Kawlram Zong Ukraine Buainak Bangin Fak Taktakin Dantatnak Pek A Hau!

Kawlram Zong Ukraine Buainak Bangin Fak Taktakin Dantatnak Pek A Hau!
====
March 21 ah khan Geneva ah UN-Nuhrin covo tawlreltu council sinah an pekmi Kawlram nuhrin covo kong he pehtlai in Kawlram nuhrin covo kongah special palai pakhat simi Tom Adrews nih a cunglei bantukin a chim tiah VOA nih a langhter.

SAC ralhrang ralkap nih nawlngeihnak a laak hnu kum khat tlinnak tiangah UN nih tonbiaruahnak le cathanh chuah tiang lawng an tuah i, SAC ralhrang ralkap cungah fak taktakin dantatnak pekmi a um rih lo tiah amah nih a chim.
Kawlram mipi nih cun UN nih cathanh chuahmi kongkau ah an lung a rawk tuk cang bangin a sim tuk cang fawn i, a fak bikmi dantatnak pek dingmi lawng an hngahhlang cang tiah a chim.

Kawlram ralkap ralhrang nih nifatin tein thahnawnnak le ningcang loin tlaihkhihnak le sualnak phunkip cu an tuah cuahmah buin dantatnak ing tuar loin an luat lengmang tiah a chim chih. Kawlram chungah hramhram tlaihkhih le thahnawnnak hna hi Kawlram ralkap ralhrang nih timh ciam tein an tuahmi a si tiah a chim chih.

Min Aung Hlaing Cu Cambodia Le Japan Prime Minister Nih An Nawl! Hramhram Le Ningcanglo Sual Rakthlak Tuahnak Cu Ngol Dingin Cambodia Le Japan Prime Minister Nih An Nawl! Japan Prime Minister nih Cambodia ah nihnih chung a tlawnnak ah ramhnih pehtlaihnak, Kawlram le Ukraine konglam zong an i ruahrel hnu March 20 ah ramhnih i fonhin thawngpang fianternak an chuahmi ahcun Kawlram kong he pehtlai in a cunglei bantukin cathanh an chuah.

Cupinah hriamnam a ngahnak lampi hna zong ngol ding, remdaihnak a chuah khawh nakhnga ramkhel buainak kong he pehtlai in aa telmi paoh he lungsau thinfual in rdaihnak kawl ding, ramkhel ruangah tlaih a tongtu hna cu thlah than ding, democracy phung sersiam than dingin siseh ramchung buainak a daih cang nakhnga halnak le nawlnak an tuah tiah theih a si.

Yangon ah a ummi ramkhel kong capar tialtu nih prime minister pahnih halmi le nawlnak cu cohlan ding a si nain a takin tuahserhmi a um lo caah zeihmanh thatnak a chuahpi lai lo tiah a chim. Nawlnak le halnak an tuahmi cu embassy chim lo a dang zeihmanh a um lo. Min Aung Hlaing caah embassy i phihkhamnak le dantatnak cu zeihmanh a si lo tiah a chim.

Prime Minister (2) hna nih Asia ramchung nih a ngeihmi zulhphung (5) hna cu tlamtling tein zulh dih dingin an nor nain Asia ramchung le vawlei cung ramdang dang hna he i fonhin Kawlram chungah bawmchannak pe kho dingin ceihtinak an ngei tiah theih a si.

ASEAN Envoy Myanmar A Phan, Suu Kyi ai ah NLD Hotu Su Su Lwin A Ton Lai. (PPST le Party pawl he biaruahnak an nei lai.). ASEAN Envoy to Myanmar Prak Sokhonn cu tuchun March 21-23 tiang caam dingin Kawl- ram Nyphydaw aphan. Gen.Min Aung Hliang he tonnak an nei hnu’ah, 22/3/22 ah Tlangcung hriamthlai pawl PPST hruaitu Colonel Khun Okkar pinah ULA/AA aiawh in Dr. Aye Maung le hruaitu dang pawl he ton biaruahnak an nei lai ti’ah theih asi. 23/3/22 ah Myanmar ram Party- 23 aiawh hruaitu pawl he an i ton hnu’ah NLD Party aiawh in NLD CEC member hlun le Daw Aungsan Sukyi he aa kom bikmi Daw Su Su Lwin he special tonnak an nei lai ti’ah theih asi.

Daw Su Su Lwin hi President hlun U. Thin Kyaw nupi asi. Sukyi hoikom tha bik an timi asi i,1990 -2010 Sukyi Innthong (House Arrested)lio zong ah khan Sukyi cu caan saupi a va umpi tawn. A Pa hi Colonel(Rtd) U Lwin, 1990 Election lio ah khan NLD Central Secretary asi i, Yangon Ram- then Tungkhuah(သုံးခွ မြို့နယ်) in MP ah thim a rak si na’in Kum saupi Ralkap nih thong an rak thlak.

Amah hi 1988 buai lio ah khan Rangoon University(RASU) English Department ah Caa- chim Senior Lecturer arak tuan. RASU in MA English a dih hnu’ah, Australia ramah Sydney University in MEd a lak tha’n. Amah hi NLD in 2012, 2015 le 2020 ah a Pa U Lwin MP tlinnak Tungkhuah Constituency in Phytuh Hlawhdaw ah thim arak si cang.

President hlun U Thin Kyaw (2015-2018) Nupi Daw Su Su Lwin le Yangon i um NLD MP cheu khat hna nih hin, Japan Envoy Sa Sa Kawa nih Yangon arat lio ah khan an rak ton cang i, bia hlithup tampi an rak i ruah cang hna pinah Sa Sa Kawa nawlnak in Daw Aungsan Sukyi zong thong an thlaknak A-30 Zebuh-thirih Inn ah ton nak SAC Ralkap Cozah nih an siam piak cang ti’ah an chim. Daw Su Su Lwin hruaimi NLD MP hi ramchungah MP-113 an um ti’ah theih asi.

Tlangcung hriamthlai AEO’s phu-10 lakah Phu- 7 cu PPST hotu Colonel Khun Okka hruai nakin ASEAN Palai hi “Peace-talk” remdaihnak kong an i ceihhmai hna lai. Colonel Khun Okka nih cun, tulio ramchung kahdohnak daihter hmasa bik nak ding ca’ah ” Joint Peace Committee” kan dirh ahau.

Cun, Mi harsa Mipi ca’ah bomh nak pek dingning kong kan i ceih hna lai ti’ah a chim. March-10,2022 ah khan PPST, RCSS, KNU, SNDP le KNPP hruaitu hna nih Thailand Ram, Chaingmai khua ah Japan Palai Sa Sa Kawa hi an rak ton cang hna. Cun, Sa Sa Kawa nih hin March 7ah khan Cambodia PM Hunsen le ASEAN Palai Prak Sokhonn hi arak ton cang hna.

February 17,2022 i ASEAN Foreign Ministers pawl Phnom phenh, Cambodia ah Meeting an neihnak ah Malaysia, Indonesia, Singapore le Philippine Ministers pawl nih cun, Peace-talk ah hin NUG i telve dingin ASEAN Envoy le SAC Ralkap sinah halnak an nei cang na’in SAC lei Spokesman Zawminthun nih cun cohlan an si lai lo ti’ah arak chim cang.

President U Win Myint le Daw Aungsan Sukyi hi “Peace-talk”ah an i tel ve lo ah cun, zeipipa daihnak hmanh an siamkhawh zumh asi lem loh.Tak tak ti’ah cun, Sukyi hi a tlamtling dih kan ti khawh lo na’in, a tu Myanmar Ram Mipi 100 ah 65% nih cun a mah tluktu le thlak kho tu dingmi an um rih loh ti’ah an ruah rihmi asi.

Prak Sokhonn hi Cambodia Industry Minister Cham Prasidh, ASEAN Secretary General Lim Jock Hoi, ASEAN Coordinator and Executive Director(AHA) Lee Yam Ming, Cambodia Senior Officials pinah AHA- ASEAN Staffs riantuanmi 30 leng nih an rak zulh lai ti’ah theih asi. Credit: MC Biklian