KIO Chairman Bochokkyi N Ban La Nih Min Aung Hlaing cu a Caan A Dongh Deng Cang tiah a chim cang!
KIO Chairman Bochokkyi N Ban La Nih Min Aung Hlaing cu a Caan A Dongh Deng Cang tiah a chim cang!
==========
NUG, PDF, EAOS le mipi kutsitbu tein riantuanti dingah thazaang peknak a tuah. Hramhram in mipi uknak latu Min Aung Hlaing hruaimi ralhrangbu pawl cu an dongh caan a phan deng cang, tiah KIO Chairman Bochokkyi N’Ban La nih kumthar thazaang peknak a chimmi ah a telhchihmi a si, tiah KIO/KIA thawngzamh phu lei tuanvo ngeitu Bohmukyi Naw Bu nih a chim.
KIO Chairman Bochokkyi N Ban La nih biacahnak a chimmi cu Kachin holh in an chuahmi a sinain Bohmukyi Naw Bu nih a konglam cu a chim thanmi a si. Kawlram chungah NUG, PDF nih hriamtlai in Min Aung Hlaing an doh cuahmah lio caan a si. Cun, EAOs tlangcung hriamtlai phu pawl zong nih ralhrang pawl cu doh cuahmah a si tikah Min Aung Hlaing hruaimi ralhrangbu pawl cu a donghnak caan lawng a tang ko cang, tiah a chim.
Cucaah, tlangcung hriamtlai phu dihlak le NUG, PDF hriamtlai phu pawl lungkhat le lungrual tein hmailei karhlan ti ding le kahdohnak tuah ti dingah biacahnak a tuah hi a si, tiah Bohmukyi Naw Bu nih a chim. Cu hnu ah 2021 kum chungah ralhrang nih uknak hramhram in an lak hnu ah mipi pawl nih harsatnak an tuarnak kong le Covid – 19 zawtnak a phan ruangah mipi pawl nih thihlonak tamtuk kan tuarnak kong zongah KIO Chairman Bochokkyi N Ban Lan nih mipi thazaang peknak le zawtnak kong he pehtlai in zulhphung tha tein zulh dingah forhfialnak zong a chim chih.
Kawlram chung daihnak a um khawh nakhnga, Federal Democracy hmuh khawhnak ding caah lungrual tein kan kal ti a hau tiah Bochokkyi N Ban La nih a chim chap. Kawlram chung buaibainak vialte hi kan dihlak in kan tawlrel lawngah Federal Democracy ram ah kan ser khawh lai. EAOs tlangcung hriamtlai phu, Mipi ralkap le NUG cozah kan i bawmh dih a hau, tiah a chim.
2021 kum chungah covid -19 zawtfahnak le ralhrang nih uknak hramhram in an lak ruangah thinlung sifaknak a chuakter i, chawlehthalnak lei le fimthiamnak lei, ngandamlonak vialte kan tuar dih. 2022 kum chungah mipi kan dihlak in nuam caan hman kum si hram seh, tiah Bochokkyi N Ban La nih kumthar biacah ah a chim.
Kan kalnak ding lamthluanpi hi lungrual tein kan kaltti lawngah teinak kan hmuh khawh lai, tiah biacahnak a chimmi cu Bohmukyi Naw Bu nih a chim chapmi a si. KIO hriamtlai phu kut tang a simi Kachin Independence Army cu ralhrang nih uknak an lak hnu March thla thawk in ralhrang uknak biatak tein an dohtu tlangcung hriamtlai phu pakhat an si.