Kan Pasaltha le hna nan mah duh ning, siarem ning paoh in thil cu tuah ko uh!!

Kan fale nan si i a tha nan timi poah tuah ko u, lampi zong khar ko u, meitung zong remh ter duh hlah uh (Catialtu Salai Lungthli Tum)
=======================
Zophei khua pakhat pawng ah phone tower a um i riantuantu kha si-di-em a tuah ahcun pawngkam khua vialte le ramtang unau umnak vialte phone hman a ngah ding a si ti lo caah ramtang kan unau lila nih si-di-em tuah lo ding an rak nawl i tutiang phone tluang tein an hman khawh tiah ka theih.

Atu hi Hakha le Zokhua kar ah meitung a rawk. Hakha mei a rat lonak sau cang. Cozah riantuantu nih an remh a hau nain CDF nih tlaih ding an tih caah an kal ngam lo. Ralkap nih security lak piak in va remh a hau ding a si. Ramtang kan unau nih lampi an khar fawn tiah theih a si.

Kan fale nan si i a tha nan timi poah tuah ko u, lampi zong khar ko u, meitung zong remh ter duh hlah u, khuami cu meihol in rawl kan chumh rih ko lai, nanmah hmai ah cun kanmah harnak kan tuarmi tham cu chim a tlak lo hih tiin maw khuami nulepa nih bia nan cah hna lai or phundang deuh in dah. Ruah ning ai dang tuk cio lai dah.

Hriamtlai phu tam tuk ahcun mah le mah i thah lengmang a hau te lai, tihnung tuk, kan innpa Nagaland le Manipur khi India cozah doh ti loin anmah le anmah an i thahnak ah an caan dih timi hi CNF nih fiang ngai in an rak hmuh cia ko lai dah. KIA cu an i fian caah ‘hriamtlai phu ser bak hlah u’ tiah warning an rak pek colh kha.

CDF phu an rak ser hlan hrim ah ‘ser hlah u, kanmah sin ah lut u, CNF tu hi a herh ning in kan remh lai’ tiah CNA nih meithal thazaang in an rak kham cang awk cu a si. Atu cu an control kho lomi fa tam tuk an hrin cang, CNA nakin auto meithal tha deuh an ngei cio cang fawn. CNA lila kha a singkhaw ngammi an tam cang.

Meithal tha an ngei hnu ah CNA ah lut than ko u tiah forh khi cu molh tuk bia a si. Zeitin an luh duh ti hnga? Kum hnih chung bawi tuan hnu ah Victoria camp i zuzu va tuan than ding cu a hrutmi hmanh nih an huam lai lo, thih an ngamh deuh lai.

Auto meithal an ngei cang hnu cun duh zong duh lo zong ah zeibantuk hriamtlai phu poah kha ai ruang in upatnak pek ve an hau cang. Nek le thleidan a ngah ti lo. ‘CNA ka si hih’ tiah aanaa(power) piah a ngah ti lo. I nek sual ahcun phung-pheng a puak colh ko lai. Auto meithal ngeih cio hnu cun i tih timi a um ti lo cu ta.

Buainak a zor deuhnak ding le miphun thisen a luan lo nak ding caah cun phu khat cio hmunhma i upat cio a hau, hmunhma i chuh le i nek bak lo a hau. Hramhram in fonh timh caan asi ti lo, a phi chuak lai lo— kan miphun thisen lehlam a luang lai. Kan i ralrin taktak a haumi asi.

Ral le duhnak ah thlachiat ruat a um lo an ti bang, MAH ralkap hna kha puai kan tuah lio cu kan sakhan kap rih hlah uh tiah thlauh awk an tha hnga lo. Kachin kan unau cu an lungthin a kekkuai dih ko lai, ngaihchia taktak khi a si. Kawl ralkap he daihnak ser ding cu ai hlat chin lengmang ko. KIA hi 2014 zong ah an rak kah bal cang, CNA 2 an thi ve. Kawl ralkap cu thlachiat a ruat balmi an si lo caah kannih Chin miphun ralkap zong puai tuah tikah i ralrin taktak a hau ve cang. Crd-Salai Lungthli Tum

Pu Sai Hmung Thihnak Kong He Petlai In CDF-Lautu Nih Fianternak An Tuah ! CDF-Lautu Cu a luancia 2021 May 4 in SAC ralkap dohtu dingah rak dirh a si i, Chin hriamtlai phu hna he voi 70 leng SAC ralkap kan doh ve cang i, kan ralkap 13 zong hliamhma an pu cang, tiah cathanh an chuah.

CDF-Lautu hmunram cu Chin ramkulh a laifang ah a um i, kan hmunram chungah check gate 11 kan chiah. Khualtlawngmi hna zong checkhlatnak ṭha tein kan tuah hna, tiah an langhter. CDF-Lautu cu SAC ralkap a domi kan si caah dalan fimhlawm, dohthlennak a dodalmi, mi ngiathlainak tuahtu le SAC ralkap kuttang minung hna thah ding tiang in aa hmaithlakmi kan si lo pinah kan policy zong ah a um lo.

A ruang tampi ruangah minung 50 leng kan tlaih hna i, thih dan kan pekmi a hohmanh an um lo, dantatnak kan pek hna hnu ah kan thlah ṭhan hna, tiah an langhter. Pu Sai Hmung nih tualchung mi cu pistol zun khat in a tlerhkhawn lengmang hna. MATC/MDF ralbawi zik nih minung thahnak nawl a ka pek tiah aa hrocer i, khuami nih kan sinah report an tuah lengmang caah a pistol zun khat le kuan 7 he 2022 October 9 zanlei sml 3:00 ah kan rak tlaih.

Pu Sai Hmung cu biahalnak ṭha tein kan ngeih hnuah MATC/MDF sinin minung kahthahnak nawl an pekmi kong cu fiang tein a chim caah nihnih chung kan hren hnu October 11 zanlei sml 3:00 ah kan thlah ṭhan. Pu Sai Hmung kan thlah hnu in zarhkhat a rauh ah a ruak in an charnak kong zong kan theih. Pu Sai Hmung thihnak kong he pehtlai in CDF-Lautu nih kan thahmi a si hrimhrim lo i, kan thlah hnu in a chungkhat sahlawh rualchan he zong an i tong ko.

Pu Sai Hmung a thihnak hi MATC/MDF he pehtlaihnak a ngei, tiah an langhter. CDF-Lautu cu SAC ralkap a dohmi kan sin pinah minung pumpak, miphun ṭengngei le miphun dangdang nih sualnak an tuah ahcun a herh ning in dantatnak kan tuah hna. Dohthlennak hnahnawhnak petu paoh cu upadi ning in kan tawlrel hna lai, tiah CDF-Lautu nih cathanh An chuah.

SAC Ralkap Nih Kachin Bible Sianginn Cu Hriamngan In An Kah Caah Siangngakchia 4 Hliamhma An Pu! Shan ramkulh, Kuatkhine khua um KBC bible sianginn cu SAC ralkap nih nizan November 3 zanlei ah hriamngan in an kah caah siangngakchia 4 hliamhma an pu, tiah KIA ralkap sinin theih a si.

Zan sml 8:30 ah Kuatkhine khua um KBC khrihfa bible sianginn chungah SAC ralkap nih hriamngan lung 3 in an kah caah siangngakchia 4 hliamhma an pu. An hliamhma a fak ngai ko nain an nunnak caah thingphang a si lo, tiah an langhter.
SAC ralkap nih hriamngan an kah ruangah Ndau Awng San, Myitung Doi La, Brang San le Sut Ring Awng cu hliamhma an pu, tiah theih a si.

Zahan November 3 zan sml 10:00 hrawng ah KBC bible sianginn ah SAC ralkap nih hriamngan kah nakin siangngakchia 4 hliamhma an put hnu zong in SAC ralkap nih pehtlai in hriamngan an kah, tiah theih a si.

Kalay PDF Le SAC Ralkap Kahdohnak Ah SAC Ralkap 3 An Thi! Nizan November 3 zing sml 3:00 in Kalaymyo in Kalay thlanglei ah rallam a sialmi SAC ralkap 80 leng cu, Myogyi khua le GTI karah zing sml 6: 50 ah bomb in kan puahhnawh hna, tiah Kalay PDF nih cathanh an chuah.

Cu bomb puahhnawhnak ah SAC ralkap 3 an thi i, hliamhma pummi an tam. SAC ralkap nih pawngkam cu minutes 5 chung hrawng an kah hnuah a luancia October 31 ah an rak tlaihmi tualchung mi 3 cu, GTI sianginn in SAC ralkap 40 hrawng nih kadang hmun ah an kalpi hna. Kalaymyo um SAC ralkap nih zing sml 11:00 hrawng in hriamngan in kah an bawmh hna i, hriamngan kuan cu Thohcian khua ah a tlak caah pitar kum 71 hliamhma a pu, tiah an langhter.

Madaya Ah Rallam A Sialmi SAC Ralkap Bomb Puahhnawh An Tong I, Ralkap 3 An Thi, Hliamhma Pumi An Tam! Mandalay ramṭhen, Madaya peng ah ke in rallam a sialmi SAC ralkap cu PDF nih bomb in an puahhnawh hna caah SAC ralkap 3 an thi, ke kiak le kut kiakmi an tam, tiah Nat Soe PDF in an hruaitu Nat Soe nih a chim.

Nizan November 3 zanlei sml 2:00 ah Madaya peng Kaukselay khua le Nyaung Ngoh khua kar ah ke in hmun hnih ah rallam a sialmi SAC ralkap cu bomb puahhnawh an ton caah ralkap 3 an thi, hliamhma pumi an tam, tiah theih a si. Rallam hmun thum in sial ding in timh tuahnak an ngeih lioah an motor Htaw Lar Gyi cu bomb puahhnawh a ton caah SAC ralkap 3 an thi. Ke kiak le kut kiakmi an tam. Daung PDF le Nat Soe PDF i bawm in an puahhnawh hna, tiah theih a si.

Monywa Ah SAC Ralkap Le Pyusawhti Bomb Puahhnawh Ruangah 10 An Thi! Sagaing ramṭhen, Monywa peng Nagatwin(နဂါးတွင်း) khua ah rallam a sialmi SAC ralkap le pyusawhti cu, nizan November 3 ah bomb puahhnawh an ton caah SAC ralkap le pyusawhti 10 an thi, tiah theih a si.

SAC ralkap pawl cu zing sml 7:00 hrawngah pyusawhti an tamnak Tawpu khua in Nagatwin khua ah an lut i khuami inn le lo an khangh. Zanlei sml 5:30 ah pyusawhti 4 cu bomb thianhhlim ding in an kal lioah a voikhatnak bomb kan puahhnawh hna i a hmun ah an 4 ning in an thi, tiah Monywa Peregrine PDF in bawino Lay Paw nih a chim.

SAC ralkap 10 le pyusawhti 10 leng nih khuami an facang, chiti le thilri dangdang an fir i, zanlei sml 6:15 ah bomb in a voihnihnak kan puahhnawh ṭhan hna i SAC ralkap 6 hrawng an thi,” tiah bawino Lay Paw nih a chim. Cu kahdohnak ah Monywa Peregrine People’s Defence Force, Daung brother PDF, Generation Z People Defence Force၊ Eagle PDF, Monywa pengkomh Battalion 1, M.P.D.F le Zar Ma Ni PDF hna i bawm in an kah hna, tiah theih a si.

SAC ralkap nih Nagatwin khua inn 9 nak tlawm lo an khangh i a ciam dih. Tualchung mi 7,000 leng a himnak hmun ah an zam, tiah theih a si. Nihin November 4 zinglei ah SAC ralkap pawl cu Monywa hmunram ah rallam an sial rih ko, tiah PDF hna sinin theih a si.

A luancia November 2 zong ah Monywa khua Suanye Htet(စွမ်းရည်ထက်) datsi dawr pawngah bomb thianhhlim ding in a kalmi SAC ralkap motor 1 cu, Monywa Peregrine People’s Defence Force nih bomb in an rak puahhnawh hna caah SAC ralkap 5 an thi i, 5 hliamhma an rak pu. Crd-The Chin Post