Kahdohnak Thawngpang Fonh!
===================
Palaw peng, Thayettapin khuate le Nyaungshinkone khuate in SAC kuttang pyusawhtee 2 an thah hna tiah Palaw PDF nih an thanh. Palauk peng, Thayettapin khuate in pyusawhtee hruaitu chang U Myo Tin le Nyaungshinkone khua in U Sein Than hna cu June 24 zaanlei sml 4:30pm hrawng ah Palaw PDF nih an va thah hna hi a si.
An thah mi hna pyusawhtee 2 sin in AK zuun 2, Kuanbawm 4, kuan 133, Grenade leng ah kahdohnak thilri pawl zong an lak khawh tiah theih a si. Sagaing ramṭhen, Monywa khua ah a um mi Kah-Ngyah-Nah zung ah hmunhma a khuar mi SAC ralkap pawl cu PDF phu 9 fonh nih an kah hna i a thi mi zong an tam tiah Chindwin Attack Force nih an thanh.
June 24 zaanlei sml 6:00pm hrawng ah SAC ralkap pawl cu PDF phu 9 fonh nih an va kah hna hi a si.
Kahdohnak chung ah SAC lei 15 an thi i hmundang in SAC ralkap tampi bawmh ding in an rat caah sakhaan la kho lo in an kir ṭhan tiah theih a si.
Monywa The Boys, Monywa pengkomh B05, B07, B12, B22, B25, B28, Yinmarbin pengkomh B28 le MRDA hna bawm in kahdohnak an tuah theih an langhter. Kahdohnak chung ah a sung tuk mi SAC ralkap pawl nih mawṭaw dinhnak tual hnulei ah a um mi inn 2 le Kun (ကွမ်း) dum an khangh tiah theihternak an tuah.
Mon ram, Ye chaklei Aungthayar khuate le Kaninkamaw khuate karlak ah a cang mi ni 3 chung kahdohnak ah SAC ralkap 28 an thi i SAC lei nih vanlawng hmang in kahdohnak an tuah tiah Ye peng PDF phu pawl sin in thawng theih a si.
June 26 zaanlei sml 6:00pm hrawng ah Aungthayar khuate le Kaninkamaw khuate karlak ah a um mi SAC ralkap pawl cu Kyaphyo, Ye PDF le KNLA Brigade 6, B27 phufonh nih an va kah hna hi a si. June 27 zinglei sml 7:00am hrawng zong ah cuka hmunhma ah kahdohnak pehzulh in a chuak i cu ni zinglei sml 11:30am hrawng ah kahdoh a chuahnak a pawngkam um mi Aungthapyay khua, Aungthayar khua le Kaninkamaw khuate pawng ramlak cu Helicopter 2 in vanlei kahdohnak a rak tuah tiah theih a si.
Cu ni kahdohnak chung ah SAC ralkap 28 an thi tiah an langhter. June 27 zinglei sml 10:00am hrawng zong ah Thanbyuzayat lei in ke in a rak ṭum mi SAC ralkap pawl cu Belamine khuate pawng ah PDF phufonh pawl nih an kah hna i SAC ralkap 3 an thi tiah theih a si.
Kahdohnak pawl chung ah SAC ralkap 30 hrawng an thi tiah PDF phu pawl nih cathanh an chuah cio. Kahdohnak chung ah, Waiphe khua hrambunh SAC hriamngan ralkap nih hriamngan an kah caah PDF chungtel 2 an lu le an ke ah thinpan awk um tuk lo in an i hliam tiah Kyaphyo phu nih an thanh.
Sagaing ramṭhen, Tamu peng chung ah SAC ralkap Nagamin sakhaan cu Tamu PDF B04 nih an kah hna caah SAC ralkap 7 an thi tiah Tamu PDF B04 nih cathanh an chuah. SAC ralkap thazang 35 hrawng nih hmunhma an khuarnak Nagamin sakhaan cu June 24 zinglei sml 5:15am hrawng ah Tamu PDF nih an va kah hna i SAC ralkap 7 an thi, Tamu PDF chungtel 1 a nunnak a liam tiah an langhter.
Kaphnih karlak kahdohnak a fah tuk caah SAC ralkap lei in SNA, Meitei UG le pyusawhtee tampi nih bawmhnak pek ding in an rak phanh caah Tamu PDF pawl hnu an kir ṭhan tiah theih a si.