Miphun ca nun pek cio cio zong ah an i lo rua lo
====
Zahan ah kan Chin ralkap pathum(pathum) nih nunnak an pek. Ngaihchiatpi nak cabia nan tial ciomi ka zoh tikah a dang pahnih cu an nung than rua hlah maw, pakhat lawnglawng kha upatnak sang bik kan in pek nan ti dih ko. Dohthlennak ka tuah ai ti i millionaire ai chuahmi nuhrin covo hotu pate le CNF upa tampi lila zong nih minung pakhat lawng nan char dih ko ee.
An thih ah bulhnak tuah cu a tha tuk, nain zapi theih deuhmi an thih lawng ah bulhnak nan tuah tawn. Zahan ah pathum an thi ti ko nain Olivianu Cinzah nih pakhat ca lawng ah bulhnak a tuah hoi ko. Thleidannak a sang tuk hringhran ko, ngaihchia taktak khi a si. An dih lak caah tuah ding a har ahcun tuah lo lawlaw a tha bik hnga. Pakhat lawng an ngeihmi nunnak an pek ciomi asi caah an i khat dih, tuhnu ah cun aho hmanh thleidang hram ti hlah u sih. Crd-Salai Lungthli Tum
Midang nih cun thihnak hmun ralzam ah kal ding ah an chawva tampi thawh in thazaang an in pek zungzal hna, nain kei nih cun huat phun zakip i huah in thihnak ralram hrial ding ah Chin mino pakhat hmanh nunnak a liam hlan te in ka rak in thlauh peng cang hna. Tuni tiang ka hlawh a tling hlei lo, mino nunnak mansung a liam chap lengmang ko, hrial i tim hlei loin kan nak a let za thawng deuh tihnung ral kha pah chih lengmang ding thazaang kan i pek pengmi ka hmuh ah ka thinlung fah a zual. Nunnak a pe ding mino an dih cikcek tik lawng ah maw hrial ding kan i fian te hnga? Mino nunnak a liam cia le a liam rih ding ka tuak ah ka lung a kekkuai.
Uico ralkap hna thaizing kan ralkap hna an hmunhma an luh tikah i kahnak um hraw loin kan miphun ralkap nih hrial ko hna sehlaw ka va duh dah. Victoria camp zong nunnak liam hraw lo tein kan ralkap nih hrial chung ko hna sehlaw ti hi tulio ka thlacam a si. I kap taktak ahcun uico ralhrang lei tampi an thi ko lai nain kanmah kan thisa unau tampi nunnak a liam ve lai. Kan tahnak mitthli kan hnawt cawk lai maw? Kan miphun lungfahnak le ngaihchiatnak kan tuar kho te hnga maw?
Hriamnam lei kan i ready hlan atu lio kan dirhmun in ral nganpi tuk kan i awt ahcun kan i tinhmi ‘ralkap cozah thlak’ or ‘Chinram in uico ralkap vialte thawl dih in mah tein i uk’ timi a si kho rih lai lo. Kan hriamnam pei ai thlau tuk rih cu. A theipar a chuak rih lo dingmi ral tuknak ah ka hawile le ka unau tampi nunnak a liam ding khi ka siang bak lo. Victoria camp an lak zong ah CNF tinhmi an lak kho lai lo, kan nunnak le kan miphun dawtnak lungthin an lak khawh lo a biapi. Camp cu zakhat hmanh kan ser than te ko lai. Camp Victoria zamtak chung khi Chinram zam tak a si hrimhrim lo mu.
Zeizong vialte a tlinter khotu kan Pathian tu nih kan ralkap hruaitu hna lungthin ah riantuan sehlaw kan miphun caah a tha bikmi biachahnak tuahter hram ko hna seh.
Kanmah le siaherhnak cu kan langhter cio ko lai nain hruaitu hna nan biachahnak tanpi ding cu kan dihlak kan rian a si ko. Nan kah hna zong ah siseh, nan hrial hna zong ah zakhat ah zakhat kan in tanpi ko hna mu. Ka miphun ka dawt i ka siaherh tuk ve caah i sum kho loin ka vun tialmi a si. Keimah pumpak caah thahnemnak pakhat te tal hmanh a um lo ding le tampi nih nan ka huat ding, nan ka doh lai ding zong ka hngalh cia ko mu. Crd-Salai Lungthli Tum