Chin Ram SAC Kuttung Sianginn Ah Siangngakchia 50,000 leng Nih Min An Pek
=================
Chin ramkulh SAC Ralkap kuttang on mi sianginn 400 hrawng ah sianginn kai ding in min cazin a pe mi siangngakchia thong sawmnga (50,000) leng an um, tiah Chim ramkulh fimcawnnak zung Data ning in theih a si. Tukum 2023-2024 cacawn kum hi SAC ralkap nih uknak a lak kumhnih chungah siangngakchia min cazin aa pe mi an tambik kum le sianginn tambik an on kum a si.
Siangngakchia pakhat nulepa nih an chim mi cu, “Kan fale sianginn an kai lonak kumthum hrawng a si cang i, sianginn kai thawk ding in kum 8 a si cang, a ṭhang ding mi an si caah sianginn kan kaiter hna hi a herh hrim ko,” tiah an chim. Chin ramkulh fimthiamnak zung nih a cinken ning ah Paletwa peng in siangngakchia 22,000 nih min an pek i, Chin ramkulh in a tambik a si.
Tidim peng in 10,000 hrawng, Tonzang in 6000 leng, Falam in 3700 leng, Hakha in 3000 leng, Matupi in 2500 leng le Mindat in 1500 leng le Kanpalet in 296, an zapi ah 50,000 leng an si. 2021 SAC nih uknak a lak hlan ah Chin ramkulh Siangcachimtu 10,000 hrawng an si nain hnarcheu leng CDM an tuah caah siangcachimtu 4,000 hrawng lawng an tang, tiah theih a si. Hakha ah Hermon zong an awn cang i Chin Glaxy zong an tuah kel ton ning in tuanvo an la cang.
Manipur buainak ruangah himnak kawl in Mizoram ah a zaam mi cu minung thonghra leng an phan cang i, Mizoram in eidin le herhhai nifatin Manipur lei ah phorh peng a si. Manipur in Mizoram ah a lut mi vialte Mizoram cozah nih a rak cinken ning ah, nizan zanlei suimilam 5 tiang ah khan minung 10,091 an phan cang. Aizawl district ah minung 3537; Champhai dist ah 232; Kolasib dist ah 3558; Khawzawl dist ah 64; Saitual Dist ah 2440; Serchip dist ah 53; Mamit dist ah 109; Lunglei dist ah 63; Hnathial dist ah 8; Siaha dist ah 11 an si.
Manipur le Mizoram pehtlaihnak lampi ah an hman cem mi cu Tuivamit hlei a si i, nikhat chung ah minung 800 hrawng an luh caan zong a um. Hi lampi hin Manipur lei ah facang, chiti le nifatin herhhai lengah datsi(petrol & diesel) zong phorh peng a si. Manipur buai hnu in tlangcung mi le Meitei hna umnak cu pehtlaih awk a ṭhat ti lo ruangah Mizoram lei in herhhai vialte zalh le cawk a si.
May 3 ah a chuak mi Manipur ramkulh tlangcung miphun le Meitei miphun hna buainak cu a daih khawh rih lo caah ralzaam zong nifatin an karh. Atu tiang ah tlangcung mi Zo-Kuki-Chin hna umnak khuate 140 leng a kaang cang, tiah Lamka TV reporter Mang Taithul nih a chim.