Ti Lian Nih CDF-Asho Sakhan Le An Cinthlaknak Dumhau A Hrawh Piak Hna!
=========
Ruahpi pehzulh in a sur caah Magway ramthen chung ah umhmun khuar mi CDF-Asho sakhan inn cheukhat le an cinthlak nak dum ti nih a hrawh piak hna caah harnak an tong tiah kan theih. August thla 1 in ruahpi pehtlai in a sur caah tiva zong an lian i August 8 zinglei suimilam 3:30 tluk ah tlangcung in a luang mi tiva te nih an inn le lo a hrawh piak hna hi a si.
“Zinglei suimilam 3 tluk ah ralkap minung 2 umnak inn cu ti nih a phak hna caah zungah an vun ra, ruahpi cu pehtlai in a sur i suimilam cheu hnu ah kan va zoh than tik ah pe 2 leng ti a rak kai manh.” tiah CDF-Asho tuanvo ngeitu pakhat nih a chim. Hi ti lian nih, an namtong, vaituhmui, suah lek tibantuk zong a fenh piak dih hna pin ah inn cheukhat le sii peknak inn zong ti nih a phum.
“Sii-ai hi mipi nih a kan bawmh mi a si. Sii chiahnak inn zong kan sak lio a si caah sii-ai cu a rawk lem lo, hmundang ah kan thial colh hna. Kum dang zongah ti a lian ko nain a tubantuk in harnak kan tong lo.” tiah a cunglei upa nih a chim. Atu lio ah ti cu tlawnpal a zor nain an cinthlak mi thlai a rawk dih caah eidin kong ah harnak an ton lawng si lo in ralkap hna nih an thil cin bu in an i hruk eih hna tiah theih a si.
Pu Henry Van Thio Cu NLD Party Sinak In An Chuah. Aluan cia July 31 lio ah SAC cozah hruainak in National Defence and Security Council tonpumhnak hmun ah aa tel ve mi Vice President Pu Henry Van Thio cu NLD Party sinak in kan chuah tiah August 9 ah NLD Party nih thanh ca an chuah.
Pu Henry Van Thio cu a luan cia 2016 in 2021 kum tiang NLD party nih zumh ngai mi a si caah Vice President dirhmun tiang rian an rak peknak kong, A si nain mipi cung ah zeirel lo in tlaih khih le a kan that tu SAC ralhrang he i bawm in rian an tuanti nak cu a luan cia July 31 ni ah hmuh an si nak kong, mah pin ah Mipi hna zeirel lo le mipi sin a biakam mi vialte a letnak kong NLD party nih thanhca chuah mi ah an langh ter chih. Cucaah NLD party Center upa hna cu August 8 ah tonnak pumhnak tuah in Henry Van Thio cu party sinak in chuah ding kong biachah nak an tuah hi a si.
Monywa Ah Duhlonak Langhter In Lamzawh Mi 3 An Kah Hna Hnu Ah An Tlaih Hna. August 8, Zanlei sangah Sagaing ramṭhen Monywa khuapi Kanthayar tlonlennak hmun ah kum 1988 July 8 (8888) camtuak langhter in lamzawh mi 3 cu SAC ralhrang palik nih an tlaihkhih hna tiah theih asi.
“SAC ralhrang palik hna cu tualchung mipi motor in an ra i Kanthayar tlonlennak hmunhma ah kum 1988 July 8, (8888) camtuak langhter in lamzawh mi tlangval 3 cu an kah hna hnu ah an tlaih hna hliam an tuar tu cu ka hmuh an thih le thih lo tucu ka thei lo” tiah Kanthayar tualchung mi pakhat hmutu nih a chim. Cu pinah Monywa khuapi kum 2 chungah hin tlaihkhih tong mi 100 tluk an um cang i cu lak ah kahthah tong mi 30 naak tlawmlo an thi tiah an langhter chih.
Mizoram Ah Myanmar Mi Pakhat Thingaahnak Hmunhma Ah Chungtlik Zawtnak In A Thaa Dih Caah A Thi. August 8, Mizoram ramkulh Thenzawl peng ramtaang ah thingaah in ummi Myanmar Chin mi Salai Ceu Lian Sum cu chungtlik zawtnak in a thaa dih caah ah a nunnak liam tiah theih asi.
A ruak hi Aizawl Chin Chiatṭhat Zohkhenh tu phu (Chin social organization) le Biaknak lei tawlrelnak in Myanmar ramri tiang an phurh lai i Falam peng Taal တားလ် khua ah vui asi lai tiah an langhter.
Ramkhel dirhmun ṭhatlonak in Myanmar ramchungah rianṭuan ding a umlo caah Chin mino tampi hna cu Mizoram ah rianṭuan ding in an kal hna. Din ei lei ah harsatnak ton caah an pawkhim maw khim loin rawl an ei tawn tiah an langhter chih. Credit; Mingmili Media