Khah!! Sexy Unau Nan Mwe San le Thin Zar Wint Kyaw cu an lo cikcek cang ko hi teh!!

Model Nan Mwe San thong kum 6 thlak ding in bia an khiah
===================
Model Nan Mwe San cu Article 33 (A) in thong kum 6 thlak ding tiah bia an khiah tiah SAC leiṭang NOM nih September 27 ah a thanh.

Article 33 in sualphawt mi Model Nan Mwe San cu Insein thong nih thong kum 6 thlak ding in bia a khiah i Lemcang Tin Zar Wint Kyaw zong Mayangon biaceih zung ah a sualnak an zohfel lio a si tiah theih a si.

Tinzar Wint Kyaw le Nan Mwe San cu rian le thong kum 7 thlak khawh a si mi Article 33 (A) in SAC nih August thla chungah sual a rak phawt hna. Crd-The Chinland Post

RELCHAP, (Photo dang) Demoso Kungtha kahdohnak ah SAC ralkap 15 an thi, mipi hriamtlai 1 a nunnak a liam, Karenni ram, Demoso peng, Kungtha khua September 26 zaanlei ah a cangmi kahdohnak ah SAC ralkap 15 nak tlawm lo an thi i mipi hriamtlai pakhat hriamngan ci nih a peh i a nunnak a liam tiah KRU sin in theih a si.

“Sianginn ah hmunhma a khuarmi SAC ralkap pawl kan kah hna lioah kum 18 lawng a si rih mi kanmah lei hriamtlai pakhat a nunnak a liam, SAC ralkap pawl zong kan kahmi hriamngan nih a khen hna, an hrumai thawng kan theih” tiah KRU thawngthanhnak rian ngeitu Ko Lin Lin nih Mizzima ah a chim.

Kungtha khua ah caan saupi hmunhma a khuar cangmi SAC ralkap le Karenni hmunhma hriamtlai hna karlah ah kahdohnak atu le atu a chuak i tutan kahdohnak zong hi SAC ralkap hriam pawl lak khawh ding in an kah mi hna a si ko nain kahdohnak chung ah SAC ralkap nih 120MM lung 30 hrawng an hman. Ngwetaung, Loikaw, Daung lei in hriamngan kah an bawmh hna caah hriam an la kho lo tiah a chim.

CDF Thantlang, Battalion 4, Zahnak Nih Thlakhat Chungah Sehchoh Kuung 17000 An Hrawh, CDF Thantlang, Battalion 4, Zahnak nih thlakhat chungah Sehchoh kuung 17000 an hrawh tiah theih a si. Hi sechoh hrawhnak cu August 20 ni in thok a si i September 23 tiang kalpi nak chungah kuung 17000 hrawh a si.

“Sechoh cinmi le zuahmi a um rih ahcun mah tein hrawh dih ding, a thar in cin hrimhrim lo ding le cawk le zuarnak tuah lo ding, cu zulhphung a zul lomi cu tazacuai nan si lai” tiin sechoh he pehtlaiin CDF TT, Battalion 4, Zahnak nih mipi theih dingah thawngthanhnak a tuah tiah theih a si. Sechoh le rithaisii dangdang a um lonak hnga dingah CDF Thantlang nih biatak tein a kalpi cuahmah tiah theih a si.

SAC nih Matupi khuachung luhchuah an phih, khuami khualeng chuahnak nawl an pe hna lo,Chin ramkulh Matupi khuachung khuachuahnak lam cu SAC ralkap nih an phih caah, tualchung mi hna khualeng chuah in khualtlawn le thilphorh tibantuk an kham hna tiah theih a si.

Matupi ah cuhlan ah tualchung mi hna khualtlawn an duh a si ahcun khuabawi theihpinak in khualtlawnnak nawl a um nain, nai tan in cun cu bantuk theihpinak ca zong in khualtlawnnak nawl an pe duh ti hna lo tiah Matupi khuami pakhat nih a chim.

“Khuachung luhchuahnak lam an phih cang, thla hnih hrawng phih an timh tiah kan theih, Mindat lam lei cu flag a sen muici an thlai, cu hlan ah cun kan hmu ballo, cu ka hmun lonh ahcun kahnak nawl an pek cang hna tiah kan theih, a tulio cu a hohmanh khualeng chuakmi an um lo” tiah Matupi khuami pakhat nih a chim.

SAC ralkap hna nih cun Matupi khualuh chuahnak lampi 3 simi Matupi-Mindat, Matupi-Hakha le Matupi-Paletwa motor lampi ah checknak gate tuah in mi zeihmanh umkalnak nawl an pe hna lo tiah theih a si. A tubantuk in caan sau lampi an phihkham ah cun tualchung mi hna caah harnak a chuak kho tiah Matupi khuami pakhat nih a chim.

BBC media ah rianṭuan tu Ma Htat Htat Khine cu rianhrang ṭuan in kum thun chung thongthlak ding ah biakhiahnak an tuahpiak, BBC media ah thawngpang a chimtu Ma Htat Htat Khine cu nihin September 27 ah Insein thong biaceih zung nih rianhrang ṭuan in kum 3 chung thong thlak ding ah biakhiahnak an tuahpiak theih a si.

Mingalar Taungngyunt(မင်္ဂလာတောင်ညွန်) pengah sualpuhnak an tuahmi poh-mah 17/1 caah kum 3 chung thongthlak dingin biakhiahnak an tuahpiak hi a si. ” Nihin, September 27 ah a tubantuk in biakhiahnak an tuahpiak hi a si, Insein thonginn biaceihzung nih biakhiahnak an tuahpiak, kum 3 chung thongtlak lawng si loin rianhrang ṭuan zong aa telhchih” tiah biakhiahnak tuahpiak mi he naihniam mi pakhat nih a chim.

Ma Htat Htat Khine cu a luancia 2021, August thla lio zongah poh-mah 505(a), poh-mah 17(1) he sualpuh in tazacuai a rak tong i, kumkhat a rauh hnu ah poh-mah 505(a) caah lum 3 thongthlak dingin biakhiahnak an tuah hnu ah, nihin ah biakhiahnak an tuahpiak chap hi a si. 2021, February 1 in kumkhat leng chungah tlaihkhih a tongmi media rianṭuantu 100 leng an si cang, cu chung ah cun luatnak a hmucang mi hna zong an um i, cheukhat cu thongtla ding in biakhiahnak tuahmi zong an um.

Loikaw Ah Sniper Kahnak In SAC Ralkap 7 An Thi, Karenni ramkulh Loikaw peng Kayantaya ah umhmun khuarmi SAC ralkap cu tualchung hriamtlaiphu sniper phu hna nih an va kah hna i SAC ralkap 7 an thi tiah theih a si.

Nihin zing suimilam 10 hrawngah Central Region Task Force Sniper phu le KNDF battalion 02 sniper phu hna i fonh in Kayantaya ah um mi SAC ralkap cu an kah hna tiah theih a si. Cu kahdohnak ah zing sumilam 10 in 12 kar ah SAC ralkap 7 kan thah hna tiah Central Region Task Force in chimphuannak nawl ngei tu nih a chim. SAC ralkap leizong nih sniper le hriamngan he a kah ko nain tualchung hriamtlai phu lei in hluam tuar um lo tein hnu kan tolh kho tiah a chim chap.

US Vice President Kamala Harris Korea Demilitarized zone A Tlawng Lai! US Vice President Kamala Harris cu North Korea le South Korea ramri Demilitarized zone cu september 29 ah a tlawng lai, tiah South Korea tuanvo ngeitu hna nih an chim. Vice President Kamala Harris cu september 27 ni ah S.Korea Prime Minister Han Duck-soo he Japan ah an i ton hnuin atu bantukin Korea Demilitarized zone tlawm a timh hi a si. Kamala Harris nih hruaimi US palai hna cu Japam Prime Minister hlun Shinzo Abe ruak thlahnak a tel dih khawh in Korea Demilitarized zone ah cun a kal lai.

Korea ramhnih kar raltuknak a dih hnu kum 70 a rauh hnu ah N.Korea tlerh khawnhnak a tong cuahmahmi S.Korea le US ralkap hna tha peknak ah a kalmi a si, tiah US tuanvo ngeitu hna nih an chim. Kamala Harris cu Demilitarized zone a kal hnu in US ralkap hna he tonnak a ngei lai i S.Korea humhimnak ah US biakamnak cu a pehzulh lai, tiah theih a si.

Tharrawaddy thonginn ah ramkhel lei thongtla tukvelh an tong, si thlopnak nawl an pek hna lo caah an takvun pel hna cu an thu, Bago ramṭhen, nitlak lei Tharrawaddy thonginn ah ramkhel lei thongtla hna cu faktuk in an tukvelh hna caah an hliam hma hi a thumi rim a nam i, rungrul tiang an chuak na in sii thlopnak nawl an pe hna lo tiah thonginn he naihniam in ummi hna sin in theih a si.

‌”An tukvelhnak hna hliamhma an taksa in rim ṭhalo an chuak, tholung nih a lunh hna nain zeihmanh an tuahpiak hna lo, Insein thonginn in rak ṭhialmi thongtla pakhat zong Three responsibilities( ဒို့တာဝန်အရေးသုံးပါး) hrawh a si cang tiah a chim ruangah tukvelh a tong” tiah thonginn hna he naihniam in ummi pakaht nih a chim.

Thonginn chung ah buaibainak le hnachehnak a umlonak ding caah Chai in chaih le thongcong hna nih tukvelh a si. An chungkhar zong nih sii-ai an kuat tik hna ah thonginn chung a phanh lo lengah sii peknak nawl an phihkham hna caah hliamhma fak a tuarmi zong an um nain ngandamnak lei ithlopnak nawl an ngeilo tiah theih a si. Thong inn chung thongtla an hrem hnanak ruangah Haa ngei ti lo mi le, Hnar thi chuakmi, chungril hliamtuar mi an tam tiah theih a si.

Hriamngan Khennak In Karenni Democratic Front(KDF) Ralkap Pakhat Nunnak A Liam, Karenni ramkulh Demosu, Konethar kahdohnak ah hriamngan kuan khennak in kum 18 hrawng simi Khun Soe Paing Thu (ခွန်စိုးပိုင်သူ)Karenni Democratic Front (KDF) ralkap pakhat a nunnak liam tiah KDF nih cathanh an chuah. Konethar khua ah umhmun khuarmi SAC ralkap pawl KRU le PDF ṭangrualphu hna nih an kahdoh hna lio ah atubantuk in a nunnak liam hi a si.

SAC ralkap he kan i kahdoh lio ah hriamngan kuan nih a khen i zing suimilam 10:25 ah a nunnak a liam. Nunnak a liammi kan ralkap Khun Soe Paing Thu nangmah cu hramhram uknak latu SAC ralkap dohnak ah na nun na pek bantukin KDF nih a sangbikmi upatnak le miralṭha sinak kan in pek tiah an cathanh ah an langhter. Konethar khua kahdohnak ah hin SAC ralkap 15 an thi, KRU lei in ralkap pakhat nih hliamfak a tuar, SAC ralkap leinih hliamngan tamtuk an hman ruangah KRU lei hnu an tolh ṭhan tiah theih a si.

SAC le CDF Matupi Kar Kahdohnak Ah SAC Ralkap 4 An Thi, CDF Matupi Ralkap Pakhat A Nunnak Liam, Chin ramkulh Matupi, nihin september ni 27 kahdohnak ah SAC ralkap 4 an thi i CDF Matupi in ralkap pakhat a nunnak liam, cu kahdohnak cu zing suimilam 7 in kan thok i suimilam 3 tluk hrawng a rau tiah CDF Matupi nih cathanh an chuah.

SAC ralkap le CDF Matupi kar pehtlai in kahdohnak a chuak kho mi a si caah mipi lei nih um kal i ralrin ding in an cathanh ah cun an langhter chih. Kahdohnak ah SAC ralkap 4 an thi 6 nih hliam an tuar, kan ralkap pakhat nih ram le miphun caah a nunnak a pek tiah CDF Matupi in ṭuanvo ngeitu pakhat nih a chim.

September 24 thok in rallam a rak sialmi SAC ralkap thazaang 200 hrawng le CDF Matupi kahdohnak cu september 24 le 25 ah kan i kap i SAC ralkap a tlawmbik 7 an rak thi i hliamtuar zong an tam, CDF Matupi lei in kan ralkap pakhat zong nih hliam a rak tuar tiah a chim. SAC le CDF Matupi kar kahdohnak cu voithum tiang a chuak cang i SAC ralkap lei in 11 an thi i 14 leng nih hliam an tuar, CDF Matupi lei in ralkap pakhat a nunnak a liam i pahnih nih hliam an tuar tiah theih a si.

Paletwa peng ah ummi SAC ralkap sakhan 5 telhin sakhan 9 AA nih an lak, Rakhine ralkap AA nih zarhkhat chung ah Paletwah pengah ummi SAC ralkap sakhan 5 le Rakhine ramkulh chungum SAC ralkap sakhan 4 tiin sakhan 9 cu an lakkhawh tiah theih a si.

August 25 ah Chin ramkulh, Paletwa pwngchung Hnamata(နှမတာ) sakhan, Tahtaykone(သူဌေးကုန်း) sakhan, Takachaung(သကာချောင်း) sakhan, Abaunhta khua sakhan, Kyaityakai(ကြက်ယာကိုင်း) khua sakhan hna le August 31 ah Rakhine ramkulh mengtung 40 sakhan (Myanmar-Bangladesh ramri), Mitait(မီးတိုက်) ramri hngak umnak sakhan, Kyingchaung(ကြိမ်းချောင်း) sakhan le khah-mah-yiah 352 battaliom sakhan hna cu Rakhine ralkap AA nih an lakkhawh tiah theih a si.

Kanpetlet peng ralzaam dirhmun ummi minung 5000 leng nih bawmhnak an herhngai, Chin ramkulh, Kanpetlet peng kumkhat le cheu leng chungah ralzaam dirhmun in a ummi minung 5,441 an si i bawmhnak a petu an tlawmtuk caah bawmhchanh an herh ngai tiah Kanpetlet peng zatlang uktu phu nih cathanh an chuah.

Kanpetlet ralzaam dirhmun in a ummi hna cu Magway ramṭhen, Saw peng ralzaam sakhan hmun thum le Kanpetlet peng ralzaam sakhan hmun hnih ah an i dor chung hna tiah theih a si. Ralzaam mipi hna cu Facang, chiti, cite, pee, muu-ca(မိုးကာ), naupawi le ngakchia caah a herhmi ngandamnak thilri, siangngakchia caah cauk, khedan, saya/sayamah hlan man, sii-ai, din ti le zunpi kalnak ding caah tiin bawmhchanh an herhngai tiah theih a si.

US Intelligence Hlun Edward Snowden Cu Russia Mi Sinak An Pek! US National Security Agency(NSA) biathli pawl cu mipi theih ah a rak phuangtu Intelligence hlun Edward Snowden cu Russia rammi sinak an pek, tiah theih a si. Russia rammi sinak pekmi kong cu President Putin nih september 26 ah a minthut in a thanh. Kum 49 a simi Edward Snowden cu 2014 lio ah, US mithong tampi caah rian a tuanmi National Security Agency nih an thiltuahmi le an biathli pawl cu mipi theih a phuan hnu ah Russia ram ah a rak zaam.

US nih Edward Snowden cu a tuahmi sualnak ruang ah tazacuai ding in US ah van kua than ding in Russia cu kum tampi a hal nain Russia nih cun a kua duh lo. 2020 ah a nupi Lindsay Mills le a fa zong Russia rammi sinnak an rak sok ve. Edward Snowden nih US National Security Agency biathli a phuanmi cu a dik lo mi thiltuah a sinain rampi leirawi tu a silo tiah, Russia President Putin nih cun 2017 ah a rak chim bel.

Loikaw Peng SAC Ralkap Sakhan Cu KNDF Nih An Kah Caah SAC Ralkap 2 An Thah Hna, 5 Nak Tlawm Lo Hliamhma An Pu, Loikaw peng Nualawu(နွားလဝိုး) khua pawng tlangpar ah umhmun khuarmi SAC ralkap sakhan pakhat kan kah caah SAC ralkap 2 an thi i 5 nak tlawm lo hliamhma an pu, tiah KNDF Battalion 12 nih cathanh an chuah.

Nizaan September 26 zing sml 6:00 hrawngah Nualawu khua lamṭhen tlangpar ah umhmun khuarmi SAC ralkap cu KNDF B-12, KNDF B-14, KNDF B-02, No.1008 Battalion SSRY le KA hna i bawm in an kah hna, tiah theih a si. Cu kahdohnak ah SAC ralkap 2 an thi i 5 nak tlawm lo hliamhma an pu. SAC ralkap seh meithal zun khat zong kan hrawhpiak hna, tiah an langhter.

SAC ralkap nih hriamngan tam tuk an kah caah KNDF ṭangṭi phu cu zing sml 9:30 hrawng ah hnu kan kir. KNDF ṭangṭi phu lei in ralkap 4 hliamhma hme an pu, tiah ralkap pakhat nih a chim. SAC ralkap tam tuk nih Karenni ramkulh ah rallam an sial caah KNDF ṭangṭi phu hna nih an kah hna i, zen-kuan le eidin an har ngaingai cang caah mizapi sinah bawmhhalnak an tuah, tiah theih a si.

Palaw Peng Ah SAC Ralkap Bomb Puahhnawh An Tong, Ralkap 5 An Thi, Shan ramkulh, Palaw pengah Nan Hteik Aung(နန်းထိုက်အောင်) operation min in SAC ralkap motor cu, bomb kan puahhnawh pinah meithal in kan kah hna, tiah Myeik pengkomh Battalion 1 nih nizaan September 26 ah cathanh an chuah. September 26 zing sml 7:18 ah Myeik khua in a kalmi SAC ralkap motor cu, PDF ṭangṭi phu hna nih Tapu(တပို) khua pawngah voikhat, 7:53 ah Kyaukpazun(ကျောက်ပုဇွန်) tlang pawng ah voikhat bomb in kan puahhnawh hna tiah an langhter.

September 26 zing sml 9:30 hrawng ah Palaw khua in Myeik lei a kalmi SAC ralkap motor cu, PDF ṭangṭi phu hna nih kan kah ṭhan caah SAC ralkap 5 an thi. PDF lei a thimi le aa hliammi um loin hnu kan kir kho, Myeik pengkomh Battalion 1 nih an langhter. Cu kahdohnak ah SAC ralkap nih duh paoh in hriamngan le hriamhne in an kah caah tualchung mi 3 hliamhma an pu, tiah Myeik pengkomh Battalion 1 nih cathanh an chuah.

Tedim B.E.H.S No(1) Sianginn Ah Siangakchia 7 Sinin Covid 19 Zawtnak Hrik An Hmuh Caah Sianginn An Khar, Chin ramkulh, Tedim B.E.H.S No(1) sianginn in siangngakchia 7 sinah nizaan September 26 ah covid 19 zawtnak hrik an hmuh caah zawtnak a ngeimi siangakchia 7 hna an cacawnnak khan cu an khar, tiah theih a si.

“Covid 19 zawtnak hrik a ngeimi hna siangakchia 7 hna cu Tedim sii-inn ah an kalpi hna i, sii thlopbulnak an ngeih hna. Anmah an cacawnnak khan lawng an khar. Siangakchia 7 hna cu covid zawt kham sii aa chunmi an si. An ngandamnak tucu a ṭha ko,” tiah tualchung mi pakhat nih a chim.

“Covid zawt kham sii aa chun cangmi an si caah a si kho men, Oxygen pek hau phun cu an si lo, an zawtnak zong a zualmi a si lo,” tiah a chim chap. Siangngakchia 7 sinah covid 19 zawtnak an hmuh hna caah Tedim B.E.H.S NO(1) sianginn cu caan karlak chung khar a herh, tiah covid 19 zawtnak lei a tawlreltu pakhat nih a chim. Tedim khua ah covid 19 second wave chungah covid in a zawmi minung 15 hrawng an si i, 8 hrawng cu sii-inn in an chuak kho cang. A dang 7 cu sii-inn ah an um rih ko, tiah theih a si.

Chin ramkulh, Hakha Cawbuk sang CCU lampial, Saint John sianginn pawng hrawng ah kahdohnak a chuak , Chin ramkulh, Hakha Cawbuk sang CCU lampial, Saint John sianginn pawng hrawng ah kahdohnak a chuak, tiah theih a si. Hakha ummi pakhat nih, “Nihin September 27 zanlei sml 1:45 hrawng ah Hakha Cawbuk sang CCU lampial pawng hrawng ah Chin ralkap nih SAC ralkap an kah hna. Meithal thawng a thang tuk i kan lau tuk. Khoika in dah an kah hna ti zong hngalh khawh a si lo,” tiah The Chin Post ah a chim.

Nihin zing Hakha thar lamruk tonnak ah Chin ralkap nih SAC ralkap an thahmi ruak cu cawbuk thlan hmun ah an vui i a si kho men. Cucaah Chin ralkap nih an kah hna i a si kho men, tiah tualchung mi nih an chim. Cawbuk sang kahdohnak a daih in SAC ralkap motor pathum cu Cawbuk sang lei ah an kal, tiah mithmutu hna nih an chim. Cawbuk sang kahdohnak ah SAC ralkap lei in a thimi le aa hliammi an um le um lo theih a si rih lo.

Banbuai Khua Um Pyusawhti Le SAC Ralkap Cu PDF Ṭangṭi Phu Nih An Kah Hna Caah 4 An Thi, Sagaing ramṭhen, Yinmarbin peng Banbuai khua ah umhmun khuarmi SAC ralkap le pyusawhti an sakhan cu, nizan September 26 zaanlei ah PDF ṭangṭi phu hna nih naih tein an kah caah SAC ralkap le pyusawhti 4 an thi, tiah theih a si.

Banbuai khua ah Nah Mah Khah Monywa (အလုံ) in SAC ralkap 80 tluk le pyusawhti an um i, PDF ṭangṭi phu hna nih hriamngan le hriamhme he kan kah hna pinah sniper in kan kah hna, tiah Golden Triangle Force (GTF) hruaitu bawino Min Hkawng nih a chim. Cu kahdohnak ah meithal kuan tlawm tuk lawng kan ngei i, a kan zawh ti lo caah hnu kan kir. Meithal kuan tampi ngei usihlaw khua chung tiang kan lut lai i kan kah hna kai, tiah GTF hruaitu pa nih cun a chim.

Demoso Peng Konethar Khua Ah Umhmun Khuarmi SAC Ralkap Kah An Tong I, Ralkap 15 An Thi, Karenni ramkulh, Demoso peng Konethar(ကုန်းသာ) khua ah umhmun khuarmi SAC ralkap cu, PDF ṭangṭi phu hna nih nizaan September 26 ah kan kah hna caah SAC ralkap 15 an thi, tiah KRU phu in ṭuanvo ngeitu pakhat nih a chim.

Karenni dohthlennak phu (KRU) le ṭangṭi DMO PDF Battalion A hna i bawm in September 26 zaanlei sml 4:30 in zanlei sml 6:00 tiang SAC ralkap cu an kah hna caah kaphnih kar kahdohnak a fak. SAC ralkap nih hriamngan 120mm in voi tam tuk an kah hna caah KRU ṭangṭi phu cu hnu an kir, tiah theih a si. “An sakhan lak ding in kan kah ko hna nain hriamngan 12mm in voi 40 hrawng an kan kah caah zeitin hmanh in an sakhan lak khawh a si lo. SAC ralkap 15 kan thah hna i, kanmah lei in ralkap 1 aa hliam caah hnu kan kir ṭhan.

Konethar khua phungki umnak le sianginn ah umhmun khuarmi SAC ralkap pawl cu, kan kah hna i hliamhma pumi zong an tam. Cheukhat cu an hrum an ai thawng kan theih hna. Lam nai tein kan i kap caah SAC ralkap an tlawm ngaingai. Ralkap thazaang an zor ngai cang caah hriamngan lawngte in an kan kah. A thimi hna an meithal zong lak khawh ding a si ko nain, hriamngan in an kan kah tuk caah kan la kho hna lo,” tiah KRU in ṭuanvo ngeitu pakhat nih a chim.

Black God Guerrilla Phu An Hriamnam Serchuahnak Sakhan Pakhat A Kaang, Kyats Sing 600 Man Hrawng A Ciam, Sagaing ramṭhen, Yinmarbin pengkomh ah hram a bunhmi Black God Guerrilla phu i, hriamnam serchuahnak sakhan pakhat cu ruah lo piin mei kanghnak a chuah caah kan hriamnam serchuahmi cu an kaang dih, kanmah cu kan him, tiah Black God phu nih cathanh an chuah.

A luancia September 18 zing ah khan Black God Guerrilla phu i hriamnam le zen-kuan sernak sakhan pakhat cu ruah lo piin mei kanghnak a chuah caah hriamngan, hriamhme, meithal kuan, zen, bomb le seh thilri hna cu an kaang dih. Kyats sing 600 man hrawng a ciam lai, tiah an langhter.

Black God phu in ṭuanvo ngeitu Moe Set nih, “Hriamngan kuan kan ser cuahmah lioah ruah lo piin a kaang, zen kan chuannak um zong mei nih a tlaih chih caah a ciam dih, sakhan chung a ummi hriamnam le thilri vialte cu an ciam dih ko. Ralkap tu cu kan him,” tiah a chim.

Black God phu cu NUG runvennak zung MOD nih Yinmarbin pengkomh Battalion 11, Companny 3 dirhmun in a cohlanmi a si i, NUG kuttang a ummi PDF an si. 40mm, 60mm, 80mm, 100mm le 120mm hriamngan kuan hna anmah tein an ser i, SAC ralkap a doh cuahmah tu an si.

CDF-Matupi Brigadier Nih Non CDM Pawl Ralrin A Pek Hna, Chin ramkulh, Matupi peng CDF-Matupi hmunram chungah Non-CDM um lo ding in September 22-25 tiang khuate lei ah CDF-Matupi Brigadier le a kuttang ralkap pawl cu an tlawng i, khuami hna he biaruahnak an ngei, tiah CDF-Matupi nih cathanh an chuah.

Brigadier nih Non-CDM pawl cu SAC ralkap an rianhma a kal khawhnak dingah bawmtu an si i, CDF-Matupi nih a uk penmi hmunram chungah Non-CDM tam deuh cu sianginn cachim an si. Atu thok in SAC kuttang rianhma a kal lo dingah CDM tuah ding in ralrin peknak bia a chim, tiah theih a si. Cu pinah Brigadier nih Non-CDM pawl cu SAC kuttang ah rian nan ṭuan rih a si ahcun CDF-Matupi nih ralrinnak an pek cangmi hna ning in a fak bik dantatnak kan in pek hna lai, tiah a chim. Crd-The Chin Post