Titanic Lawng A Rawkmi Zoh Ding In A Kalmi Tichunglut Lawng A Tlau
============
Atlantic rili tawne ah a ummi Titanic lawng a rawkmi va zoh ding in a kalmi Titan tichunglut(Submersible) lawng cu June 18 ah a tlau, tiah theih a si. Atlantic rili tawne metre 3,800 leng ah a ummi Titanic lawng va zoh ding in minung pakhat nih dollar sing 2 le cheu hrawng an liam, tiah theih a si.
Titanic lawng zoh ding in a kalmi hna hi British billionaire Hamish Harding, Pakistani mirum Shahzada Dawood le a fapa Suleman lengah France mi Explorer Paul Henri Nargeolet(Kum 77), an si i, lawng khalhtu le a ngeitupa a si mi Stockton Rush nih a zulh hna, tiah theih a si.
Titan lawng cu rili tang ah suimilam 96 chung a um khomi a si i, aa citmi minung 5 cu June 22 zinglei tiang a umpi khawh hna lai, tiah ruah a si. Titanic lawng a umnak hi suimilam 2 chung hrawng khual lam a si. Atu hi US le Canada coast guart hna nih Titan lawng cu an kawl cuahmah, tiah US Coast Guard in capt. Jamie Frederick nih a chim.
Myanmar Lemcang Thiam Poe Kyar Phyu Khin Cu SAC Nih An Tlaih; Myanmar ram lemcang thiam Poe Kyar Phyu Khin cu June 19 zan ah khan Yangon a inn ah SAC ralkap nih an va tlaih tiah lemcang thiammi hna he naihniam in a ummi hna sinin kan theih, tiah RFA nih a ṭial.
Poe Kyar Phyu Khin nih cun Suu Kyi chuahcam lawmhpinak ah amah Tik Tok cahmai ah “Aung San Suh Kyi asiloah hruaitu taktak” tiin muicawl a thlah caah an tlaih, tiah theih a si. Hi kong he pehtlai in thawnghlattu pakhat nih cun, “June 19 zan ah Poe Kyar Phyu Khin cu SAC ralkap nih a inn ah an va tlaih. Aung San Suh Kyi chuahcam lawmhpinak te lawng a langhter. Lemcang thiam Khin Wint Wah zong an tlaih tiin thawng a thang nain a fiang lo,” tiah a chim.
Aung San Suh Kyi chuahcam lawmhpinak ah pangpar aa tonhmi le pangpar aa putmi minung 130 leng cu SAC ralkap nih an tlaih hna i cheukhat cu an thlah cang mi hna zong an um bantukin cheukhat cu Section 505(a) in taza an cuaimi hna zong an um, tiah RFA nih a ṭial. Crd;The Chin Post