Myanmar Ram Pumpi In Ni Hnih(24 & 25 July) Chung Kahdohnak Ah SAC Ralkap 137 An Thi Myanmar ram pumpi in July 24 le July 25 ni hnih chung kahdohnak ah SAC ralkap 137 an thi. Tualchung hriamtlai phu lei in ralkap 6 nih ram le miphun ca ah an nunnak an pek. Ni khat chung SAC ralkap a thi mi le mipi ralkap nunnak liam mi hna cazin langhtermi hi tualchung hriamtlai phu hna nih an langhtermi le an chimmi cazin chung in kan langhter, tiah Khit Thit Media nih a ṭial.
July 24 chungah Bago ramṭhen in SAC ralkap 43, Chin ramkulh Kanpetlet ah 12, Karen ramkulh ah 8, KNU brigade 6 hmunram ah 10, Sagaing ramṭhen ah 14, Shan ramkulh ah 3, an dihlak ralkap 90 an thi, tiah theih a si. July 25, 2023 ni khat chung kahdohnak ah Sagaing ramṭhen in SAC ralkap 25, KNU brigade 6 in 11, Tanintharyi ramṭhen in 6, Magway ramṭhen in 5 an dihlak ralkap 47 an thi. July 24 le 25, ni hnih chungah SAC ralkap 137 an thi, tiah Khit Thit Media nih a langhter.
Tualchung hriamtlai phu lei in July 24 ah Bago ramṭhen in 1, Chin ramkulh Kanpetlet ah 1, KNU brigade 6 hmunram ah 1, Karen ramkulh ah 1, an dihlak ralkap 4 an nunnak a liam pinah July 25 ah, KNU brigade 6 in ralkap 2 an nunnak a liam, tiah Khit Thit Media nih an langhter. Credit: TCP
Relchap: Chin Ramkulh Kanpetlet Peng Kahdohnak Ah SAC Ralkap 20 An Thi Chin ramkulh, Kanpetlet peng ah thazaang 100 hrawng he rallam a sialtu SAC ralkap hna cu Chin ralkap le PDF phufonh nih an kah hna i SAC ralkap 20 an thi, tiah NUG runvennak vuanci zung nih nihin July 26 ah a thanh.
2023, July 24 zinglei suimilam 8:27 in suimilam 7:52 tiang Kanpetlet peng Mawchaung le Hlaingdot kar ah rallam a sialtu SAC ralkap ṭatmah 88 le khahlahyiah 304 in thazaang 100 hrawng cu tualchung ralkap phufonh nih an kah hna. Cu kahdohnak ah cun SAC ralkap 10 an thi, mipi ralkap lei in ralkap 4 hliamhma an tuar, tiah an thanh.
Cu ni ṭhiamṭhiam July 24, zaanlei suimilam 5:00 ah SAC ralkap ṭatmah 88 kuttang um, khahmahyiah 301/307 phufonh in thazaang 150 hrawng nih rallam an sial ṭhan caah CNA/CDF, PDF phufonh he kaphnih kar kahdohnak a chuak ṭhan. Cu kahdohnak ah cun SAC ralkap 10 an thi i, hliamhma tuar zong an tam. Tualchung ralkap phufonh lei in ralkap 5 hliamhma an tuar.
SAC ralkap hna nih Magway ramṭhen le Chin ramkulh uk ding in thazaang tampi he rallam an sial pinah hriamngan le vanlawng hmang in kahdohnak an tuah nain tualchung ralkap phufonh nih lungrual tein kan rak doh hna, tiah NUG runvennak vuanci zung nih a langhter. Credit: TCP
Relchap: Khampat Khua Kahdohnak Ah SAC Ralhrang 13 An Thi, Khuami 3,000 Leng An Zaam Sagaing ramthen, Tamu pengkulh, Khampat khua kahdohnak ah SAC ralkap 13 an thi tiah Mipi ralkap lei nih an chim.
Helicopter in an hun chiah mi SAC ralkap an kalnak lam ah mipi ralkap nih bawhtonh in an kah hna caah ralhrang lei 13 an thi tiah theih a si. “Chunnitlak kahdohnak a um. Hriamngan kahnak cu ruah sur bantukin ralhrang lei nih an kah ko. Anmah lei mi 13 an thi. Kan mah lei ralkap pakhat an khen” tiah Tamu PDF battalion 4 hruaitu Bo Khant nih a chim.
Kalaymyo lei in SAC ralkap cu tanglei in an ra ngam lo caah Helicopter nih ralkap cu khua nichuah-chak lei leikuang ah a vun chiah hna. A hnu ah Helicopter cu Kanaan leikuang ah a tum ngam tilo caah an mah sakhan pawng ah a thumh cang hna. Tuhi Mawlaik leiin ralhrang minung 50 tluk kee in ramtang in an ra cuahmah tiah theih a si.
Khampat kahdohnak pehtlai in, Tamu peng Mipi ralkap hruaitu pakhat cu SAC nih an tlaih hnu ah mah bantuk in kahdohnak hi July 22 zaan suimilam 8:00pm ah Khampat No. 1 um mi SAC ralkap sakhan le police sakhan cu Tamu peng ummi hriamtlai phu dihlak fonh nih an kah hna. June 23 ah Khampat khuachung leikuang lei kap ah kahdohnak a ummi ah SAC lei 2 an thi, cu kahnak hmun aah mipi ralkap nih kuan tampi kan lak khawh tiah Bo Khant nih a chim chap.
Khampat kahnak ah SAC nih hriamngan in khuachung an kahnak ah no. 1 RC biakinn hmai bom thla ruangah Pu Nga Nga a fapa cu a khen caah a nunnak a liam tiah theih a si. Kahdohnak a um hnu Khampat, Kanaan le pawngkam khuami 3,000 hrawng cu khua chuahtak in khua he naihnak ramlak le India, Letpanchaung, Kalaymyo khua lei ah an tli/zaam tiah theih a si. Credit: The Chinland Post
