SAC cunglei nih Karen Ramkulh kahdohnak ah raltuk duhlo Ralbawi Commander an tlaih hna Karen ramkulh, Myawaddy Peng i Lat Khet Taung le Tower tung tlang kahdohnak ah cunglei nawlpek um lo in Sakhan chuahtak in hnu a pilmi Kawl Ralhrang ralkap Battalion Commander Lieutenant Colonel le Major ralkap bawi pahnih cu SAC cunglei nih an tlaih hna tiah KNU center nih thawngthanhnak a tuah.
July 21, zing 5 am ah SAC ralkap caah ral runvennak hmunrem ngai a si mi Lat Khet Taung phayakung le Tower tung tlang sakhan kung cu KNLA, Brigade -6 battalion bawi Bo Da Baw hruaimi tangrual mipi hna nih a va kah hna. SAC lei kap a thi mi le hliamtuar an tam tiah theih a si.
Mah kahdohnak ah SAC lei LID-battalion 2, LIB- battalion 118, phu 2 konh ralkap 60 hmun an umnak tlang a si i, mipi ralkap nih an sakhan a va kah lio ah cunglei nawlpek (order) um lo in an sakhan chuahtak in hnu an pil ruangah battalion commander Lieutenant Colonel Ar Kar Aung le commander Major Kyaw Tu Maung bawi pahnih cu SAC nawl ngai duh lo sualnak (case) in Mon ramkulh, Kyaikto thonginn ah an hrem hna tiah KNLA- cobra operation hruai tu Bo Da Baw nih a chim.
Kahdohnak ah chawnhbiak khawhmi seh 1, 60mm kuan 60, hmaitonh khawh mine 6, motor terh mine 9, Jammer seh 2, bom kawlnak seh 2, setlet meithal 1, commando 60 mm meithal 2, RPG zen kuan 3, RPG bom 1, 7.62 kuan 1880 le 5.56 kuan 302 cu mipi ralkap nih an lak khawh mi a si. Credit: The Chinland Post
