Nihin KAn Theih Khawh Mi Chung In Kahdohnak Thawngpang!
==============
KNU Brigade 6 hmunram Dupalayar pengkomh ah April thla chung kahdohnak voi 29 a chuak i SAC ralkap 107 an thi. Khah Lah Yah 207 Battalion 8 in Battalion Comamnder le Major rank ngei 2 le Captain 1 telh in 85 nih hliam an tuar, tiah Dupalayar pengkomh nih cathanh an chuah.
Cu kahdohnak ah SAC ralkap 3 an tlaih hna i KNLA, KNDO le ṭangṭi phu lei in ralkap 10 nih an nunnak an pek ve pinah ralkap 19 hliamhma an pu. Drone pakhat zong SAC ralkap nih an kah thlakpiak hna, tiah theih a si. April thla chungah SAC ralkap nih vanlawng in voi 31 bomb an thlak i, hriamngan in voi 184 an kah caah cacawnnak sianginn 3, phungki sianginn 1, Khrihfa Biakinn 2, sii khan 2 le tualchung mi inn 387 an rawk i, inn 12 a ciam, tiah theih a si.
Vanlawng le hriamngan in SAC ralkap nih an kah ruangah tualchung mi 23,021 ral an hrial. Sah Kah Khah in Battalion Commander Myo Set Aung kuttang, Brigadier Aung Myo Htun kuttang le Khah Lah Yah 32 Battalion Commander Ye Htet Zaw nih an hruaimi phu nih tualchung mi 2 an thah hna leng ah 1 zong an tlaih, tiah Dupalayar nih cun an langhter. Cu pinah hriamngan kahnak in inn zuat saṭil Caw 34, Vok 21, Meheh 20 le a dang saṭil tampi an thi. Tualchung mi inn 12 telh in dum le hau tampi a kang, tiah an cathanh ah cun an langhter.
Sagaing ramṭhen, Chaung-U peng um Chaung-U peng mipi hriamtlai CRA sakhan pakhat cu SAC ralhrang nih mipi 20 leng tlaih in ralphaw ah an hman hna i an luhhnawh hna caah mei in an khanghpiak hna, tiah CRA hriamtlai ṭuanvo ngeitu pakhat nih a chim.
May 6, zing suimilam 9:00 renglo ah pyusawhti ralhrang an tamnak Kangyikone (ကံကြီးကုန်း) khua lei ah ei-din phurtu SAC ralhrang thazaang 100 leng nih ralphaw ah mipi 20 leng tlaih in Chaung-U peng mipi hriamtlai phu CRA Ṭet-khuai (1) hriamnam serchuahnak sakhan an luhhnawh i, bomb lung 70 leng, Reseiver, Heavy Box, seh 5 le sakhan pawl cu mei in an khanghpiak dih hna, tiah theih a si.
“Ralphaw ah tlaihmi mipi hna an um caah kap lo in kan hrial hna, kan tarhmi bomb pawl zong kan hrawh dih hna i, kan putkhawh mi thilri paoh kan put hna, kan putkhawh lo mi tu cu kan thuh ta hna. Cu kan thuhmi cu an hmuh i an kan khanghpiak dih, SAC ralhrang an ra timi thawng cu suimilam pakhat aa duh lawng ah kan theih i, timhlamhnak kan ngei manh lo” tiah CRA hriamtlai in ṭuanvo ngeitu pakhat nih Khit Thit ah a chim.
SAC ralhrang nih kan sakhan an luhhlan ah hriamngan in an van kah bawmh hmasa hna caah mipi hriamtlai in ralkap pakhat nih hliamhma faktuk lo a tuar. Cu ralhrang pawl nih May 7 ah lamkam um mipi inn hna baoh piak in thilri tampi zong an firpiak hna hnu ah ralphaw i an tlaihmi mipi hna cu an purhter hna, tiah theih a si.
Mon ramkulh, Bilin peng Winka palik sakhan le Taungzun palik sakhan cu Pa’ang PDF-KD le ṭangṭi phu hna nih May 6 ah an kah caah SAC ralkap 3 an thi, 3 hliamhma an pu, tiah theih a si. PPDF-KD, PDF, KRF, TPDF, Kyeikhtu Pah Kah Phah le Bilin Pah Kah Phah hna i bawm in Bilin peng Winka palik sakhan cu zanlei suimilam 2:46 in 3:12 tiang kan va kah caah SAC ralkap kuttang palik 2 an thi, tiah PPDF-KD nih cathanh an chuah.
Winka palik sakhan kan kah lioah Taungzun palik sakhan zong PPDF-KD, PDF, KRF, TPDF, Kyeikhtu Pah Kah Phah le Bilin Pah Kah Phah nih bomb lung 4 in an thlakhnawh caah SAC ralkap 1 a thi, 3 hliamhma an pu, tiah an langhter. Cu kahdohnak ah PDF ṭangṭi phu lei in a thimi le aa hliammi an um lo. PPDF-KD cu tlangcung hriamtlai phu hna le ṭangṭi phu hna he ral a tu cuahmahmi an si, tiah theih a si.
Mandalay ramṭhen, Nabuaing-Myingyan lam ah SAC ralkap an i citmi ke 6 ngei leilawng cu bomb in kan puahhnawh caah ralkap 4 an thi, tiah Shwe Chanthar Guerrilla phu in ṭuanvo ngeitu La Kwin Eng nih a chim. May 7 zing suimilam 8:00 hrawngah Nabuaing in Myingyan lei a kalmi leilawng pakhat chungah SAC ralkap 25 hrawng an i cit i, bomb in puahhnawh an ton caah ralkap 4 an thi, tam ngai hliamhma an pu, tiah theih a si.
“Bomb in kan puahhnawh hna hnuah an kan kah ve ko nain kanmah lei a thimi le aa hliammi kan um lo. Kan tei hlan lo kan doh peng hna lai,” tiah ṭuanvo ngeitu nih cun a chim.