Kan thih zongah kan Halkha, kan nun zongah kan Halkha!!

Halkha An Thinlung Put!!
============
Halkha khua nupa le Tuukhal hna dirhmun ka duh le upattuk mi cu,”HK kan zaamtak lai lo,kan thihpi lai kan nunpi lai”an ti. Crd-Salai Willimas Hlawnceu. Zam ding in kan i tim lo e . Kan zam ah cun ralhrang pawl an i nuam tuk sual lai . Kan zam lo hi a tha bik an kan tih fawn lai i an ral achia lai zam lo a tha bik e.

Halkha kan zaamtak ah cun chinmiphun pi adih asi ko.Khuapi dingah an i tlak hrim. Uar an um tuk. Kan thih zawngah kan Halkha kan nun zawngah kan Halkha kan zam tak lai lo. Mah ding bak si ko ,ralram ah cun ahim nak um hlei lo Thantlang kan zam tak ruang ah in lo akang dih.

Thantlang Khuanupa ai timi, online raktuk thiam pawl le Pastor cheukhat pawl ralhrang he ai chawn tawnmi Kalingkacit pawl nih khan an Ngian ni le an Ngian net in ralchia dih im an tuaitam hna lai ti phan a um pah.ThanTlang tu khal hna zong nun nak liam tiang an hngah ve ko.Chuah lo awk that lo dir hmun si cun thih nak cun nun kha a tha deuh ko.An bia bel cu uar cu an um bak ko.

Thantlang zong kha rak chuak tak hna hlah seh law cu ti ban tuk hin si hnga lo,Khua pi sung ah buai nak um lo cun chuah tak hau lo na in buai ah cun chuah tak can um ko lai.

Sing 50 Pek In Malaysia Kal Aa Thawhmi Myanmar Rammi 6 Le Puaisa Pa 3 Thailand Ralkap Nih An Tlaih Hna, Malaysia ram ah phungning lo rianṭuan ding in puaisa sin ah sing 50 leeng a petu minung 6, anmah thlahtu motor mawng le puaisa 3 hna cu Thailand ralkap nih an tlaih hna tiah theih a si.

October 26, zing sml 9:30 hrawng ah lunghrinhmi motor kan hmuh tiah thawngpe tu an um caah mah motor cu an zulh dawi i inn pakhat ah an va tlaih hna hi a si tiah theih a si. Tlaih a tongmi hna hi Rakhine lei an si i Kawhtawng lei in Thailand ah an puaisa nih an rak luhpi hna hi a si.

Hi ti kal khawhnak ding caah minung pakhat nih 70,000 baht (Sing 50 leeng) cio puaisa sin ah an pek tiah theih a si. Motor mawng chimnak ah cun motor man ah minung pakhat nih baht 4,000 cio an ka pek tiah a ti. Tlaih a tongmi hna cu Pakcian palik sakhan ah chiah an si tiah theih a si.

Kawkareik Ah Hriamngan A Tla, A Thi le Hliamtuar An Um, Karen ramṭhen Kawkareik pengchung ah hriamngan a tlak ruang ah minung pahnih an thi i (16) hliam an tuar tiah khuami pakhat nih a chim. Nihin Oct 27 chun sml 12:00 luan deuh hrawng ah ralhrang battalion(97)hna nih Kawkareik lei ah hriamngan an kah hi a si. Minung pahnih an thi i kum(16) ngakchia pakhat telh in minung(16) hliam an tuar tiah khuami pakhat nih a chim. Hliam a tuarmi hna cu Kawkareik siizung ah an thlop hna tiah theih a si.

Myanmar Ram Buainak Kong He Pehtlaiin ASEAN’S Foreign Minister s’ Hna Cu Jarkata, Indonesia Ah Tonnak An Ngei!! ASEAN’S Foreign Ministers’ hna cu Jarkata, Indonesia ah Myanmar ram buaibainak kong he pehtlaiin meeting an ngei tiah theih a si.

Meeting ah cun, Myanmar ram buainak kong he pehtliain hnatlaknak a ngeihmi phun 5 (5 point consensus) cu biatak tein kalpi dingin ceihhmainak an ngei, cun American zong nih biatak tein tuanchuah dingah ASEAN hruaitu hna cu a tu le tu theihternak a tuah hna tiah theih a si. SAC nih mipi cungah thahnawnnak, sualnak an tuahmi vialte cu ngol dingin le mipi hna bawmnak pek ding le thil dang phun 3 fonh in 5 point consensus cu nikum 2021 ah SAC le ASEAN cu hnatlaknak an rak ngei cang tiah theih a si.

Bamaw Tiang KIA An Phan Cang Tiah SAC Ralkap Nih An Ruah Caah Hriamngan An Kah I, Nu Pakhat A Nunnak A Liam, Kachin ramkulh, Bamaw ah KIA an phan cang tiin thawng a len caah Bamaw in meng 4 a hlatnak ah ummi SAC ralkap cu, an lau tuk caah hriamngan an kah i tualchung mi nu pakhat a nunnak a liam, tiah theih a si.

Nizan October 26 chun sml 12:00 hrawngah meng 4 zawn ah a ummi SAC ralkap nih, Bungbaw khua ah hriamngan voi 20 nak tlawm lo an kah i, Mankhun khuami Than Htay(kum 45 ) cu hriamngan nih a tlak caah a nunnak a liam, tiah tualchung mi pakhat nih a chim.

“Tualchung mi nih Bungbaw khua lei in KIA an kal ti an chim thawng SAC ralkap nih an theih i, hriamngan in an kah tuk caah Mankhun khuami nu pakhat cu hriamngan kuan nih a paw ah a khen caah a hmun ah a thi colh,” tiah tualchung mi pakhat nih a chim.

Malaysia Ram Ah Helicopter Pakhat A Tla, Aa Citmi Hliamhma An Pu, Malaysia Pahang ramkulh, Cameron Highlands pengkomh ah ngandamnak lei nawlngeitu nih an i citmi Helicopter pakhat a tla, aa citmi cu an him dih, tiah theih a si.

Helicopter cu nizan October 26 zanlei ah Brinchang khua pawng tupi lak ah rianrang in ṭum aa tim ko nain a tum khawh lo caah a tlak hi a si. Mi bawmchantu hna nih October 26 zanlei sml 3:50 ah Helicopter a tlami cu an hmuh i, siibawi pakhat telh in Helicopter aa citmi sii lei rianṭuantu hna cu hliamhma hme an pu, tiah theih a si.

“Ministry Of Transportation kuttang ummi Air Accident Investigation Bureau nih pawngkam humhimnak ca ah checkhlatnak kan tuah lai,” tiah CAAM in lutlai Chester Voo nih a chim. A tlami Helicopter cu Layang Layang Aerospace Companny nih a ngeihmi a si i, October 26 chun sml 12:20 ah Kelantan ramkulh in Tanjung Rambutan khua lei a zuan lioah a tla, tiah theih a si.

Myanmar Rammi 4 Cu Assam Rifle Le Mizoram Palik Nih India-Myanmar Ramri Ah An Tlaih Hna, Myanmar rammi 4 cu India-Myanmar ramri pawng India nichuah chaklei ah Assam Rifle le Mizoram palik nih kan tlaih hna, tiah nihin October 27 zing ah cathanh an chuah. Myanmar rammi 4 cu nizan October 26 ah Mizoram ramkulh Saiha pengkomh palik le Assam Rifle nih kan tlaih hna, tiah an langhter.

Mizoram ramkulh, Saiha pengkomh Nihawtlang khua ah Tuluk ser Kenbo 125 cycle 4 he an tlaih hna hi a si.
Myanmar rammi 4 cu cycle 4 he an kal ti thawng an theih caah Mizoram palik le Assam Rifle i bawm in an tlaih hna hi a si, tiah Mizoram News nih an langhter. Myanmar rammi 4 cu Assam Rifle le Mizoram palik nih an tlaihnak kong an langhter lo. India-Myanmar ramri ah Myanmar rammi a tlungkal mi thawng an theih caan paoh ah Assam Rifle le Mizoram palik i bawm in an tlaih tawn hna, tiah theih a si.

Union Election Commission Chairman Hla Thein Le Chungtel Myint Naing Cu SAC Nih An Thlah Ṭhan Hna, Rampi thimnak ah lih le hrokhrol in mee nan tuah tiin thong kum 3 veve thlak ding in bia khiahpiak mi Union Election Commission(UEC) Chairman Hla Thein le chungtel Myint Naing cu SAC nih nizan October 26 ah an thlah ṭhan cang hna, tiah theih a si.

A luancia July thla thawk ah thong kum 3 veve thlak ding in biaceih zung nih bia an rak khiahpiak hna hnu thla 3 leng a rauh ah Yametin(ရမည်းသင်း) thonginn in an chuak ṭhan hna hi a si. Hla Thein le Myint Naing cu ASEAN nih Myanmar ram kong ah lakhruak in meeting an tuah lai nikhat ah an thlah ṭhan hna, tiin SAC kuttang lobby cheukhat hna nih social media ah an langhter.

UEC Chairman Hla Thein le Myint Naing cu SAC nih an thlah ṭhannak hna a ruang zeihmanh an thanh lo. UEC Chairman Hla Thein le Myint Naing cu SAC nih an thlah ṭhan ko hna nain chungtel a si vemi Than Htay cu an thlah lo, tiah theih a si.

Rihkhawdar No.2 Sang Inn Cheukhat Cu SAC Ralkap Nih An Khangh, Chin ramkulh, Rihkhawdar No.2 sang thlanhmun pawng ummi inn cheukhat cu, SAC ralkap nih October 26 chun sml 12:00 hrawngah an khangh, tiah theih a si. SAC ralkap pawl cu khua chungah riahcaw lak dingin an kal lioah bomb an i lamh sual caah aipuang in umhmun an khuarnak pawngkam thlanhmun pawng ummi inn cheukhat an khangh hi a si, tiah tualchung mi pakhat nih a chim. SAC ralkap nih inn an khanghmi zat cu fiang in theih khawh a si rih lo. Tualchung mi cheukhat cu Mizoram ah a zammi an um, tiah theih a si.

Sagaing Peng Ah SAC Ralkap Nih Hriamngan An Kah Caah Tualchung Mi Pakhat A Thi, 11 Hliamhma An Pu, Sagaing peng khuate 3 chungah SAC ralkap an lut i, a zammi khuami hna cu hriamngan in an kah hna caah khuami 1 a nunnak a liam pinah minung 11 hliamhma an pu, tiah theih a si. A luancia October 24 zanlei ah SAC ralkap cu Sagaing peng Nyaungpinthar, Kin le Pawkar khua ah an lut i, a zammi khuami hna cu hriamngan in an kah hna caah Pawkar khuami Thein Oo cu hriamngan kuan nih a tlak caah a hmun ah a nunnak a liam, tiah theih a si.

“Uico ralkap motor 3 an rak lut i, Mu tiva lei kap a zammi khuami hna cu hriamngan le hriamhme he an kah hna caah Thein Oo a nunnak a liam. A nupi zong a tai ah hliamhma fak ngai a pu i tualchung mi 10 hliamhma an pu,” tiah tualchung mi pakhat nih a chim.

Hliamhma pumi hna cu nizan October 26 ah ngandamnak lei ṭuanvo ngeitu, SDMT sii-ai petu phu, Pah Kah Phah le pengkomh Battalion 2 hna i bawm in an zohkhenh hna, tiah theih a si. Sagaing peng Mu tiva kam ummi Nyaungpinthar, Kin le Pawkar khua hna telh in khuate 12 cu ramlak ah an zam i, tlangrai nih a tlunh chap hna caah sii-ai an herh ngaingai, tiah theih a si.

KNU Brigade 5 Hmunram Ni 5 Chung Kahdohnak Ah SAC Ralkap 8 An Thi, Karen ramkulh, Brigade 5 hmunram ah KNLA le SAC ralkap cu a luancia October 22 in 26 tiang ni 5 chung kahdohnak a chuak i SAC ralkap 8 an thi, 4 hliamhma an pu, tiah theih a si. October 22 zing sml 2:00 ah KNLA le SAC ralkap kahdohnak a chuak i SAC ralkap 2 an thi. October 23 zing sml 10:45 ah Nukhawde(နိုခေါးဒေး) hmunram ah kahdohnak a chuak ṭhan i, SAC ralkap 1 a thi chap, 1 hliamhma a pu, tiah theih a si.

October 24 ah Kataingdi(ကတိုင်တိ) le Bawgyulay(ဘောကျို့လယ်) khua karah kahdohnak a chuak ṭhan i SAC ralkap 4 an thi, 3 hliamhma an pu. Cun October 25 ah KNLA le SAC ralkap kahdohnak voihnih a chuak ṭhan, tiah KNLA Brigade 5 nih cathanh an chuah.

October 26 ah Salawgyu(ဆာလော်ကျိုး) Brigade 5 um SAC ralkap sakhan cu KNLA Brigade 5 ralkap hna nih an kah ṭhan hna caah SAC ralkap 1 a thi. Dwelu peng Nyaungpin khua cu SAC ralkap nih zanlei sml 1:47 ah hriamngan in voi 11 an kah caah tualchung mi inn pakhat a rawk, tiah theih a si. KNU Brigade 5 hmunram Mutraw pengkomh ah SAC ralkap le KNLA kahdohnak a zual ngaingai, tiah Mutraw News nih cathanh an chuah. Crd-The Chin Post