Mindat Khuachung Sangli Telh Lo Mindat Peng Chung Paoh CDF-Mindat Nih An Humhak Dih Cang
=========
Chin ramkulh thlanglei Mindat khuachung sangli lawng SAC ralhrang nih an uk i a dang a tangmi paoh kan humhak dih cang tiah CDF-Mindat tuanvo ngeitu pakhat nih a chim. Mindat khuachung SAC ralhrang umhmunkhuar nak le khualuh nak gate zong CDF-Mindat nih a tu le tu an kah lengmang hna caah ralhrang lei hliamtuar le a thi mi an tam.
“Mindat khuachung sangli dah ti lo Mindat peng chung paoh CDF-Mindat nih kan humhak dih cang, mipi ukhruainak rian le humhimnak kongkau zong kan mah tein kan i tawlrel dih cang tiah chim khawh a si. Mindat khua chung lawng ah SAC ralhrang an cawlcang ngam cang, mah hmanh ah an i chawnhvah ah hin rallam sial phun in an i chokvak.
Aroh hlan ah kahdohnak tuah dingin kan i timhtuah lio a si,”tiah CDF-Mindat Information tuanvo ngeitu pakhat nih a chim. Aluan cia June 11 lio ah Mindat khua in nichuah lei um SAC ralhrang gate pakhat cu CDF-Mindat nih an rak kah hna caah ralhrang 1 a thi, mah pin ah June 13 lio zongah an kah than hna i ralhrang lei 2 hliam an tuar tiah CDF-Mindat nih thanhca an rak chuah.
2023, June 24 zan ah Myanmar ram aiawh in a hmasabik UFC ah aa thong dingmi Salai Joshua Van cu thazaang ka pek tlai, tiah Aung La Nsang nih a chim. “Myanmar ram aiawh in UFC ah mi hmasabik na si i, a voi khatnak aa thongding zong na si. Ṭihphannak zeihmanh ngei loin hmai ah kan fong lai, kan in dirpi” tiah Aung La Nsang nih thazaangpeknak bia a chim.
Sagaing ramṭhen, Shwebo peng, Sin-inn khua ah umhmun a khuarmi pyusawhti 4 hna cu facang phurh dingin timhlamhnak an ngeih lio ah tualchung hriamtlai phu hna nih an kah hna i, an 4 ningin an thi pinah hriamthil hna zong an laak chih khawh, tiah NUG cozah in runvennak vuanci nih nihin, June 21 ah thawngthanhnak a tuah.
Kahthah a tongmi pyusawhti ralhrang 4 hna cu 2023, June 20, nizan zanlei sangah Sin-inn khua le Myin-si khua karlak ah mipi ralkap PDF fonh Shwebo pengkomh Battalion 4 le Sininn khua Pah-kah-phah nih an kahdoh hna hi a si, tiah a langhter.
Mipi ralkap fonh nih an laak chihmi hriamthil hna cu meithal zun 4, kuan fang 296, kut cheh bomb 3, kuan bawm 4 le kuan khamnak ṭang phaw 4 hna an si, tiah NUG runvennak vuanci nih a langhter chih.