr pakhat cu misual nih an luhhnawh hna i nu pahnih a thah hna tiah tualchung mi nih an chim.

Thah a tongmi nu pahnih hna hi chungkhat an si tiah theih a si. Cu misual nih cun sui le phaisa zeimawzat ai kalpi tiah theih a si. Mi nunnak lak in thil a firtu mi sualpa cu kan tlaihkhawh cang tiah SAC ralkap le palik lei ṭang media hna nih an langhter na in, misual pa tlaihkhih a tonnak kong ah fehter khawh a si rih lo.

Mandalay khuachung lampi ah thil chuhnak, misial damiah nih mi nunnak thah le inn cheukhat luhhnawh in thil firpiak tibantuk cu nitin ngawt in a cang tiah theih a si.

Janpan Rammi Hmanthlak Thiam Kubota Cu SAC Nih Thong Kum 10 Thlak Dingin Bia An Khiahpiak. Yangon ramṭhen, Taungdagon peng ah hmanthlak thiam (Filmmaker) Toru Kubota cu, SAC ralkap uk duhlonak a langhtertu hna he a luancia July 30 ah an rak tlaih hna i, nizaan October 5 ah SAC nih thong kum 10 thlak dingin bia an khiahpiak, tiah theih a si.

Janpan Media cheukhat nih, Toru Kubota cu Yangon ramṭhen, Taungdagon peng ah a luancia July 30 ah ralkap uk duhlonak a langhtertu hna he hmunkhat ah SAC ralkap nih an rak tlaih hna, tiah an ṭial. Toru Kubota cu electronic pehtlaihnak upadi in taza an cuai i kum 10 thong thlak ding in bia an khiahpiak. Cun Lah Wah Kah upadi phung a buar caah dantatnak an tuah rih, tiah Janpan Media cheukhat nih cun an langhter. Credit: The Chin Post