Paletwa Ah Pehtlai In Ruah A Sur Ruangah Ti A Lian, Mincimhnak A Chuah Pinah Inn Zeimawzat An Rawk!
=========
Chin ramkulh, Paletwa peng ah pehtlai in ruah a sur ruangah mincimhnak a chuak i, Kaladan tiva ti cu a liam ruangah khuachung inn zeimawzat zong an rawk, tiah theih a si. Paletwa khuachung ah a luancia July 27 in August 7 tiang pehtlai in ruah fak tuk a sur ruangah vawlei an cim i khuami hna umnak inn 11 an rawk, tiah Paletwa Biaknak lei mi bawmchantu phu nih an thanh.
A rawkmi inn hna le mincim serremhnak ding ah bawmhchanh kan herh ko, tiah an langhter chih. Ti lian nih hin ralhrial hna i dornak sakhan zeimawzat zong a phum hna caah, a him deuhnak hmun ah caan karlak an i dor chung, umnak le eidin kong ah an har ngai ko, tiah theih a si.
Kahdohnak Ruang Ah Tamu-Kalaymyo Kar Khualtlawng Mi Ni 4 Chung An Rau. Voi dang ah suimilam 3 tluk lamkal a si mi Kalaymyo-Tamu khua kar cu kahdohnak ruang ah khualtlawng mi nih a tlawmbik ni 4 an rau cang tiah Tamu khua mi pakhat nih a chim. Aluan cia June 15 lio in kahdohnak ruang le lam an phihkhar caah Kalaymyo – Tamu kar cu lam an pemhchom mi in an kal i ni 4 an rauh caah khualtlawng mi harnak an ton hi a si.
“A tu lio caan ah cun khualtlawn lo awk tha lo mi deuh an kal hna, Tamu khua in Kalaymyo kal duh ah a tlawmbik ni 4 rauh a si an ti ko nain ni 10 tiang zong rauh khawh a si.” tiah Tamu khua mi pakhat nih cun a chim. “Lam har ruangah thilri zong duhning in a luh khawh ti lo caah Tamu khua cu thilman a kai ngaingai, ngandamnak kong zong ah harnak kan tong” tiah a cunglei upa nih a chimchap.
Mitlau Thawngthanhnak Le Bawmh Halnak! Chin ramkulh, Thantlang peng, Hriangkhan khua ah khua a sami Pu Muan Kim cu a luan ciami 2023, August 7 ah Kawl rawn lei kal aa thawh i nihin tiang a chungkhar hna nih an pehtlaih khawh ti lo caah a hmumi le a thawngpang theimi nih thawng nan kan thanhnak lai, tiah a chungkhar hna nih Lungmili Post ah thawngthanhnak an tuah.
Pu Muan Kim hi Kawl rawn lei kal aa thawh in vuichip tlang tiang cu mit hmutu an um nain Kalay khuapi, Tahan lei an chungkhat sin zong a phak lo caah chungkhar lei an lungre a thei. Cucaah a hmumi le a thawng theimi nih Lungmili Post ah nan kan pehtlaihnak lai, kan in nawl hna.
Tilawng Pil Ruangah A Tlaumi Minung 45 Chung In Ruak 15 Hmuh A Si Cang. Rakhine ramkulh, Sittwe peng, Basa khua pawng ah Malaysia kal dingin aa thawhmi tilawng cu a pil i Rohingya mi 45 an rak tlau. Cu chungah minung 15 ruak kan char, tiah Sittwe hrambunh Shweyaung Myatta Foundation sinin theih a si.
Rohingya mi 55 phortu tilawng cu a luancia August 7 ah Sittwe peng Basa khua pawng rili ah a rak pil i August 9 ah a tlaumi hna cu an kawl ṭhan hna. Shweyaung Myatta Foundation in Byia Lah nih cun, “August 8 ah ruak 2 le August 9 ah ruak 9 kan char. An dihlak ruak 15 kan char cang, pa 7 le nu 8 an si. Tilawng a pilnak hi ni 4 tluk a si cang,” tiah a chim.
Tilawng a pil lioah minung 8 an luat i Sittwe khuapi No. 1 palik sakhan ah nawlngeitu nih bia an hal hna. Malaysia ram kal aa timmi Rohingya hna nih agent pawl cu kyats sing 100 leng an pek hna i Malaysia ram ah rian va ṭuan dingin an i thawh lioah tilawng cu aa let, tiah theih a si. SAC nih nawlngeihnak an laak hnu in rianṭuan awk a um ti lo caah Rohingya hartong camp in mi tampi cu Malaysia ram le ram dangdang ah rianṭuan dingin tang lam in an kal, tiah theih a si.
Mizoram END Ṭuanvo Ngeitu Nih Myanmar Mi 2 Sin In Rithaisii Bing-Raang Tampi An Tlaih. August 9, ah Excise & Narcotics Department cawlcanghnak phu nih hmunhnih ah mi pathum sin in rithaisii (Bing-raang) tampi an tlaih tiah theih asi.
August 9, zing suimilam 6:30 tluk ah Zuangtui (ZEDA peng) Aizawl ah bing-rang Kg 1, Gram 5 le a ngeitu ah ruah/zumh mi Falam, Myanmar mi pahnih (Tulio Bawngkawn sangah khuasa mi le) Priscilla Biaklenmawi (Zokhawthara khuasa mi) hna cu an tlaihkhih hna tiah theih asi. Tlaihkhih tongmi pahnih hna hi Myanmar ram buai ruangah ralzaam dirhmun in Mizoram ah a zaam mi ansi tiah an langhter chih.
Cu bantuk ṭhiam in END le CADS phu fonh rianṭuantu cawlcanghnak in August 9, zinglei suimilam 2:10 tluk ah Thenzawl sangthar (Horticulture Road) ah rithaisii Bing-Raang gram 249 tluk cu a ngeitu ah ruah/zumh mi Lalhmangaihtluangi sin in an tlaih tiah theih asi. Credit: The Chin Post, Lungmili Media