Russia Nih Ukraine Kahnak Ah SAC Sermi 120MM Hriamngan A Hman SAC nih an sermi 120mm hriamngan kuan hna cu Russia nih Ukraine kahnak ah a hman, tiah Ukraine lei nih an thanh. A puak lomi 120mm hriamngan kuan hna cu Ukraine lei nih hmanthlak langhter in, Russia le Ukraine kar kahdohnak ah Russia ralkap nih an hman mi, Myanmar serchuahmi kuan a si, tiah an thanh.
2023, March 9 ah SAC nih an sermi hriamnam hna cu Russia nih a cawk lai, tiah Khit Thit Media nih an rak langhter. SAC kuttang um hriamnam sernak sehzung nih a ser chuahmi hriamnam le kuan hna cu Russia nih cawk ding in aa timh caah Russia ralkap aiawhtu cu Myanmar ah rak tlawng in hriamnam cawknak ding kong ah biaruahnak an ngei, tiah an rak langhter.
2022, November 28 in December 2 tiang Russia ralkap bu in deputy chief of army staff, Colonel General Kim Aleksey Rostislavovich le a a hawile Naypyidaw an rat lioah SAC ralkap nih a ser chuahmi hriamnam cawknak ding kong ah biaruahnak an rak ngei chih, tiah Khit Thit Media nih a ṭial. Credit: TCP
Relchap: SAC Ralkap Nih Chuah A Timhmi Tangka Kyats 20,000 Tlap Cu Phungning Lo A Si Tiah NUG Nih An Thanh SAC ralkap nih a thar chuah an timhmi tangka Kyats 20,000 tlap cu phungning lo a si, tiah NUG cozah nih an thanh. Hramhram uknak a latu SAC ralkap nih tangka thar Kyats 20,000 tlap chuah ding in timhtuahnak an ngeihmi cu SAC kuttang um central bank nih a ra laimi July 31 ah kan phawtzamh lai, tiah 2023,July 23 ah thawngthanhnak an rak tuah.
SAC nih phaisa thar chuah a timhmi hi phungning lo a si. SAC a chan saunak ding le mipi cungah serhsatnak fakchin in an tuah khawh nak ding ah tangka an herh ruangah a si. Cucaah hramhram in nawl ngeihnak a latu SAC kuttang um central bank nih a chuah dingmi Kyats 20,000 tlap hi NUG cozah nih kan cohlan lo. Hi tangka a chuak dingmi hi phungning lo a si tiah thawng thanhnak kan tuah, tiin NUG caan karlak central bank chairman U Tin Htun minthut in cathanh an chuah. Credit: TCP
Relchap: Paletwa Peng Ah SAC Kuttang Um Khuabawi Pakhat Tlaih A Tong Chin ramkulh, Paletwa peng, Shinlatwa khua ah SAC ralkap kuttang um khuabawi pakhat cu aho si theih lo mi hriamtlai nih July 25, zaan ah an tlaih, tiah tualchung mi nih an chim.
“Tlaih a tongmi khuabawi pa hi a hlan ah palik a rak ṭuan bal mi a si i, culio ah cun rithaisii ruangah kum saupi thong ah a rak tla mi a si. Shinlatwa khuabawi a ṭuanlio mi pa cu a nunnak a liam caah amah aiawh in khuabawi an ṭuanter i, a ṭuannak zong a sau rih lo,” tiah tualchung mi hna sin in theih a si. SAC ralkap le palik phu hna nih hmunkip ah runvennak an tuah ko nain khuabawi pa cu a umnak inn cia ah tlaih a si, tiah an chim.
“Khuabawi pa tlaih a ton hnu ah, umkalnak lam an phih dih i, lo zongah kal khawh a si lo. SAC ralkap nih hmunkip ah khuabawi pa cu an kawl,” tiah tualchung mi hna nih an chim. Shinlatwa khua cu a luancia July thla zarh khatnak ah CNA le SAC ralkap an rak i kahnak khua pakhat a si. Credit: TCP
