Kalaymyo Ah Nu 20 Leng An Tlaih Hna
=====================
The Chinland Post | 2023 June 19 — Sagaing ramṭhen, Kalaymyo, Nyaungbintaryar sang, Myoma bazaar ah pangpar a zuar mi nu telh in pangpar aa tonh mi nu 20 leng an tlaih hna tiah thil a can lio a hmu mi nih Chin World ah an chim tiah Chin World nih a langhter.
“SAC ralkap pawl cu mipi thuam he ralkap mawṭaw a hme mi 5 hrawng in an ra, pangpar a zuar mi nu pakhat zong pangpar na tonh an ti i an tlaih. A tam deuh cu dawr zuarmi an tlaih hna. An zapi tein palek sakhaan ah an kalpi hna” tiah Chin World ah a chim.
June 19 hi State Counsellor Daw Aung San Suu Gyi chuahni a si caah pangpar tonh in duhlonak langhter ding tiah Social cung ah an aupi mi a um caah pangpar aa tonh mi pawl kha SAC ralkap nih zumhlonak he an tlaih hna tiah a chim fawn.
“Bazaar ah an raa i dawr zuartu telh in pangpar aa tonh mi poah an tlaih hramhram hna, an mawṭaw nih a tlum ti hna lo caah a si, i tlum rih hna sehlaw cu an tlaih thluahmah rih hna lai” tiah a chim fawn. Atulio Kalaymyo ah miung an i but deuhnak hmun poah SAC ralkap nih pangpar aa tonh mi poah tlaih le biahalnak an tuah hna tiah Chin World nih a langhter.
Manipur Imphal khuapi ah Venhimnak rianṭuan tu le mipi an i nam ṭhan ca ah tualchung mipi pahnih hliam an tuar. BJP hruaitu inn zong khangh an timh ti ah ṭuanvo ngeitu hna nih an chim. Imphal pin ah Kwakta, Bishnupur peng le Kangvai, Churachandpur peng ah kahdohnak a chuak ṭhan fawn.
Imphal nitlak-chaklei Iringbam palik station in ralthuam zong fir an timh a sinain zeihmenh an la menh lo. Army, Assam hriamtlai phu le Manipur Rapid Action Force hna nih khuapi chung buainak chuak ding veng in zankhuadei joint march an ngei tiah theih asi. Mipi a fun mi hi 1,000 tluk an si i palace compound kam ah inn khangh an timh tiah kan theih.
Sinjemai ah zantlai hnu ah BJP pisa thah ding in an kulh asinain, ralkap nih an ṭhawl khawh hna. Imphal zong ah BJP women’s wing president Sharda Devi inn cu luhhnawh an timh chih asinain, hriamtlai tu phu nih an ṭhawlkhawh ṭhan hna. Union Ministee RK Rangjan Singh umnak inn zong kan hnu cacawn ningani khan luhhnawh in khanghpiak a si.