2008 Phunghrampi A Um Chung Paoh Cu Federal Democracy Rampi Kan Ser Kho Lai Lo — NUG Prime Minister “Aung San Suu Kyi thonginn in a chuah zong ah SAC ralkap a hram in bongh dingin timhtuahnak kan ngeihmi le Federal Democracy rampi ser dingin kan ṭuanmi cu aa thleng hrimhrim lai lo,” tiah July 31 zanlei suimilam 4:00 ah tuahmi NUCC le NUG meeting ah NUG Prime Minister Mahn Win Khaing Than nih a chim.
“Aung San Suu Kyi hi thonginn in chuak sehlaw NUG nan kalning nan thleng lai maw tiin biahalnak tete a um. Cu kong he pehtlai in Aung San Suu Kyi a chuah zong ah NUG kan hmuitinh le kan khelhmi hi kan thleng hrimhrim lai lo. Mizapi duhnak in kan kal lai, Aung San Suu Kyi zong mizapi duhnak a zulmi a si.
2008 phunghrampi a um chung paoh cu Federal Democracy rampi kan ser kho lai lo. Cu ruangah ralhrang ralkap hna hi a hram in kan bongh hna a hau. Kan dihlak tein lungkhat, thinkhat in kan ṭanṭi ahcun kan tei hna lai,” tiah Prime Minister Mahn Win Khaing Than nih cun a chim.
NUG President Duwa Lashi La zong nih, “Federal Democracy kan cahren chungah hramhram uknak a hram in bongh ding le Federal Democracy rampi ser ding hi a si. A biapi bik zong a si fawn. Zeibantuk harnak, hrocernak le tlerhkhawnnak hmanh um ai kun, ralhrang ralkap hna an bia deu ah kan tluk lo ding a biapi,” tiah a chim ve.
NUCC le NUG meeting ah atu lio aa thleng cuahmah mi ramkhel kong he pehtlai in ceihmainak an ngei i, Federal Democracy an cahren ningin hmailei karhlan ding le ṭangṭi phu organization hna he rianṭuanṭi dingin biachahnak an ngei, tiah Khit Thit Media nih a ṭial. Credit: TCP
Relchap: Hakha ah mifir nih inn an bauh i tangka an fir Nizan July 31, Hakha khua, Leisen sang ah mifir nih inn an bauh i tangka an firpiak hna tiah kan theih. Inn ngeitu hna cu thlacamnak i an kal kar ah mifir nih an inn an bauhpiak hna. Inn zong tha tein an hrenh ta ko nain chun laipi ah mifir nih inn an bauhpiak hna hi a si i tang ka Kyats sing hnih an firpiak hna tiah kan theih.
“Hakha ah hin miphun kan i cawh tuk cang i mizei an si ti chim awk zong a tha ti lo. Hmailei ah mi dang zong i ralring cio hna sehlaw, kanmah zong kan i ralrinnak tu si hram seh,” tiah min langhter a duh lo mi inn ngeitu nih a chim. Ralkap nih nawlngeihnak hramhram in an laak hnu in Hakha khua le hmun tampi ah fir le inn bauh tibantuk a karh i, Pyosawhtee tiah ruah mi pawl zong nih Hakha khua ah mi ramhnak tiang a chuak cang. Credit: The Hakha Post
Relchap: Ralhrang nih Thongtla 7749 luatnak kan pek hna tiah an thanh,tlangcung hriamtlai le ramdang thongtla, luatnak pekmi minlist cu a dang tein an taar ve. Su Kyi le Win Myint kha case( မူ) tampi in tazacuai an si tikah case (မူ) 3/4 lawng khan an luat ter hna nain case dang tampi a taan rih caah luatnak taktak pek an si lo tinak.
Case dang in tazacuai an si ko rih. Cun a tu hi hakha ah Hakha khuachung lamtte kipah ralhrang an um dih caah khuachung chawhvah i ralrin cio ding si lai muh. A herh hualo tuk ah Tlaihkhih hna kan ton sual ah cun a poi tuk lai. A tu lio Ralhrang hi a ho dah kan tlaih lai timi mitlawng te an au le I ralring ko hna u sih. Credit: Salai William
Relchap: State Counsellor Daw Aung San Suu Kyi le President U Win Myint an luat taktak lo SAC ralhrang nih Kawlram President U Win Myint le State Consellor Daw Aung San Suu Kyi an tazacuainak tlawmpal kan ngaihthiam hna tiah thawng an thanh. Aung San Suu Kyi a upadi Pa nih a chim ning, ‘upadi 19 in tazacuai a si i, mah chungah 5 in dan an tatmi kha zeimaw an ngaihthiam a si, tiah a chim.
SAC ralhrang nih thong an thlakmi dantatnak an ngaihthiam khawh men tiah thawng a vai lio ahkhan, NUG nih cun ralkap nih zei ti a tuah paoh ah kan dirhmun ai thleng lai lo tiah a rak thanh. Biachokvai a kalning ah tutan ralhrang a tuahmi hi SAC nawlngaihnak thla (6) a peh chapmi, ASEAN le Tuluk kong hrawng ah a si timi a um.
Relchap: Hpa Ann Thanlwin Hlei Pawng Bom Puaknak Ah SAC Lei A Thi Mi Le Hliampu An Tam Karen ramkulh, Hpa-Ann peng, July 31 zingka 6: 48 ah Thanlwin hlei checkgate pawng bompuaknak in SAC ralkap le police telh in zungkip fonh duty a la mi tampi hliam an tuar tiah Khit Thit Media nih a chim.
“Ralhrang lei an thi mi milu an zat fiang in theih a si rih lo. Gate a riak/ih mi le a hngak tu security riantuan pawl an um. Hliampu mi zong an tam” tiah hlei pawng ummi hna nih an chim. Police lei thlihri in kuatmi ca (telegram) ah Thanlwin hlei hngak tu police a thi mi 1,hliampu 7 le mipi lei hliampu 3 an dihlak hliampu 10 an si tiah police thawngpeknak in theih a si.
Bompuah mi Thanlwin hlei (Hpa-Ann) hi, Hpa Ann le Myaingkale khua donhhlei a si i, hlei cungah motor pahnih kalnak lam le minung ke in umkal kho mi hlei a si. 1994 kum ah Thanlwin hlei donh hranm an thok i, August 3, 1997 kum ah General Than Shwe nih hlei onnak an rak tuah. Credit: The Chinland Post
