Kawlram cu a ṭhangcho ding ram si lo.

Kawlram cu a ṭhangcho ding ram si lo.
=========
Kawlram i thlarau tlau tlaih ruah ah ti in, missionary in khua a rak sami Korean tarpa nih, “Kawl cu a ṭhangcho dingmi miphun nan si lo” a rak ti. Cu tarpa cu professor a si. Kawlram i University hna ah ca a rak chim pah. Cu pah cun, Jesuh thawngṭha cu a rak aupi ve.

Cuti cun, a hni fenh uar lonak kong he pehpar in, zei ruang bikah dah kan ṭhancho lai lo, tiah a umnak ah ka rak hal. “Yangon ka rak phanh hmasa bik tan in Kawl pawl ka hmuh hna i hni an ifenh dih ngawt. Cu nihcun a ṭhangcho ding miphun an si lo, ti in ka hmuh colh hna.”

Tuak ve ngat, Korea ah na va um ve khah. Hnifenh bu in zei rian dah na ṭuan khawh lai? Hnifenh bu in maw innsang pipi hna an sak lai? Hlei ṭha hlei dawhdawh hna khi hnifenh pawl nih maw an sak lai? a ti.

A chim ah, ai biatak tuk. “An hnifenh le an ihruk-aih ning ka hmuh bak in mi thathu phun, a ṭhangcho lo ding phun in ka tlaih khawh colh hna.” Jesuh thangṭhabia ka chim pah ah hni ifenh hlah uh ti zong biapi tuk in ka chimh peng hna, a ti.

Voikhat cu YGN khualai an tinak Sule ah a va kal i Kawlram mi pawl kan dawt tuk hna. Kan dawt tuk hna ruangah nan ram ah ka rak phanhnak a si. “Hni ifenh ti hlah uh, tawrolh ihruk cang uh” tiah ka au a ti. Korean tedawng cu an vun khi vaar hirhiar in a pante i a nemte nain, an cal cang bak. An pom lomi thil cu zah hngal loin an i-aupi ngam reng tak cuh.

“Kawlholh in maw na au, Korean holh in?” tiah ka hal. Kawlholh in ka au chel, Korean holh in ka au chel, a ti. Ka Korean holh theih duh ah lam ai chokmi nih an ka buut te lai ti ka ruah pah caah, Korean holh zong ka hman pah, a ti.

“Mihrut ah pei an in ruah ne lai cu,” ka ti i, “Korea mihrut pa Kawlram a rak phan ti zongah a ka ruatmi an um ko lai. Nain, ka au hnawh chih hna,” a ti. Kawlram mi nih hnifenh nan hmanmi cu ka doh lai. Laimi cheukhat nih phungchim an ka sawm tawn zongah, “Hni ifenh hlah uh,” tiah ka chim chih peng tiah a rak ka chimh.

Kawl nih hnifenh an hmanmi cu ka tei hlanlo ka doh lai, a ti bak ko. Cu Korea tarpa bia cu tulio Kawlram sining he van ruah chih ah a va dik ve aw, ti awkin a hung um. Khuazeimaw mifim, လူယဉ်ကျေး ai ti phun pawl nihcun Kawldaan in hni cu ifenh dih cu si fam, tawhrolh hruk ralkap pawl nih an kan uk peng khawhnak a si ti zong cu a hung lang.

Hnifenh awtaw le langak nih tawhrolh hruk chiandeih tedawng teraap ho cu tei khawh ding an si lo ti zong cu a hung fiang deuh. Credit: Salai C Alexander

A dik. Tuanpi khan ka pom mi a si ve. Tiluk, Japan le Korea pawl hi Kawl nakin kum thongthong in nunphung a upa deuhmi, an miphun thuam, hrukaih zong a pical, an thiamnak zong vawleipi cuanh awk in a pemh khomi an si. Nain, an pupa chan i an i hrukaih mi an miphun thuam cu ṭhitumh caan le ni pipa deuh lawngah an hman i rianṭuannak le nifatin umkalnak ahcun suit le coat le tawhrolh bak an hman ko. Mahcu vawleipi kal ning a si ko.

Hni fenh kan hman chung poh cu kan ṭhangcho bal lai lo ti hi ka ruah tawnmi a si ve. Mah ram, mah sining ahcun ai dawh ngai ah ruah a si nain a lenglei minung hmuhnak ahcun hni fenh hi cu a mak lo kho tuk. Kawl pawl nih hni fenh nunphung an i laaknak Kala (Vai) hmanh nih an i fenh tuk ti lo.