Kan Thinlung A Kan Kenh Dih Tu Thawngpang Kong!!
Siaha Khua Mi 3 Thihnak He Pehtlai in Buainak,Hnahnawhnak Tuah Lo Dingin MTP nih Nawlnak An Tuah
==============
March 22, 2023 ah khan Pi. Biaksui, Pu. Lalṭhafamkima le Pu Bablu hna cu misual kut in Myanmar ramri ah an nunnak a liam i, hi thihnak kong he pehtlai in Mara Thyutlia Py (MTP), General Headquarters: Siaha (Mara Mino Bu) nih cun buainak/hnahnawhnak tuah lo ding in cathanh an chuah.
“Nunnak a liammi chungkhat cingla kan tuarpi hna i, ruruhranghrang sualnak a tuahtu hi kan dohkalh, hmailei ah hi bantuk sualnak hi cang ti hlah seh tiah theihternak kan tuah. Cozah le palik zong nih hlathlatnak ṭha tein tuah sehlaw, lainawnnak ah aa telmi misual hna cu hremnak pe hna seh tiah kan duh,” tiah nunnak a liammi hna tuarpinak le cozah lei ṭuanvo ngeitu hna zong hmalaknak tuah ding in nawlnak an tuah colh.
Myanmar ram buainak ruangah Mara ram chung a rak zaammi hna dawtnak he an rak zohkhenh hna lio ah hi bantuk thahnawnnak a cang mi cu an duh lo i, “Kan dohkalh caah, a herhning in ṭuanvo kan laak lai,” tiah an langhter. Hilio ah thihlohnak kong he pehtlai in mipi sinah biadik lo thanh lo ding in theihternak an tuah fawn.
Cun, hi thihlohnak ruangah miphun le miphun, bu le khua ti bantuk in buainak/hnahnawhnak tuah lo ding in mipi sinah nawlnak an tuah. “Misual tuahsernak a si ti thei buin, sualnak a tuah ve lo mi cung ah harnak tuah kan duh lo i, mizapi sinah hnahnawhnak tuah lo ding in kan in nawl hna,” tiah MTP general headquarters nih cun cathanh an chuah.
Mizoram ramkulh, Zokhawthar ah aa dormi Myanmar ralzam, tualleng in tang 4 tiang siangngakchia hna ca ah PSRB phu hruainak in a lak in zan cacawnnak an tuahpiak hna, tiah theih a si. Cu sianginn ah siangngakchia 123 an um i Myanmar, English, Maths, Chin ca le nun ṭhanchonak subject an chimh hna, tiah theih a si.
Cachimtu saya/mah 7 an si i zan khat ah suimilam 5 chung an chimh hna. 2023 cacawn kum ah tang 5 tiang an chimh hna lai, tiah theih a si. Siangngakchia hna cu chun caan ah Mizoram cozah sianginn ah ca an cawng ṭhiamṭhiam ko, tiah theih a si. Zokhawthar khua ah ralzaam Myanmar rammi chungkhar 1,000 leng an um i Mizoram ramkulh chung ah ralzam an tam biknak khua a si. Zokhawthar cu Myanmar ram Ṭio ral ah a ummi khua a si.
Myanmar-India ramri Moreh khua ah Myanmar ram in a lutmi Tuluk ser 125 motorcycle cu March ni 19 zinglei in cit an khap, tiah theih a si. March ni 19 zinglei ah Myanmar ram in a lutmi motorcycle cit an khap hnu in 125 motorcycle 30 leng nawlngeitu nih an tlaih, tiah theih a si.
Moreh khua um Myanmar rammi ralzaam pakhat nih, “Ralzaam hna nih eidin facang cawk kan duh ahcun Moreh khua luhnak ah kan cycle chiah ta in kethum ngei (three wheeler) hlan in kan va cawk tawn,” tiah a chim. India cozah nih India ramchung ah phungning tein an serchuahmi le an cawk zuarhmi leilawng le motorcycle lawng register tuah khawh le i cit khawhnak nawl an onh i, a tam deuh leilawng le motorcycle cu India Company lei an sermi a si, tiah theih a si.
Myanmar ram in a lutmi motorcycle cu Mizoram ramri khuate lawng ah cit khawh a si i, zalong teiin i cit khawhnak ding ah caan karlak chung motorcycle number an pek hna, tiah theih a si. Mizoram ramkulh, peng kip ah a ummi Chin ralzaam hna cu Chin Evangelical Baptist Church, Indianapolis, USA nih an tlawn hna tiah kan theih.
Chin Evangelical Baptist Church, Indianapolis, USA khrihfabu nih Mizoram chung peng kip ah a ummi ralzaam hna va tlawng in thawngṭhabia chimhnak, thazaang peknak, pumhkhawmh in BAWIPA thangṭhat ṭinak le i hawikomhnak tibantuk an neihpi hna tiah kan theih.
Chin Evangelical Baptist Church, Indianapolis, USA khrihfabu nih Mizoram ralzaam hna an cawlcanghnak ah a lamkip in bawmhchanh le an herhmi tete cawkzalhpiak ding tiang in timhlamhnak an ngei tiah theih a si. “Atu bantukin Mizoram chung an tlawnnak khua cio ralzaam committee sin ah laksawng zeimawzat zong an kan pek” tiah ralzaam committee in hruaitu pakhat nih The Chin Post ah a chim.
Atu tan Mizoram chung an tlawnnak ah CEBC, Indianapolis, USA khrihfabu in palai 4 an si i, Vaurawng Zuunthil chungkhar in hlasakthiam Dawt Rem Iang le Betty Mang Hlei Ṭial nih an zulh hna tiah kan theih. Crd-The Chin Post