Kahdohnak Thawngpang Vun Theih Cu E!

Theih Khawh Mi Chung In Kahdohnak Thawngpang Fonh
==========
Sagaing ramṭhen, Tamu peng Boatkan hmunhma palik sakhan cu tualchung hriamtlai phu nih an laak. Meithal zun 15, kuanfang phuntling le palik hmanmi thilri kan laak chih tiah National Libration Army nih March ni 24 ah phungning tein cathanh a chuah.

March ni 24, zinglei suimilam 7:30AM ah Tamu peng Tamu-Kalay lampi Boatkan khua ah NLA le SAC ralkap kar minutes 45 tluk kahdohnak a chuah hnu ah SAC ralkap kuttang um palik sakhan cu NLA nih an laak. Cu sakhan ah cun meithal zun 15, kuanfang phuntling 2,269, BA-63 rifle kuan bawm 12, BA-94 kuan bawm hnih, AK-47 kuanfang bawm 2, mine lung hnih, kut cheh bomb lung 3, BA-63 thirfung 2, nam 1, walking talking lung 6, kut hrennak 7, palik hmanmi fung hna le uniform hna an lak tiah theih a si.

Boatkan khua palik sakhan cu National Libration Army (NLA) nih an laak hnu ah SAC ralkap nih March ni 24, chunhnu ah Mi 35 helicopter 2 hmang in kahdohnak a tuah tiah theih a si. Tamu peng Boatkan khua cu inn 2,000 hrawng khuasaknak khua ngan pakhat a si. Boatkan palik sakhan cu tualchung hriamtlai PDF nih March 24, zinglei ah an laak.

SAC ralkap le sakhan laakpiak an ton hnu chunhnu ah Mi-35 helicopter 2 nih kahdohnak a tuah. SAC ralkap nih vanlei kahdohnak a tuah ruang ah inn rawk le minung aa hliammi an um le um lo theih a si rih lo.Karen ramkulh, KNU brigade 6 hmunhma Kyainseikgyi ah hliamhma tuar SAC ralkap hna cu don ding in le riahcaw va phurh pah ding in rallam sialtu SAC ralkap le KNLA, PDF kar kahdohnak a chuak.

Cu kahdohnak ah cun SAC ralkap 10 an thi tiah Special Operations Force in ṭuanvo ngeitu pakhat nih a chim.
Kyainseikgyi peng Kwilonetai sakhan ah riahcaw chanh ding in le hliamtuar don ding in rallam sialtu SAC ralkap le KNLA, SOF le Nagani hriamtlai phufonh kar March ni 17 le 21 ah tiin voi hnih tiang kaphnih i kahdohnak a chuak.

Voi hnih tiang i kahdohnak chung ah SAC ralkap lei duh-ṭatyinhmu telh in minung 10 an thi, hliamhma tuar an tam pin ah MA-1 pathum, MA 2 pakhat tiin meithal 4 cu tualchung hriamtlai phufonh nih an lak tiah theih a si. Kaphnih kar i kahdohnak chung ah SAC ralkap nih raltuknak vanlawng hmang in voi hnih, MI -35 in voi thum kahdohnak a tuah caah tualchung mi hna umnak inn hnih a rawh pin ah hliamtuar zong an um tiah theih a si.

Myanmar ram pumpi huap March ni 23, nikhat chung SAC ralkap le tualchung hriamtlai phu kar a cangmi kahdohnak ah SAC ralkap 85 an thi tiah tualchung hriamtlai phu hna nih an thanhmi cazin ning ah theih a si. 2023 March ni 23, SAC ralkap le tualchung hriamtlai phu kar kahdohnak ah Sagaing ramṭhen in SAC ralkap 37, Magway ramṭhen ah 1, Taningtharyi ramṭhen ah 15, Bago ramṭhen ah 17, Mandalay ramṭhen ah 7, Ayeyarwady ramṭhen ah 1, Karen ramkulh ah 1 le Chin ramkulh Matupi peng ah 6 tiin nikhat chung ah SAC ralkap 85 an thi.

Mandalay ramṭhen, Myingyan pengkomh, Natogyi Myoma palik sakhan, Taungthar peng gate le rallam sialmi SAC ralkap cu drone in bomb kan thlakhnawh hna caah ralkap le palik 4 an thi, tiah Myingyan District Drone Strike in ṭuanvo ngeitu pakhat nih a chim.

Taungthar peng Tamangyi khua um SAC ralkap check gate cu March ni 23 ah Myingyan District Drone Strike phu le Myingyan pengkomh Battalion 1, 3 le 4 hna nih bomb in an thlakhnawh hna, tiah theih a si. Cu ṭhiamṭhiam in Natogyi peng Myoma palik sakhan cu Myingyan District Drone Strike phu le Myingyan pengkomh Battalion 1, 3 le 4 hna i bawm in bomb lung 8 in an thlakhnawh hna caah ralkap le palik 2 nak tlawm lo an thi i tam ngai hliamhma an pu, tiah theih a si.

Natogyi palik sakhan ah bomb lung 8, Tamangyi khua ah lung 1, Natogyi peng Min khua ah lung 1 tiin kan thlakhnawh hna caah kahdohnak a chuak. Ralkap le palik cu an einak umkheng zong an ṭawl ngam ti lo. Hiti ning te a si cun Rakhine ram kal hmanh a ṭha deuh, hika khua um kan huam ti lo an ti,” tiah Myingyan District Drone Strike in ṭuanvo ngeitu nih a chim.

Min khua ah umhmun a khuarmi SAC ralkap cu rallam an sial lioah Myingyan District Drone Strike phu le Myingyan pengkomh Battalion 1, 3 le 4 hna i bawm in March ni 20 ah bomb in an thlakhnawh hna caah ralkap 2 an thi, tiah theih a si.

Sagaing ramṭhen, Monywa peng ah rallam a sialmi SAC ralkap cu The Brightness Monywa nih bomb in an puahhnawh hna caah 6 an thi, tiah theih a si. Monywa peng hmun pakhat ah tualchung mi harnak petu SAC ralkap cu nizan March 23 zanlei suimilam 5:40PM ah bomb in kan puahhnawh hna caah ralkap 6 an thi, tiah The Brightness Monywa in ṭuanvo ngeitu nih a chim.

Cu bomb puahhnawhnak ah The Brightness Monywa le Peace Takers Task Force hna i bawm in an puahhnawh hna, tiah theih a si. Sagaing ramṭhen, Kone khua chak kuva dawr ah kuva cawtu SAC ralkap thawngpetu, Thein Than cu nizan March ni 23 zing suimilam 7:20AM hrawng ah Guerrilla, UG phu nih meithal zun 10 in an fimhlawm, tiah theih a si.

SAC ralkap thawngpetu Thein Than cu Shwe Taung Toll Gate a tanmi khualtlawng motor pakhat ah a tlawm bik kyats 30,000 in sing 1 tiang a hal tawn hna caah UG phu nih an fimhlawmnak a si, tiah theih a si. SAC ralkap thawngpetu Thein Than fimhlawmnak ah ṭangṭi phu a simi UG le Truth Keeping Force hna i bawm in kan fimhlawm i, amah sin ah tangka kyats sing 582,300 zong kan laak, tiah UG phu in ṭuanvo ngeitu nih a chim.

Bago ramṭhen, Yetarshi peng Shuawyama khua le Wyathit khua kar ah Bago Region PDF le SAC ralkap kar kahdohnak a chuah caah SAC ralkap 11 an thi, tiah theih a si. Sittaung tiva nichuahlei kap ah rallam a sialmi SAC ralkap 60 hrawng cu, March ni 17 chun suimilam 2:45PM hrawng ah PDF nih an kah hna caah suimilam 2 chung kahdohnak a chuak i, SAC ralkap 10 nak tlawm lo an thi, tiah theih a si.

Cu kahdohnak ah Taungngo pengkomh PDF Battalion 3501, Company 4 le 6 hna i bawm in an kah hna. Shua khua um Khah Mah Yah 19 le Khah Lah Yah 84 in SAC ralkap nih, Sittaung khua lei ah hriamngan an kah ruangah PDF 3 hliamhma an pu, tiah theih a si. Cu pin ah Magway ramṭhen, Yesagyo peng Zitaw khua um pyusawhti sakhan cu hriamngan in MRTF nih kan kah caah pyusawhti 1 a thi, tiah MRTF phu in ṭuanvo ngeitu pakhat nih a chim.

Zitaw khua um pyusawhti sakhan cu MRTF phu nih, March ni 22 zan suimilam 9:48PM hrawng ah 80mm, 120mm hriamngan in an kah caah pyusawhti 1 a thi i, 5 hrawng hliamhma an pu, tiah theih a si. “Pyusawhti cu hriamngan in kan kah hna caah kaphnih kar kahdohnak a chuak. Cu kahdohnak ah kanmah lei in aa hliammi kan um lo.

Raltuk cawn a dihmi pyusawhti 1 a thi i, 5 hliamhma an pu,” tiah MRTF ṭuanvo ngeitu pakhat nih cun a chim. Cu kahdohnak ah fonhkomh Battalion 17 in Company 2, Shwedarbu, Thanmani Theinhnget, Maylat Special Operation Guerrilla MRTF le Yesagyo Bogyoke phu hna i bawm in an kah hna, tiah theih a si.

Sagaing ramṭhen, Shwebo peng Minchin khua in Seihhkun khua palik sakhan ah thazang chap dingbin a kalmi SAC ralkap le pyusawhti cu kan kah hna caah 7 an thi, tiah Snake Eyes PDF nih an langhter. Minchin khua in Seihhkun khua palik sakhan ah thazang chap ding in a kalmi pyusawhti 100 hrawng cu, March ni 19 ah Snake Eyes PDF nih an kah hna i minutes 10 chung kahdohnak a chuak. Cu ah cun pyusawhti 7 an thi i 3 hliamhma an pu, tiah theih a si.

March ni 18 zanlei suimilam 2:25PM hrawng ah Shwebo peng Seihhkun khua palik sakhan ah umhmun a khuarmi SAC ralkap nih, khuami hna cu timh ciammam tein hriamngan in an kah hna ruang ah a thli in PDF nih an kah hna i, SAC Helicopter nih minutes 45 chung a kah ve hna, tiah theih a si.