Kawlram Muidawh Hanlay cu ralhrang kut ah an ap te hnga maw!

SAC Ralkap A Dohtu Kawlram Muidawh Hanlay Bangkok Ah An Tlaih
=========
Miss Grand International a simi Hanlay cu September 22 ni ah Bangkok ah Thailand cozah nih an tlaih tiah theih a si. Hanlay an tlaih timi cu theih a si nain zeiruangah dah tlaih a si timi bel theih khawh a si lo tiah Thailand ram News hna nih an langhter.

Hanlay cu 2021 kum March thla dih ah rak tuah mi muidawh zuamnak hmunah SAC ralkap nih hranhram uknak an laak mi kong zapi theih in a ra phozaar ruangah SAC ralkap nih tlaih dingin an timhlamh, cuti an timhlamh caah Kawlram lei kir kho ti loin a um mi kawlram muidawh pakhat a si.

Myinkin peng kahdohnak ah mipi ralkap nih ralhrang ralkap 10 leng an thah hna! Myinkin Peng Kahdohnak Ah PDF Nih SAC Ralkap 10 An Thah Hna. Sagaing ramṭhen, Myinkin pwng ah SAC ralkap pawl cu PDF nih an kah hna caah ralkap 10 an thi, tiah theih a si. Nizan September 21 zaanlei sml 2:45 ah Myinkin peng Taungyataw(တောင်ယာတော) khua um SAC ralkap gate pakhat cu, PDF nih an kah hna caah SAC ralkap 4 an thi i, 5 sii-inn an phan.

“Tualchung mi pakhat nih, “Motor cu Chin Dwin tiva chaklei in a rak ṭum i, cu hnuah an kah hna. SAC lei in a thimi zong an tam. Kahdohnak a dih in PDF pawl cu Chin Dwin tiva chaklei ah teinak hla sak pah in an kai,” tiah a chim. SAC ralkap a thimi le hliamhma pumi hna cu kethum ngei cycle 2 nih Myinkin sii-inn ah an kalpi hna.

PDF lei in a thimi le hliamhma pumi kan um lo, tiah Chin Dwin Naga Myinkin nih cathanh an chuah. Cu bantukin nizan September 21 ah Myinkin peng Lapu khuain a chuakmi SAC ralkap pawl cu, PDF nih bomb an puahhnawh hna caah SAC ralkap 6 a hnun ah an thi colh. Tam ngai hliamhma an pu, tiah Myinkin Spring Revolution nih an thanh.

Kyauktaw Peng Nagaya Khua Ah SAC Ralkap Nih Hriamngan An Kah Caah Khuami 4 Hliamhma An Pu. Kahdohnak zeihmanh um loin Kyauktaw pawng Nagaya khua ah SAC ralkap Kyauktaw No.9 Operations Command Headquarters nih September 20 zaanlei sml 4:30 hrawng ah hriamngan an kah caah Nagaya khuami 4 hliamhma an pu, tiah theih a si.

SAC ralkap No. 9 Operations Command Headquarters in hriamngan an kah caah Nagaya khuami U Yin Than(40) a inn hmaiah hriamngan kuan a tla i, amah U Yin Than telh in a fapa Myo Hlaing Win(17), Min Aye Soe(13) le U Yin Than a nu Mya Yin U(65) hliamhma an pu.

“Inn chung kan um lioah hriamngan kuan cu kan inn hmaiah a rak tla. Ka fapa cu inn cungah ca a ciah lio a si i a lu, a kut le a keng ah aa hliam. Ka fapa hniang cu a phei le a kut ah aa hliam, kei cu ka kutdong le ka kiu ah kaa khawng,” tiah U Yin Than nih a chim.

SAC ralkap nih tilam an phih caah Kyauktaw sii-inn kal khawh a si lo. An lu ah hliamhma pumi hna cu Kyauktaw sii-inn ah va zohter cu kan duh tuk ko nain kal khawh a si lo,” tiah hliamhma pumi chungkhar Aung Kyaw Min nih a chim. Kyauktaw ah umhmun khuarmi SAC ralkap No.9 Operations Command Headquarters in hriamngan an kah ruangah Hkawngtauk (ခေါင်းတုတ်) khuami nu pakhat zong hriamngan thawngpang ruang ah a nunnak a rak liam.

Pakokku Peng Ah SAC Ralkap Nih Khuate An Khangh Caah A Tlawm Bik Inn 10 A Ciam, Khuami 2,000 Leng An Zam. Magway ramṭhen, Pakokku peng Kawunlay(ဂဝံလေး) khua ah SAC ralkap pawl rallam an sial i, inn an khangh tiah theih a si. SAC ralkap 90 hrawng cu nizaan September 21 chun ah Kawunlay khua ah rallam an sial i, nihin September 22 zinglei ah Kawunlay khua cu an khangh caah inn 10 a ciam, tiah Pakokku peng mizapi uknak phu in ṭuanvo ngeitu nih a chim.

“Pauk peng leiin rallam a sialtu SAC ralkap 91 nih nihin zing sml 6:00 hrawngah Kawunlay khua cu an khangh. Khua khat hnu khuakhat an luh paoh ah meithal an puah,” tiah a chim chap. SAC ralkap nih rallam an sial caah Kawunlay le Myinthpia khuami 2,000 leng cu a himnak hmun ah an zam, tiah theih a si.

Kawtaung In Thailand Ram A Kalmi Myanmar Mi 20 An Tlaih Hna. Thailand ram thlanglei Yanaung(ရနောင်း) pengkomh ah Kawtaung(ကော့သောင်း) in phungning loin a kalmi Myanmar rammi 20 cu, September 20 ah Thai palik nih kan tlaih hna, tiah cathanh an chuah.

Yanaung pengkomh Nakha khua pawngah Myanmar rammi 20 a phortu motor pakhat a kal thawngpang cu Thai palik nih an theih i, zaan sml 10:00 ah Sauksaram( စုက်စာရမ်) check gate in an bawh hna. Myanmar rammi 20 a phortu motor cu deilei sml 2:00 hrawngah Hpannga(ဖန်င) pengkomh Khuyaburi( ခူရာဘူရီ) lei a kal lioah nawlngeitu hna nih an check i, Myanmar rammi 20 cu an tlaih hna tiah theih a si.

Kawthaung in aa thawhmi Myanmar rammi 20 cu Thailand ram ah rianṭuan ding in a kalmi an si i, minung pakhat ah Baht 22,000 an liam. An tlaihmi hna chungah nu 7, pa 10 le kum tling lo pa 3 hna an si, tiah theih a si. Ram chung buainak ruangah thilman a kai, rianṭuan awk a har chin lengmang caah Myanmar rammi hna cu tangka kyats sing 40 hrawng dihin Malaysia le Thailand ram ah an kal. Thailand ram ah a luancia August thla lioah motor pahsualnak voihnih a chuak i, Myanmar rammi a tlawm bik minung 8 an nunnak a rak liam.

Myanmar Rammi 3 Sinah Mizoram Palik Nih Bing Rang An Tlaih. India ram, Mizoram ramkulh, Aizawl peng chungah nihnih chungah Myanmar rammi 3 hna sinah bing kan tlaih, tiah Mizoram palik nih cathanh an chuah tiah theih a si. Aizawl peng Tuirial khua ah September 20 lioah Van Cung Bia(32) cu gram 202 a ritmi bing he kan tlaih. Anih hi Sagaing ramṭhen, Kalay peng Haikhawl-Tuingo khua ah a ummi a si, tiah an langhter.

Nizan September 21 ah Tuirial khua ah Tha Sui(32) le Duh Nei Mawi(25) cu gram 147 a ritmi bing he Mizoram palik nih an tlaih than hna. Annih hi Kalaymyo Tahan(C,B) sang ah a ummi an si i, ralhrial in aa dormi kan si, tiah Tha Sui le Duh Nei Mawi nih cun an chim. Mizoram ramkulh ah rithaisii dohtu phu le Mizo mino phu hna nih an dirhmi Central Anti-Drugs Squad (CADS) nih rithaisii fak piin an doh cuahmah i, September 10-21 tiang ah bing kilo 1 leng an tlaih cang, tiah theih a si. Credit: The Chin Post