Mindat Kahdohnak Ah SAC Ralkap Pakhat A Thi, Pahnih Hliamhma An Pu
==================
Chin ramkulh, Mindat SAC ralkap check gate cu June 11 le 13 ah kan kah i SAC ralkap pakhat a thih pinah pahnih hliamhma an pu, tiah CDF Mindat nih cathanh an chuah.
Mindat khuachung um SAC ralkap check gate cu CDF Mindat nih atu le tu an kah tawn i an kah caan poh ah SAC ralkap nih check gate a tanmi khualtlawng mi hna cu chekhlatnak an tuah hna. Cu pinah khuate lei zong ah hriamngan an kah.
SAC ralkap nih tualchung mi hna cu hnahnawhnak an pek tawn hna ruangah Mindat peng um mino hna cu CDF Mindat lei ah ṭang ding in an nawl hna. Cu leng ah kum 16 in 35 karlak mino poh cu CDF Mindat theihpinak tel loin ramchung le ramleng ah khualtlawn khawh a si ti lai lo, tiah an langhter.
Taningtharyi ramṭhen, Tayatchaung peng, Yange khuachung Inbu sang cu SAC ralkap nih an khangh i, tualchung mi 200 renglo an tlaih hna, tiah tualchung mi nih Khit Thit Media ah an chim. Tu zinglei ah SAC ralkap nih Yange khua, Inbu sang cu luhhnawh in tualchung mi an umnak innlo cu an khangh nain inn zeizat dah a kangh fiang in theih a si lo.
Yange khua mi 200 renglo zong ralphaw caah an tlaih hna, tiah tualchung mi nih cun an chim. Yange khua mi tam deuh cu Thailand ah rian a ṭuan mi an tam caah Thailand ramchuak inchung thilri a ngei mi hna cu SAC ralkap nih an hrawhpiak hna pin ah thilri mansung hna cu an fir hna, tiah Khit Thit Media nih a ṭial.
Sagaing ramṭhen, Sagaing peng, Sataung khua pawng ni thum chung kahdohnak ah SAC ralkap officer telh in 30 leng an thi, tiah PDF lei nih an chim Sataung khua nitlaklei, Paukmataung khua le Thazin khua pawng ah June 13 in June 15 tiang kahdohnak a chuak. SAC ralkap pawl cu PDF thiamhlei ralkap tlawmte nih a thlithup in kan va kah hna, tiah Zero Guerrilla phu hruaitu Thet Kyi nih a chim.
“June 13 zing suimilam 10:00 in kahdohnak a chuak. Kan hriamnam aa thlau tuk caah a thlithup in kan kah hnanak a si. SAC ralkap an lam hruaitu pa telh in ralkap 20 leng an thi. Kanmah lei in ralkap 6 hliamhma an pu ve. SAC ralkap nih Paukma khua zong an khangh,” tiah Thet Kyi nih cun a chim chap.
“Rallam a sialmi SAC ralkap pawl hi Wetlet in Sagaing peng ah an kal. June 13 ah Sataung nitlaklei ah rallam sial in kahdohnak a chuak i, SAC ralkap 10 an thi. June 14 kahdohnak ah ralkap 7 an thi chap. June 15 kahdohnak hi a zual ngai i, ralkap lei hi 20 leng an thih pinah 20 leng hliamhma an pu. Ni thum chung kahdohnak ah SAC lei 30 leng an thi,” tiah Zero Guerrilla phu in ṭuanvo ngeitu nih Khit Thit Media ah a chim.