KIA Hriamtlai Phu Kah Tih Ruangah Ralhrang Phu Nih Thluak An Hmang Ve Cang

KIA Hriamtlai Phu Kah Tih Ruangah Ralhrang Phu Nih Thluak An Hmang Ve Cang
=============
Ralhrang tapung phu nih KIA hriamtlai phu kah ding an tihtuk caah thil phorh tilawng pawl cu thetse rawnmi sawngkhoi in runvennak tuah dingah Bhamo Khuipi lei ah kal an itimh, tiah thawngpang theih a si. Mandalay tiva kam ah a dirmi Pataing le Pinlung tiin min pekmi cozah ta thil phorh tilawng pawl cu ralhrang tapung pawl nih minung, eiding le hriamnam pawl phorh dingin Bhamo khuapi lei ah kal dingin timhtuahnak an ngeihnak kong cu thawngpang theih manh a si hoi.

Ralhrang tapung pawl nih hi thil phorh tilawng pi cu thetse rawnmi sawngkhoi le motor ke tayan ti bantuk tampi in an khuh dih i special tein timhtuahnak an ngai, tiah thawngpang a chuak. Hi tilawng pi cu ramchung tilawng lei kalternak nawlngeitu zung (Department of Inland Navigation) nih an ngeihmi a si. Thilri phorh le minung a phorhmi cozah tilawng a si nian atu ahcun ralhrang tapung pawl nih an i lak cang i, anmah minung le eiding tirawl pawl phorhnak caah an hmang cang, tiah theih a si.

Atu tan hi tilawng pahnih cu minung le eiding pawl phorhter dingah an izuam cuahmah lio pi a si. Irrawaddy tiva pi ah ralhrang tapung pawl nih tilawng in an ralkap, hriamnam le eiding pawl an rak phorhmi cu KIA hriamtlai phu nih an rak phomh peng hna caah atu hi a vun izuam than mi a si, tiah thawngtheih a si. Tutan ralhrang tapung pawl nih tilawng an kalternak ding hi Mandalay in Bhamo lei ah an kalter lai, tiah thawngpang theih cia a si cang.